Mboe 29:2-11

²Kapakur Yooba, pa ni zaana biibi kat. Kuurpe ituyom ma kewe potomŋoyom, mi kelek kumbuyom pini. Pa ni potomŋana mi ndabokŋana kat.

³Yooba kalŋaana na, mburaana biibi. Mi ila irao tai pakaana ta boozomen. Lolo ta iwenweene i, ina Anutu zaanaŋana kalŋaana tau. Tana Yooba mburaana biibi kat. Ilip pa tai.

⁴Yooba kalŋaana na, mburaanaŋana. Tana iswe i kembei ni ta biibi ŋonoono.

⁵Yooba kalŋaana irao ipetepaala ke bibip. Ikamam ma ke mbolmbolŋan ki Lebanon tomini, tiwolol mi tisu.

⁶Kalŋaana irao itok abal biibi ki Lebanon ma ilu i kembei makau lutun popoŋan tilulu zin i. Mi itok abal Hermon ma ilu i kembei bapalo saŋsaŋŋan lutun bizin.

⁷Yooba kalŋaana ikamam ma lolo iwenweene. Ikamam ma you imaŋgaŋga.

⁸Mi ikamam ma lele bilimŋana imurur. Ikamam ma lele bilimŋana ki Kades ilala ma imarmar.

⁹Yooba kalŋaana ikamam ma buzur saŋsaŋŋan ta koponŋan i, timorsop mi tipepeebe sorok ma tisu. Mi ikamam ma ke runrun ta boozomen titoptop. Tana wal boozomen ta timbotmbot lela Urum Merere na, kalŋan izalla ma tizzo: “Tapakur Yooba! Pa ni zaana mi mburaana biibi kat!”

¹⁰Muŋgu indeeŋe nonor biibi na, Yooba imbutul se muriini mi ikamam peeze. Mi koozi tomini, ni king biibi ŋonoono. Peeze kini ko imbotmbot ma alok.

¹¹Yooba ikamam mburaana pa wal kini. Mi ikampewe zin mi mataana pizin ma timbot ambai.