Miti Mumu Ŋic 3:9-20

⁹Ŋic nâŋâc gie‐nâŋec bahuc fârine wemo wiac bâfuaeŋgopeneŋ?

¹⁰Anutuzi gie ŋemâcne fai‐nâŋecko râewec i hone tarakopac.

¹¹E wiac sasawa jaŋere dameŋ i fâretiŋ jaha râe‐fârewec. Erâ wâc ŋic nâŋâc wiac fua raocmu irec fuŋne mananaŋte woworic râe‐nârewec, ehuc ine sifu eebapa‐ticnere fuŋne mana taranʒipeŋte tâpiri mi qikiŋne‐nâreekac.

¹²Irec no ʒiŋuc mana tarapo: Ŋic nâŋâc mâreŋko junaŋmu sâc wiac i me i mi ebac ee mâc ʒeri bubiaŋ sawa manahuc jupene sâckezejec.

¹³Erâ ʒiŋuc mana tarapo wâc: Nâŋâc nânâ opâ nâeŋgopeneŋ â gie bapene fârine fuame ʒeri eeŋgopeneŋ izi Anuturaonec taha hâcne.

¹⁴Erâ wâc ʒiŋuc manakopac: Anutuzi wiac sasawa ebac eekac i fofo sanaŋ, ŋic nâŋâc ira ʒuhuckerâ wiac moc bapa, me irecnec wiac moc ro behec ee i mi fokac. Anutu e ŋic nâŋâc araŋ bacnehuc junaŋte wiac iŋuc hâcne bâfua‐fârewec.

¹⁵Wiac fuaekac me juku fuaocmu i mârâc jaha biac fua‐fârewec, Anutu e wiac izia fuarâ fua eocte giene baekac hâcne.

¹⁶Erâ i sawa mâcne, no ʒuhuckerâ wiac kecʒiŋuc wâc honepo: Mâreŋko mumutiŋ gie â eebapa tiŋne foocte mukicne ira wiac hehesicne foekac.

¹⁷Iŋuc honerâ maŋnanezi ʒiŋuc manasupo: Anutu e gie â wiac sasawa irec dameŋ bawecte ŋic tiŋne â hehesicne jaŋere dâŋ sâckoa mutaraocmu.

¹⁸Erâ ʒiŋuc manasupo wâc: Anutu e ŋic nâŋâc ʒiŋuc nâzâ nâwotuc eocte ba esâic enâreekac: Ŋoŋe qowi jaŋere sâc sirickerâ biaŋne mi jueŋgopieŋ.

¹⁹Irec qowi jaŋe wiac fua‐jareekac sâc ijaha nâŋâc fua‐nâreekac. Jaŋe hâmoeŋgopieŋ sâc ijaha nâŋâc hâmoeŋgopeneŋ, jaŋe nâŋâcne sâc jaha bâfuac‐jopakicne. Ŋic nâŋâc jaŋere sâc jâuruhuc biaŋne mi jueŋgopeneŋ. Jaŋere juju mecne â nâŋâcne juju mecne i wiac fâri tâmiric jaha.

²⁰Jaŋe mecne â nâŋâc mecne mâmâc hae mâreŋ ijaha rafârenaŋmu. Nâŋâc mâmâc jaha mâreŋkonec fuambeŋ irec mâmâc jaha mâreŋko risie hunaŋmu.