Aposel 7:1-21

¹Ano pris tinan ndremenya Stiben anya, “Ou amekes iri lakou doh, handru?”

²Ya, eme Stiben asumon anya, “Wurah lomada ado nadu tine, ma hawe ado tama, ado kanuhun jo! Kindrei badu bolo lomadan mene asahan hawe tubu taha Abraham na len iy mene manyah udu Mesopotemiya mwena, ano iy barala baramanyah barado Haran.

³Eme Kindrei tiye i ta Abraham anya, ‘Ou ruwani kon tinan tam hawe ou ruwani iri lau tam, ya ou adek au ala kon kameh jo leheya i tam.’

⁴“Eme ma iy ruwani kon munyak Kaldiya, iy eme badeh, manyah udu Haran. Iy udu gwek winiya taman imek, ano Kindrei suni iy ili manyah udu kon ado areu aliy dah.

⁵Ma iy badeh, badeu se ranah munyak bala tan bwe. Arile, Kindrei badeh, tandrakan iy hawe lundriyen oro kameh, iy kameh edeu munyak i tan ma hawe lundriyen oro asahan hamon. Na len Kindrei tandrakan doh badeh, Abraham ari nadun bwe le.

⁶Ya eme Kindrei asehek sahou i ta Abraham i buku doh: ‘Lundriyem oro kameh manyah are kon munyak toro amwenen bwe, ma idah kameh, oro asahan bonyo-ou, winiya jaha ma hanek (400). Ma iri lau ta atondrok oro kameh amekes ndra-in i toro.

⁷Ano, jo kameh edeu maha i la-u iri kon munyak nane adeu oro a bonyo-ou, ma jo kameh kuhi oro ame hamon ame kon dah atudun jo ja.’

⁸Ano, Kindrei amekes sahou randra le ta nyala asan ku-i lau i ta Abraham. Eme Abraham asahan tama Aisik, ma tinen atehei iy eme len ano. Len tan asahan ndru la-uh badeh, taman Abraham sani ku-in. Ano Aisik badeh, atehei Jekop, ya Jekop asahan tama tubu taha oro ma ronoh la-uh.

⁹“Eme nadu tine Josep oro ma ronoh ari badeh, mada oro alikis iy, ma oro atehei iy i ta sisih i buku bonyo-ou ili Ijip. Arile, Kindrei udu hawen,

¹⁰ma sebenei iy ta bolo maha-an mari. Eme iy atehei budon mwasin i ta Josep ma mesekei iy asahan mwasin, mesekei Parou, kabin badu Ijip sekesek. Eme ma iy mesekei Josep asahan tinan ta atondrok kon Ijip ma iri lakou badu bolo asiu ta kabin ale.

¹¹“Ano, kon mari badu bolo Ijip hawe Kenan badeh, nyamon bwe. Ma edeu maha-an tinan labai, ma tubu taha oro, ari madasan ta takaleh nyamon bwe.

¹²Ya, eme Jekop anuhun Ijip badeh, nyamon udu aliy, eme iy suni tubu taha oro ala selesen bwena op.

¹³Ano oro ala san lusan ja badeh, Josep baranyowonya, iy are lau handru barala ta nadu tinen oro ai. Ma Parou barala tanan nadu tine Josep oro ai.

¹⁴Ano hamon ta idoh badeh, Josep suni sahou i ta taman Jekop hawe lundriyen oro mari ma ndro tonoh limeh (75) kame.

¹⁵Ano Jekop hawe lundriyen oro mari au ala Ijip. Ya eme iy hawe tubu taha iri amak ado loboho doh.

¹⁶Ya a-eh iri mari badeh, a hamon ja ala Sekem ala lek mene Abraham sihine i ta nadu Hamor oro na luk rayah.

¹⁷“Eme ya suniya len Kindrei anya kamekes tandrakan tan i ta Abraham kasahan handru badeh, kane iri lau tataha ado Ijip i sola le gwek.

¹⁸Ya eme kabin ari asahan ja atondrok Ijip. Iy badeh, tanan Josep se bwe.

¹⁹Iy eme wendreyani iri lau tataha, ma amekes kandriyen ndra-in handru i ta tubu taha iri. Iy indrek iri badeh, kakeh nadu iri ma borolak le kamak ka-au.

²⁰“Na len doh badeh, tine Moses atehei iy eme len. Iy badeh, konen mwasin labai ma Kindrei aseken iy handru. Udu bolo bun ma taloh badeh, atondrok iy udu le asiu ta taman.

²¹Ano na len iri atehei iy eme manan badeh, nadu Parou badih bwese-ei iy eme loken ma nyowo-ei iy i nadun.