Menge Ininang 9:8-25

⁸Penga niyan, timindeg si Saulo. Meneng pegkebeka te mata din, wedà pekekità. Yan inewidan dan se belad din aw inagak doton te Damasko.

⁹Netelowan sikandin kidoen wedà pekekità aw wedad kinaen din aw ininem.

¹⁰Doen sebad otaw mig-ogpà kidoen te Damasko si Ananias egpemenal ki Jesus. Migpekità se Pengolo diyà kandin aw minikagi, “E Ananias.” Timaba si Ananias, kagi din, “Pengolo, eden lay se ibeg no ipeinang kanak?”

¹¹Minikagi se Pengolo, “Doton ka te dalan iningedanan Metòlid. Pemehai se balay i Judas, so yan se inogpaan te sebad otaw tege Tarso si Saulo. Migtawal-tawal sikandin diyà kanak.

¹²Doen impekità ko kandin te domateng ka aw memaed ka kandin, amon todà sikandin komità.”

¹³Minikagi si Ananias, “Sir, medita se otaw mig-indan kanak te ontò medaet se eg-inangen din diyà te menge otaw sinakop te Timanem doton te Jerusalem.

¹⁴Dimini heman sikandin te Damasko nengibing te papil sinolatan te menge pengolo te simbahan te Jerusalem te mepakay sikandin mekedakep te kedita te otaw egtawal-tawal diyà kamno.”

¹⁵Minikagi se Pengolo, “Doton ka, so sikandin se pinemallì ko amon meg-indan tepad kanak doton te menge otaw kenà Judiyo, aw menge selotan, aw sikiyo menge bowad-bowad i Israel.

¹⁶Ipetaga-taga ko kandin te doen kelimahan domateng diyà kandin tandà te pegtaking din kanak.”

¹⁷Penga niyan, dimoton si Ananias te balay inogpaan i Saulo. Peg-awop din, pinemàdan din si Saulo aw minikagi, “Kedowa ko, insogò a te Pengolo si Jesus, sìyan migpekità diyà kamno doton te dalan. Insogò a din dini kamno amon todà ka komità, aw amon domateng se Espiritu Santo kamno.”

¹⁸Pegketà nedagdag se iling te onap lekat te mata i Saulo, aw yan kimità den sikandin. Penga niyan, binonyagan sikandin.

¹⁹Pegpengaen din, migkèpiya se lawa din. Nenamay-namay mig-ogpà si Saulo diyà te menge otaw egpemenal doton te Damasko.

²⁰Wedà kenamay, dimoton si Saulo te simbahan te Judiyo aw migtoladà diyà te otaw kidoen te si Jesus se Batà te Timanem.

²¹Nepela se kedita te otaw nenenalan kandin, aw migpebelaw-belaway dan, “Sikandin indà se egpemilang te menge otaw egpemenal doton te Jerusalem. Dimini ekon heman amon dekepen din se menge otaw egpemenal ki Jesus, aw ibingen din dan doton te Jerusalem amon kelebosowen te menge pengolo te simbahan te Judiyo.”

²²Labi pa migkeinit se pedowan i Saulo te peg-indan din te benal si Jesus se Misiyas insogò te Timanem. Wedà pekedaeg kandin se menge Judiyo eg-ogpà doton te Damasko, so ontò mèpiya se inikagi din.

²³Pegkenamay-namay, doen menge Judiyo kenà egpemenal miglalang mengimatay kandin.

²⁴Pengkey aldaw aw delem, egbangan dan kandin kidoen te dalan lekat te Damasko amon imetayan dan sikandin. Meneng doen otaw mig-indan ki Saulo te ibeg dan.

²⁵Yan tinebangan sikandin te menge doma otaw egpemenal te Timanem. Pegketengà te delem, in-awop dan sikandin doton didalem te boliyas aw intonton dan iyan lekat te bintanà doton te lowà te melangkaw alad nekelibed te Damasko amon mekelowà.