Menge Ininang 10:3-22

³Menge alas tris te meapon, doen kinità din ontò melowa. Migpekità diyà kandin se anghil te Timanem aw minikagi, “E Cornelio.”

⁴Timengteng si Cornelio pengkey ontò nepela. Timaba, kagi din, “Sir, eden lay se ibeg no ipeinang kanak?” Minikagi se anghil, “Dinineg te Timanem se pegtawal-tawal no kandin. Netegahan din heman se keido no diyà te menge Judiyo nelimahan. Neluba se Timanem.

⁵Nayan, sogò ka te otaw domoton te Jopa amon mangay ki Simon, se doma ngadan din si Pedro.

⁶Mig-ogpà sikandin medapag te dagat doton te balay te kesangay din si Simon biyasa eglanit te kindal te ayam-ayam.”

⁷Peg-olì te anghil doton te langit, tinawal i Cornelio se dowa sineligan din aw sebad sondalo egpenimanem aw egkeseligan din.

⁸Mig-indan kandan te kedita te neinang diyà kandin, aw insogò din dan domoton te Jopa.

⁹Keeldawan niyan te agpet den alas dosi, aw medapag den dan doton te Jopa, nenayit si Pedro kidoen te atep te balay inogpaan din amon megtawal-tawal diyà te Timanem, so pantal se atep te balay sìyan.

¹⁰Binallos si Pedro aw ibeg din komaen. Meneng dalem te wedà pa kelegà se kànen, doen impekità te Timanem diyà kandin.

¹¹Kinità din se langit neowang. Doen migpedanà diyà kandin iling te dakel bekas intonton lekat te langit aw inewidan diyà te epat dogong.

¹²Awop niyan se ontò medita kemolò te menenanap aw ayam-ayam aw manok.

¹³Doen minikagi diyà ki Pedro lekat te langit, “E Pedro, pengiyaw ka amon doen iotan nikaw.”

¹⁴Meneng timaba si Pedro, “Sir, eked a kaen kenyan so eked a làpang te punù ingkeliwat i Moises, sìyan gayed ko egtoloen.”

¹⁵Doen heman kagi todà dinineg din, “Ikà eg-ikagi te eked kepakay aw kànen, so minikagi se Timanem te mepakay iyan kànen.”

¹⁶Meketelo heman iyan keinang diyà kandin iling kenyan, aw penga niyan neengat se bekas doton te langit. Meneng wedad kinaen din.

¹⁷Mig-aneng-aneng si Pedro aw eden se kedegdagan te kinità din. Na, dalem niyan, mig-insà se menge otaw insogò i Cornelio aw kenan se balay i Simon. Telobo pa mig-aneng-aneng si Pedro, dimateng dan doton te lelebangan te balay inogpaan din. Kenà dan Judiyo.

¹⁸Timawal dan aw mig-insà aw sìyan se balay inogpaan i Simon, se doma ngadan din si Pedro.

¹⁹Dalem niyan te peg-aneng-aneng i Pedro te kinità din, minikagi se Espiritu Santo diyà kandin, “Na, tenà ka den, so doen telo otaw dimateng nengemahà kamno. Ikà egkulu te tomaking kandan, so insogò ko dan.”

²¹Penga niyan, timenà si Pedro aw mig-insà kandan, kagi din, “Siaken se otaw pinengemahà niyo. Eden lay se tod niyo kanak?”

²²Timaba dan, “Insogò kay te sebad serhinto si Cornelio olo te sebad gatos sondalo. Sikandin se otaw egpenimanem aw egtolò te Timanem, aw induyun sikandin te medita Judiyo. Doen anghil te Timanem migpunù kandin te ipeangay ka din amon megtoladà ka kandin.”