Mbouŋ to Yes Israela 28:2-7

²Aazne, you nakaak nimag iza iŋarua rumai tiom lolo to patabuaŋ kat, ve nataŋ roran ghom pa ulaaŋ. Ulooŋ taŋiiz tiou tonene, ve lolom isamin ghou. Pasa, you mbesooŋa tiom.

³Sawa to yom ughur atia pa ndiran samsamia, uweu ghou nala toman di malep. Yes to tinoknok ghamuuŋ sosor, nalaleg toman di malep. Ndiran tonowen tisasavia saveeŋ poia pa nditadi tighaze lolodi padi. Eemoghon ŋgar to ineep ila lolodi, nene ite. Tighaze tiwaghamun di.

⁴Yes tikaria ghamuuŋ sosor wa. Tovenen ughur atia padi, ve uŋgal matadi. Leso uyat ŋgar todi samia tonowen. Ugham tovene, ghoro deŋia. Pasa, ŋgar to tighamghami, poia maau.

⁵Uraat tintina to Yoova nima ighamgham di, yes tigham ŋgar pani maau. Tovenen ye pale ireu mbirisan di ve tilaledi kat, tinimale ruum to tireu mbirisani, ve irau tireii muul maau.

⁶You napait Yoova pa poia toni. Pasa, you nataŋ rorani pa iuul ghou, ve ilooŋ taŋiiz tiou.

⁷You naghamgham tapirig ila to Yoova, ve ye inim sigeu payou. You naghur ila toni ariaŋa ila lolog, ve iuluul ghou. Tovenen lolog poia le poia kat, ve napait iza pa poia toni ila mbouŋ.