Miti Mumu Ŋic 10:9-19

⁹Qânâ wiac rohuc juhapene qânâzia ŋemac‐nâpoocmu, â ʒoc hesuckepene izia nâpoocmu.

¹⁰Râricge micmâŋ eha mi ʒâmucmuo ine gie sâko gareocmu, irec qanaŋ mamanasu gie barâ wiac ebac etec sâckeocmu.

¹¹Go homa moc biac kicguha faicnao sawa bâmâteŋkecmu i fâri tâmiric eocmu.

¹²Ŋic maŋɋârâŋhec e dâŋ muocmu izi hâcne ʒâŋe biŋe‐ticne bafahareocmu, â ŋic mutuc matacne e ine dâŋticnezia sipirickeocmu.

¹³E fuŋkerâ dâŋ mutucne muekac, erâ muraku dâŋ gâgâpâcne jâmbâŋ muhuc mutaraekac.

¹⁴Ŋic mutuc matacnezi dâŋ ʒuʒuhuc jaha muekac. Ŋic nâŋâc wemo wiaczi maic‐nâpoocmu i mi manaeŋgopeneŋ, erâ juku hâmopene irec faicnao wemo wiac fuaocmu i ŋic moczi moc sâcne wâc mi nâzâocmu.

¹⁵Ŋic mutuc matacnezi hae‐ticnere hata basahuc gie sâko baku docke betaŋ eocmu.

¹⁶Opoŋ, mâreŋ mocte ŋicwofuŋzi ɋie hawari juocmu â fekicnefâc‐ticne jaŋe ŋafe ʒora tiwâ bâzi sâko nâhuc juhapie hae fureme mâreŋ i sâqorerâ foocmu.

¹⁷Â mâreŋ moc irec ŋicwofuŋzi ŋic sanaŋne juocmu â fekicnefâc‐ticne jaŋe tiwâ bâzi‐jeŋic dameŋkoa nâ bac ehuc opâ sanaŋ nâpie maŋjeŋic mi sifuckeme mâreŋ izi ine biaŋne foocmu.

¹⁸Ŋic moc e ojoŋ juhuc ficbupu‐ticne mi bâpiaŋkeha hoe wahame juku ficticne ʒaŋkeocmu.

¹⁹Nâŋâc tiwâ bâzi nâhuc bubiaŋ manaeŋgopeneŋ â waiŋ opâ nâhuc ʒeri bari eeŋgopeneŋ, erâ ine wiac i moneŋ tâmiric mâc rorâ nânâne mi fokac.