Apostolo 10:3-22

³Ma ba i da ra utul a pakana bung na ravian, i gire ra angelo kai God ta ra ninana i ruk tadav ia, ma i biti: Konelio!

⁴Ma Konelio i bobobe, ma i burburut, ma i tir ia ba: Luluai, i dave? Ma i biti: Kaum lavur niaring, ma kaum lavur vartabar dia vana urama, ma dia tur na aim ta ra mata i God.

⁵Ma go una tulue ra ura tutana ura Iope, upi dir a agur pa Simon, nina ba ra iangina bula Petero,

⁶i ki pire Simon, a tena malmal pal a bulumakau, a kubana ara ra valian.

⁷Ba ra angelo i tar tatike dari tana, i vana mulai. Ma Konelio i oro pa ra ura tultul ta ra kubana, ma tika na tena variru ta diat a tarai na vinarubu, dia toratorom vatikai tana;

⁸ma i ve dital ta go ra lavur magit, ma i tulue dital ura Iope.

⁹Ta ra bung namur ba dital vanavana, ma ba dital maravai ta ra pia na pal, Petero i vana urama ra ul a pal, upi na araring, ta ra keke tur,

¹⁰ma i mulmulum, i mainge upi na ian; ma ba di vaninare ana magit, i ririvon;

¹¹i gire ra bakut i tapre, ma tika na mangamangana da ra ngala na mal di kubue vake ra ivat na nguna,

¹²ma mangoro na mangamangana leing tana, ta umana a ivat na kak i diat, ta ra umana dia kakakao ra pia, ma ra umana beo bula dia purpururung liuliu.

¹³Ma ra nilai tikai i tadav ia dari: Petero, una tut, una dodoko, ma una ian.

¹⁴Ma Petero i biti: Luluai, pata, pa iau ga en ta magit vakuku, ba ra duruna.

¹⁵Ma ra nilaina i tadav ia mulai dari: Nina ba God i ga vagomgom ia, koko una vatang ia ba ra magit vakuku.

¹⁶Ma di vautul a pait ia, ma di al lulut pa ia mulai urama ra bala na bakut.

¹⁷Ba i purpuruan boko ra nuknuk i Petero upi ra kukurai go ra ninana, ra utul a tutana, Konelio i ga tulue dital, dital ga titir upi ra kuba i Simon, ma dital tur pire ra mataniolo.

¹⁸Ma dital oraoro, ma dital titir ba Simon, nina ba ra iangina bula Petero, i ki ati.

¹⁹Ba Petero i nuknuk boko ta ra ninana, a Tulungen i biti tana dari: Una gire ra utul a tutana, dital nuk up u.

²⁰Una tut, ma una irop, una nurnur, avat a varagur, tago iau ga tulue dital uti.

²¹Petero i irop tadav dital ma i biti: Gire, iau go nina ba amutal nuk upi ia; ta ra ava amutal ga vana uti?

²²Dital biti: Konelio, a luluai, a tena takodo, i ruru God ma ra tarai par Iudaia dia varvai tana ba ra bo na tutana: God i ga tulue kana gomgom na angelo tadav ia, ma i ga ve kapi ia ba na tulue amital tadav u ta go ra pal, upi na valongore kaum ta tinata.