Mbouŋ to Yes Israela 148:1-9

¹Aleluia, tapait Yoova! Yam to sambam, apait Yoova! Yam to aneep sala kat, apaiti!

²Yam aŋela toni asob apaiti! Ve yam ndaaba to sambam paam, asob apaiti!

³Ndag ve kaiyo, apaiti! Ve yam pitum to araŋ ila sambam paroŋania ne paam, apaiti.

⁴Sambam to ineep sala le sala kat, upaiti! Ve ya to ineep sala ne paam, upaiti!

⁵Mbeb tonowen tisob tipait Yoova iza, ghoro poia. Pasa, ye isaav, ve yes tivot titaghon ye aliŋa.

⁶Ye ighur di tineep ila inadi inadi, leso tineep tonowe itaghoni taghoni gha ila. Saveeŋ to ye isavia iŋarua di, ineep pataghaaŋ. Irau tizoora maau.

⁷Yam mbeb to aneep izi taan, apait Yoova! Ve yam mbeb to te lolo to tapirimim tintina ve aneep ila mazovan ne paam, apaiti!

⁸Lalaav waro, toman ais, waam, ve yaghur uti to avotvot itaghon Yoova aliŋa, yam asob apaiti!

⁹Yam lolooz ve ndug mbuŋa, ve yam mbaaŋ to anoŋamim popoia, ve ai to su paam, asob apaiti!