Sam 143:4-11

⁴Gua asa ke mabubulu sa maqomaqoqu; namu ele nunala sa maqomaqoqu.

⁵Lopu muliṉi ni rau sari na totoso pukerane. Balabala sisigiti i rau sari doduru gua pu ele evaṉi Goi. Balabala la i rau sari doduru Mua tinavete.

⁶Va sage i rau koa Goi sari na limaqu pa korapa vinaravara. Ta hivae hola si Goi koa rau. Kekeṉoṉo gua sa pepeso popana si hiva hola nia sa ruku, si na memeha Nigo sa maqomaqoqu.

⁷Kei Zihova, Mu tuturei olaṉa mae au, ura ele nunala hola si rau! Mu lopu va paere pule Nigo koa rau; be lopu gua si kote mate palae si rau pa popoa tadi na tie matedi.

⁸Maqu va avosia pana munumunu sa Mua tataru nabuna, ura koa Goi mo si kalavarae rau. Mu va dogoro nau sa siraṉa sapu garo pude la ia rau, ura koa Goi mo si varavara atu rau pa doduru qua tinoa.

⁹Kei Zihova, Mu va sare au koari na qua kana, ura koa Goi mo si govete atu rau pude aqorae.

¹⁰Mu va tumatumae nau gua pude evaṉia sa Mua hiniva, ura Agoi mo sa qua Tamasa! Sa Maqomaqo leana Tamugoi si mani turaṉau pa siraṉa vasina kaqu tava sare nia rau.

¹¹Koa gua sa guguamu Goi, Kei Zihova, Mu va sare au gua sapu ele va tatara nia Goi. Pa korapa Mua tinoṉoto si Mu va sare au pa tinasuna.