Mbouŋ to Yes Israela 143:4-11

⁴Tovenen lolog ipataŋan, ve matughezaaŋ igham ghou, le tapirig isob. Pasa, leg ataam eta muul maau.

⁵Tauto matag iŋgal imuul ila pa mbeb to muuŋ tivot. You naghamgham ŋgar pa uraat tintina naol to yom ugham di pa nimam.

⁶Ve nakaak nimag iza ve nasuŋ payom. You lolog payom kat, nanimale ŋgeu to ilaghlaagh ila ndug to le ya maau, ve murun matini.

⁷O Yoova, ulooŋ suŋuuŋ tiou tonene, ve uul ghou rikia. Pasa, lolog ipataŋan, ve tapirig isob kat. Uŋgooz matam payou malep. Matam inim payou lak! Pa vene namaat ve nala naneep ila mateeŋa ndug todi.

⁸Yoova, you nanumeer ghom. You naghaze mboŋmaagh nalooŋ ghom usaav payou ughaze: “You lolog ineep tuŋia ilat tiom.” Upatooŋ ghou pa ataam to yom ughaze nataghoni. Pasa, you lolog payom, ve naghur matag payom pa uul ghou.

⁹Yoova, you nayooŋ ilat tiom, leso naneep pooi. Ugham mulin ghou ila koiagŋa nimadi.

¹⁰Yom moghon to Maaron tiou. Upasaluŋgan ghou, leso nataghon katin ŋgar to lolom pani. Avuvum poia pale igham pooz payou. Leso laghooŋ tiou itaghon ataam deŋia.

¹¹Yoova, yom izam tiina pa poia tiom. Tovenen ugham mulin ghou leso naneep matag iyaryaar. Yom utaghon ŋgar deŋia. Tovenen upas ghou navot pa pataŋani tonene.