Apostolo 7:1-21

¹Muri a prister dagi i nanea e Stepan, “A ngava ni padi virihi ioe vona, i muholi?”

²Lakea e Stepan i koli i ta maea, “Mua o huriki a turagu mai, e tata mai, mu longo valai nau! A Vure na nipara dagi i luve na gare ne hita, e Abraham, na tahuna i made o Mesapotamia. I uka ma i made ma o Haran.

³A Vure i luve vona, i ta maea, ‘O pea a robo vomu, e huriki a viri vomu, o vano o lakea na robo ga vakasiri ioe vona.’

⁴“I mavonga, e Abraham i pea a robo ne huriki a Kaldia, i vano i made o Haran. Muri ne tamane Abraham i mate, a Vure i tuli talea o Haran, i tuli vilia koea na malala iea, ra mu made vona ngane.

⁵Pali a Vure i uka ma i habia ne Abraham tara tabekena malala ge ne vona. Na tahuna iea, e Abraham i uka e tuna. Pali a Vure i ta muholi vona ge habia vona, turana e huriki a hamona a malala iea.

⁶A Vure i taki tabua ne huriki a hamona bara ria a mosi na robo ne huriki ranga. E huriki nga bara ri vakavora e huriki a hamone Abraham, bara ri vakamadihi ria na pida i 400.

⁷Pali a Vure i ta maea, ‘Iau ga vakamadihi e huriki a kabu ri vakavora e huriki a hamomu. Muri ri gi pagitala vona a robo iea, ri gi valai, ri gi kavurike iau koea na malala iea.’

⁸Muri i habia ne Abraham a ngava dagi na ni pala a kulina viri. E Abraham i vakabelea ngane e Isak, lakea i palea a kulina muri na parava i polotolu. E Isak i vakabelea e Iakop. E Iakop i vakabele e huriki a gare ne hita ala ravulu a polona i rua.

⁹“E huriki a gare ne hita nga ri tepua e tarine ria, e Iosep, lakea ri habia ne huriki a Egipto, ri konea ge ia a vora ne ria. Pali a Vure i made turana,

¹⁰i korimulea na nimadihi lobo i bele vona. I habia ne Iosep a lohokanga dagi, i ratea e Parao, a hariki o Egipto, i matakilaka vona. Muri a hariki i ru ia ge matakaria a tanga e Egipto turana maki lobo vona.

¹¹“Muri a pago i bele, i ratapile e huriki a Egipto, e huriki a Kenan, ri vitolo. E huriki a gare ne hita ranga ri bala a maki ni kani.

¹²Na tahuna e Iakop i longo i tahoka a vit o Egipto, i rudu e huriki a gare ne hita, ri lokovonga, ri bole a maki ni kani, ri hamule.

¹³Na tahuna ri lokovonga tabu e Iosep i vakasiri ia ne huriki a turana mai, ia e rei muholi. Ngane e Parao i lohoka vona e huriki a kabukabu ne Iosep.

¹⁴Muri e Iosep i talo rike a ngava ne tamana e Iakop, turana e huriki a kabukabu vona ala ravulu polorua a polona i lima, ri gi valai vona.

¹⁵Lakea e Iakop i puru o Egipto, i mate vonga. E huriki e tuna, re huriki a gare ne hita, ria ranga ri mate vonga.

¹⁶Lakea a podane ria ni kaloho mule valai o Sekem, ni ru na babe na malala dagi e Abraham i konea ne huriki e tune Hamor.

¹⁷“A parava a Vure i ta muholi vona ne Abraham ta ge bele, ngane i valai tabukoi. E huriki a viri ne hita vonga o Egipto ri bele kupo hateka.

¹⁸Muri a hariki tara i matakari na robo e Egipto, i uka ma i lohoka ne Iosep.

¹⁹A hariki iea, i tami e huriki a viri ne hita, i rata hale ria. I vakuku ria ri gi vuroki na naru e huriki a koma karaba, ri gi mate.

²⁰“Na tahuna iea, e Moses ni poda. I mata kamumu hateka na matana Vure. Na keva i tolu e tamana e kinana ru matakaria.

²¹Muri ru ru polovavoa, lakea e tune Parao a ngatavine i bolea, i paua ge tuna.