Matiu 12:31-44

³¹Ra a watungi tamot lena, din unus ru a kum sakino petutna rop anun a taro, ma anundet a kum sakino wasiso kai un o God, ikut ra det in wasiso laulau una Tokodos na Nion ka din unus lar pasi.

³²Osi kai ra in watung tar tu sakino wasiso una Nutun a Musano, din unus ru i kut, ikut osi ra in wasiso laulau una Tokodos na Nion, ka din unus lar pasi, una nilaun uniri ma una nilaun numur kai.

³³“In wakak na duwai, i ser wu a wakak na wino, ma in laulau na duwai, i ser wu a laulau na wino. Din tama lele in nanai tagun a wino.

³⁴Mot a kum nutnutun a kum sui! Mot ra a laulau na taro, mot in watung petlan tu wakak na wasiso? Uni a wan a taro i watung puaso a petutna ra i bukus una nundet a nilaun.

³⁵A wakak na musano i ese anun a wakak na petutna tagun a wakakino ra i kis una nun a nilaun, ma a laulau na musano kai, i ese anun a sakino petutna tagun a sakino ra i kis una nun a nilaun.

³⁶A watungi tamot lena, a kum wasiso laulau rop ra a taro det sa watung tatari, kura numur din ting det uni una bung na warkurai.

³⁷Ra una bung ra, anum a wasiso ut in ulangolango pas ui, o in ban laulau ui.”

³⁸Numur ara taro tagun a kum tene ususer tagun a Warkurai ma a kum Parisi det watungi tano lena, “Tene Ususer, un pam tu ukinalong sur met in tama i.”

³⁹I balu det lena, “A taro tagun uniri, a sakino taro, anundet a nilaun i bakbak gusun o God. Det sasaring sur tu ukinalong, ikut ka din pam taio torom det. Din pam a ukinalong kut elar nami ra di sa pam tari un o Jona a poropet.

⁴⁰Uni o Jona i laun a tulu bung unin balan a labino kiripo, ma lenkutkai ra a Nutun a Musano in inep pas a tulu bung ubalan a piso.

⁴¹Una bung na warkurai, a taro Niniwe det in tur ma det in takun dekdek a taro tagun uniri, uni det nukpukus una warawai anun o Jona, ma o naro ra i labo taun o Jona kuri ut nin, ikut ka mot longoro i.

⁴²Una bung na warkurai, a kwin tagitong una matmatano tobar in tur ma in takun dekdek a taro tagun uniri, uni i wan ut tagitiro bakbak sur in longoro a mananos anun o king Solomon, ma o naro ra i labo taun o Solomon kuri ut nin, ikut ka mot longoro i.

⁴³“Ra tu laulau na nion in pirso pas gusun tu musano, in nan una kum nubual ra kalako danim iai, sur in mana, ikut ken sio pas tu nubual sur in mana uni.

⁴⁴Ra in watungi lena, ‘An milet melet sur anung a rumu, ra a sa pirso pas gusuni.’ Ra in nanpat, in tama i ra i sa belbel, di sa surupu tari, ma di sa ukodos tari.