Matiu 21

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Jerusale kuma emeri tupa hute'za Betfage kumate ehnati'za, Olivi agonare emanine'za, Jisasi'a amage nentaza disaipol nagapinti tare'mokizni huznanteno,

²anage huno znasmi'ne, hantka'a vutna antu kumate ome kesakeno, a' donki afura, anenta'ane kina rentenenigeno mni'neakitna ome kegaha'e. Kina katufetna znavreta Nagrite e'o.

³Avreta ne-esnakeno mago'moma kema hina, eri'za me'negeno Ramo hurantegeta enevro'e hutna hi'o. Anagema hanankeno'a, ko avretna vi'o hugahie.

⁴Amazama fore hu'neana korapa avontafepi kasnampa vahe'mo hunte'nea, kemo eama hu'ne.

⁵Saioni mofara anage hunka asmio, ko, kagri kinimo'ma kagritega ne-eanki, avufa anteramino, donki agumpi manino, ve agaho donkifi, ne-e. (Zek 9:9)

⁶Amage nenta'za disaipol nagapinti vu'namoke Jisasi kema huznante'neaza hu'na'e.

⁷Ana a' donkine, anenta'ane znavre'ne eke anakre kuzni'a zafike ana donki agumpi vasi'nakeno, Jisasi'a ana agofetu mrerino mani'ne.

⁸Manino nevige'za rama'a veamo'za anakre ku'zmi zafiza kante vasi'za nevzage'za, mago'amo'za zafa azankuna akafri'za kampi vasinageno anante vu'ne.

⁹Rama'a vahe kote'za Agri avuga vu'naza vahe'zgane, henkama aza vahe'mo'za tusi muse nehu'za kezati'za, muse huntesune Deviti ne'mofavrea, agrira asomu hunto ramofo agifi ne-emofona, muse huta agi'a erintesga hunagamu atresune.

¹⁰Ana nehzageno Jisasi'ma, Jerusale kuma agu'afi uhnatige'za mika veamo'za antri nehu'za muse hu'za, Ama nera iza'e?

¹¹Ana vahe kevumo'za hu'za, Ama'i kasnampa ne' Jisasi'e, Nasareti kumateti, Galili kazigati e'nea nere.

¹²Jisasi'a mono nomofo agu'afi ufreno maka zgore netre'za miza neseza nehza vahe'zga zmahe anatige'za fegi'a atirami'naze. Hagi zgo rezahe nehza vahe sipa eri herafi netreno, mizante maho nma zga ante'naza vahe tra'zmi eri rukrahe hutre'ne.

¹³Jisasi'a anage huno zmasmi'ne, Anumzamofo avontafepima kre'nazana, nagri nona Anumzamofonte nunamu hunte no megahie hu'ne. Hianagi tamagra kumzafa vahe frakiza mnisnaza kuma retro nehaze. (Aisa 56:7)

¹⁴Ana hige'za zmuraga asu hu'nea vahe'ene, zmaga haviza hu'nea vahe'mo'za Agrite ra mono nompi ageno zmazeri so'e huzmante'ne.

¹⁵Hianagi pris vahe'ene kasegere ugagota hu'naza vahe'mo'za Jisasi'ma kaguvaza hiaza negazageno, mofavre ramimo'za ranke hu'za, Deviti Nemofo muse huntone hazazamo zamarimpa hege'za, Jisasinku anage hu'naze,

¹⁶Amama mofavre ramimo'zama nehza kea nentahino? Jisasi anage hu'ne, Ozo, tamagra mono avontafera hampritma onke'nazo, osi mofavrene, aminte mofavre mokizmi zmagipi, kagri rankagi kami'zana retro hunte'nane. (Sam-Zga 8:2)

¹⁷Jisasi anage huteno Jerusale rankumara atreno Betani kumate vuno, anante umse'ne.

¹⁸Jisasi'a nanterana otino ete Jerusale rankumatega vunaku nevuno aga'zanku hu'ne.

¹⁹Keana ka vutega magoke fiki zafa oti'negeno, Agra ana zafa tava'onte eno eme keana magore huno nena'a omneno ani'namoke hu'negeno, Agra ana zafagu huno,

²⁰Mago enena kagripina rga fore osugahie. Ana zafamo osapategeno amage nentaza disaipol nagamo'za nege'za zmanogu nehu'za antahige'naze. Nankna huno ama fiki zafamo'a ame huno osaparare?

²¹Hu'za hzageno, Jisasi'a anage huno kenona zmirera hu'ne, Tamage hu'na neramasmue, tamentinti nehutma tare tagufa tamagesa ontahisnutma, tamagra fiki zafa huntoa kna'zana ageteretma amne hzasine. Hianagi ama'na agonagu hutma, otinka hage rimpi tka'uro hanageno'a amne ana hugahie.

²²Hanki nazankuro kamentinti hunka, nunamu hunka antahigesanana, amne erigahane.

²³Jisasi'a ra mono nomofo kumate mrerino rempi hu'nezmige'za, pris vahemo'zane, Jiu kva vahe'mo'za Jisasinte e'za amanage hu'za antahige'naze, Ina hihamure ama eri'zana Kagra e'nerine, Aza ana hihamua Kagrira kami'ne?

²⁴Jisasi zamagri kenona huno, Nagra anazanke hu'na mago zanku tmantahigegahue, anazama Nagri'ma nasmisage'na, Nagra ina hihamufi ana eri'zana e'nerufi anazanke hu'na tmasmigahue.

