SALMOS 29:2-11

²Xijhueyichihuaca TOTECO ipampa ihueyitilis, pampa ya nopa quinamiqui para yajaya tlen tlahuel hueyi. Xijhueyichihuatij TOTECO tlen itztoc campa tlahuel tlayejyectzi huan tlatzejtzeloltic.

³Quema TOTECO camati, caquisti queja tlatomonilotl tlen chicahuac ipan hueyi atl. Itos Toteco Dios tlen itztoc ipan elhuicac caquisti queja tlatomoni ipan elhuicac tlahuel chicahuac. Quena, TOTECO itos monanquilía iixpa nopa hueyi atl ica nochi ihueyitilis.

⁴Itos TOTECO quipiya chicahualistli. Quena, itos quipiya tlahuel miyac chicahualistli.

⁵Itos tlahuel temajmati huan quema TOTECO camati, quichihua para ma ixtzayanica tiocuatini. Quena, Toteco quintlapana nochi tiocuatini ipan tlali Líbano.

⁶Quichihua ma huihuipicaca nochi cuatitlamitl ipan tlaltini Líbano huan Sirión. Quinchihuilía nopa cuatini ma molinica queja piltorojtzitzi huan pilhuacaxtzitzi tlen huitontehuaj.

⁷Quema TOTECO camati, quimajcahua tlilelemectli.

⁸Quema TOTECO camati, huihuipica nochi huactoc tlali. Quena, hasta quichihua para ma huihuipica nopa huactoc tlali Cades.

⁹Quema TOTECO quiijtohua para oncas tlatomonilotl, huajca quichihua ma ixtzayanica nopa ahua cuatini huan quicahua tlapepestic ipan cuatitlamitl. Ipan ichaj nepa elhuicac nochi quihueyichihuaj huan quiijtohuaj: “Nelpano yejyectzi mohueyitilis.”

¹⁰TOTECO tlanahuatiyaya quema oncac nopa tlahuel miyac atl tlen momanqui ipan nochi tlaltepactli. Huan TOTECO noja tlanahuatía huan tlanahuatis para nochipa.

¹¹TOTECO quinmaca chicahualistli nochi itlacajhua. Quena, TOTECO quintiochihua huan quinmaca tlasejseltili ipan ininyolo.