MII GUN MIINU MO 16:35-40

³⁵Hili ki mo ḵali kush mo tani imandwall gwo hashki iman’doyi to kun doruwa dor mo mmo/o gwo mo ki: Dhalki ’kwani gwansan iin mo ma.

³⁶Dhala manc̱ora sijin guki’da Buulus gwo mo mmo/o gwo mo ki: Imandwall gwo hashki um gwo mo mmodhal um bway mo mmo/ii mo ti. Haali/ a’di wakan mo tani a’di mina uni iiyu/ mo shwanetan mo dhali iiyi ki moŋḵu’th is mo.

³⁷Hila Buulus oki uni gwo mo ki: Uni dorki am ibwambori ’kwani ki dar gi miiwaḵ mo, ’kwani kun ta ku gi Pa Ruumiya mo dhali ṯa’kki aman eya sijin mo dhali shwane/ uni mini ṯa’k am ka pije/ ka ’diya? Yisa ka jiŋ gana/. Hili dhalki uni iiyin ki is buni mo dhali sus am ka pije/ mo.

³⁸Dhali iman’doyi to kun doruwa dor mo guki gwo yansan e imandwall gwo mo dhali uni ḵo/ki is mo haali/ uni ciḵkin ki uni ta ’Kwani gi Pa Ruumiya mo be.

³⁹Dhali uni p̱u’dkin mo dhali yuḵ uni mo, dhali ki uni suski uni ka pije/ mo tani uni doṯki uni mmo/ii ’peni bampa/ mo be.

⁴⁰Dhali uni iikin ka pije/ mo ’pena sijin mo dhali cic̱kin mo e gu’b ma Lidiyya, dhali ki uni mishkina waḵ buni mo tani uni malaski uni ki gwo mo dhali ii mo be.