²⁵Joni'ma mono ti frezmante'neana, iza'e agafa'a, monafintipi vahe'mo'za huntageno eri'ne? Hige'za ana vahe'mo'za nanekea nentahi'za agafa'agu naneke ohumi ahumi hu'za, tagrama huta, monafintire hanunkeno'a, Agra tagriku anage hugahie, hanki nahigetma agritera tamentintina nosaze? Huno hugahie.

²⁶Hianagi tagrama hutma, vahe'mo'za huntageno eri'ne hanunke'za, vahe'mo'za tahegahaze hu'za koro hu'naze. Na'ankure maka vahe'mo'za Joninkura kasnampa nere nehaze.

²⁷Nehu'za Jisasina ke nona'a hunte'za, Tagra ontahi'none hzageno, Agra anazanke huno zmasmi'ne, Nagranena igati eri'noa hihamufi eri'zana eneruo ontamasmigahue.

²⁸Hianagi tamagra na'ane tamagesa antahigahaze? Mago ne'mo'a tare ne'mofavre znante'ne. Pusa ne'te viazamo anage hu'ne, mofavre'nimoka menina vunka waini hozafi eri'za omerio hu'ne.

²⁹Ana mofavremo'a ke nona hunteno, Nagra ovugahue hutenoagi, henka agu'a zahe huno vu'ne.

³⁰Neznafa'a henka'mofonte viazamo anahu ke huno ome antahige'ne. Ana mofavremo ke nona huno, nagra ana hugahue hutenoagi, ovu'ne.

³¹Taremokiznifintira inamo nefa avesizana avaririne? Zamagra hu'za Pusante'mo'e, hzageno Jisasi anage huno, Nagra tamage neramasmue, zgoma vahepinti zonegiza vahe'ene, monkote'ma nehaza vahe'mo'za tmagrira tmagatere'za Anumzamofo kumapina vugahaze.

³²Na'ankure Jonima tmagritega e'neana fatgo avu'ava huramerinaku e'negetma, tamagra agritera tamentinti osu'naze. Hianagi, vahepinti zgo zogi vahe'mo'zane, monko vahe'mo'za agritera zmentinti hu'naze. Hagi tamagra ma ana zana negetmagi, tamagu'a rukrahe hutma tamentinti huonte'naze.

³³Mago fronka kea antahiho. Mago mopa agafa ne'mo'a waini hoza kri'ne. Ana hoza kegina huno wainima tatisia keria asenteteno, hagi mni'neno kvahu nona kintene. Zoka mni'neno ikante zgo mizaseterehu (rent) vahete hoza'a netreno afete ka vu'ne.

³⁴Hozama anarere knama egoftama higeno'a, kazokzo eri'za vahe'a huzmantege'za, agri'ma refako hu'za amisnazama'a erisnagu kegva hu'ne'za ikante mizama (rent) nezamiza nagate e'naze.

³⁵Ana hianagi, anama kegvama hu'naza nagamo'za zmarotago hu'za, magora knonkeve nemi'za, magora ahe nefri'za, magora have kanonu ahe'naze.

³⁶Mago'ane kazokzo eri'za vahera pusante'ma huzmante'neama'a agatereno hakare huzmantege'za vazage'za, anazanke huzmante'naze.

³⁷Henkarfana, ne' mofavreni'a agazone humigahaze nehuno mofavre'a huntegeno vu'ne.

³⁸Hagi ana hoza ikante kva hu'ne'za miza nesaza vahe'mo'za, kageno nemofo'ma ege'za, ama fenoma erisia mofavre ama eanki erinketa ahenefrita ana fenona erigahune.

³⁹Anage hute'za, ana waini hozafinti avazuhu fegu atre'za ahe fri'naze.

⁴⁰Hagi anantema waini hozamofo nfa'amo'ma esuno'a, hozama kegvama hu'naza vahera, na'a huzmantegahie?

⁴¹Agrira anage hu'za asmi'naze, Agra havi avu'ava hanaza vahera zmazeri havizahutfa hugahie. Huteno ana waeni hoza zmazampinti hanare'mreno, hoza kegva hu'ne'za hoza anerere knare, agrama erigahue hu'nesiama'ama amisaza vahe zamigahie hu'naze.

⁴²Jisasi'a anage huno zmasmi'ne, Anumzamofo avontafepina tamagra hampritma nonkazo? Nogi vahe'mo'za knare osu'ne hu'za eritre'naza havemo'a, nomofo renagentete asente'nageno azeri hanaveti have menina fore nehie. Ama'i Anumzamo tro hu'neankino, tvurera so'e zantfa fore nehie. (Sam-Zga 118:22-23)

⁴³Ama ana agafare, Nagra kea tmagrira tamasmina, Anumzamofo kumara tmagripintira hanareno, iza'zo Anumzamofo kuma'mofo nena rgama renentesnamokizmi zamigahie.

⁴⁴Hagi mago'mo'ma amana havere'ma asaga hurmisimo'a, korino rupanini hugahie. Hianagi ana havemo'ma inamofo agofeturo asagahu ramisimo'a fuzafupeno kugupa segahie.

⁴⁵Hige'za ugagota prisi vahe'mo'zane, Farisi vahe'mo'za ana fronka kema hia nentahiza, zamagra antahi'za zmifina, tagriku nehie hu'za hu'naze.

⁴⁶Jisasina azerisaza kanku hakre'nazanagi, zamagra tusi'a vahe kevugu kore hu'naze. Na'ankure ana vahe kevumo'za, Agrikura kasnampa nere hu'za nehza'zankure.