Mbouŋ To Yes Israela 142:1-6

¹Mbouŋ to David Mbouŋ tane iŋarui saawe tau David iyooŋ ila maet puura loolo Yau nataŋ rarai Yoova toman aliŋag tiina. Taŋiiz tsiau iŋaruini naghe loolo isaghatin ghau ve iuul ghau. Pasaa, yau besooŋa tooni.

²Yau navotia pataŋani tsiau ila pani. Gabua tau igham ghau lolog isaghat, ene nasavia pani.

³Isaav ighe lolog ipataŋan kat ve tapirig imbool, ene yo uwatagh lepoghag wa. Eez tau yau nataghoni, ene koiagŋa tighur liis toozi ila wa.

⁴Matag izi pa zigeg, eemon naghita eta to iuul ghau mako. Ve leg nugh eta to yoŋgaaŋ mako. Ve tamtamon eta maata iŋgal ghau mako paam.

⁵Yoova, yau nataŋ rarai ghom pa uleeŋ. Ve nanumeer ghom naghe yo ta umin niag to yoŋgaaŋ. Saawe tau naleep izi taan, yau naleep ilat tsio imin taan poia ee tau tipuli payau to naleep ila. Irau nambool pa gabua eta mako.

⁶Ughur taliŋam pa taŋiiz tsiau tane. Pasaa, aazne pataŋani itatan ghau kat. Koiagŋa tau tighurghur pataŋani payau na, tapirizi iliiv ghau kat. Tauvene ugham mulin ghau ila nimazi.