Menge Ininang 7:1-21

¹Mig-insà se ontò pengolo te simbahan ki Esteban, kagi din, “Benal lay se kagi dan?”

²Timaba si Esteban, kagi din, “Menge kedowa aw emayen ko, penenalan kaw kanak. Gebii pa te peg-ogpà i Abraham doton te Mesopotamya, te wedà pa alin doton te Haran, migpekità se Timanem diyà kandin lekat te langit.

³Minikagi se Timanem, ‘Tanan ka te kedomaan no aw ogpeanan no seini. Doton ka te ogpeanan tedoan ko kamno.’

⁴Timolò si Abraham, aw nesayo lekat te Kaldiya, aw mig-ogpà doton te Haran. Pegkematay te amay din, impealin te Timanem si Abraham dini te ogpeanan tadon.

⁵Wedad tanà imbegay te Timanem kandin pengkey deitek. Pengkey wedad palos batà i Abraham, meneng migpakang se Timanem te doen tanà ibegay kandin aw menge bowad-bowad din.

⁶Minikagi se Timanem te meg-ogpà se menge bowad-bowad din doton te ogpeanan tinig-apò te menge doma otaw. Kelimahan dan aw ellangen dan te doma otaw taman te epat gatos se omay.

⁷Minikagi se Timanem, ‘Ipelumun ko se otaw meg-allang te bowad-bowad no, aw ipelowà ko dan lekat kidoen. Penga niyan, meg-ogpà dan dini aw megsimba dan kanak.’ Yan se pakang te Timanem ki Abraham.

⁸Penga niyan, migpunù se Timanem te keilangan tolien si Abraham aw kedita te bowad-bowad din meama amon eked dan kelibeli se impakang te Timanem kandan. Yan pegkepenga te sebad simana lekat te pegtebaw te batà din si Isaac, tinolì din. Iling kenyan, tinolì i Isaac se batà din si Jacob. Nenolì heman si Jacob te sempolò teg dowa batà din meama. Sikandan se kemonaan tadon.

⁹“Doen sebad batà i Jacob si Jose. Miningà se menge kedowa din, aw imbeligyà dan sikandin, aw yan pig-allang doton te Ehipto. Meneng tinebangan te Timanem sikandin

¹⁰aw yan neketayod te kelimahan. Ontò sikandin biyasa, aw yan neluba se selotan te Ehipto si Paraon. Ininang din si Jose gobirnador doton te Ehipto aw amo te kedita doton te balay din.

¹¹Doen bayil doton te Ehipto aw Canaan. Ontò nelimahan se kedita te otaw. Wedad heman kànen te kemonaan tadon.

¹²Pegketaga-taga i Jacob te doen kànen doton te Ehipto, insogò din se menge batà din doton te Ehipto. Yan se tagnà pegdoton dan amon mayad dan te kànen.

¹³Ikedowa te pegdoton dan te Ehipto, migpekilala si Jose te menge kedowa din, aw mig-indan ki Paraon te sikandan se menge kedowa din.

¹⁴Nayan, impeangay i Jose se amay din aw menge nayi aw anak din. Kepitowan teg lima se kedita dan.

¹⁵Minalin si Jacob aw mig-ogpà doton te Ehipto. Pegkepenga niyan, migkemematay se teg sebad-sebad kandan doton te Ehipto, si Jacob aw batà din menge kemonaan tadon.

¹⁶Inibing se lawa te nematay doton te Sikem, aw inlebeng dan kidoen te ilib doton te tanà tapay bineyadan i Abraham diyà te menge batà i Hamor.

¹⁷“Sagwa agpet den metoman se pakang te Timanem ki Abraham, migkedita se kemonaan tadon doton te Ehipto.

¹⁸Limowan se sebad selotan wedà ketaga-taga ki Jose.

¹⁹Nemilang se selotan sìyan te menge kemonaan tadon, aw migleges kandan igsà kedita te kaling batà timebaw impeibing din dan te amay doton te mediyò aw tinenanan dan amon matay.

²⁰Dalem niyan, timebaw si Moises pinemallì te Timanem. In-eles sikandin te amay aw inay din kidoen te balay dan taman te telo se bolan.

²¹Pegtanan dan kandin doton te kilid te wayeg, netelaan te batà i Paraon bayi. Yan pigbatà-batà din si Moises.