مَتِيُ 12:31-44

³¹نَ نَن عَ تٌشِ، ﭑ شَ عَ قَلَ وٌ بّ، عَدَ مَدِيٍ شَ يُنُبِيٍ نُن مَرَ سْتْييٍ بِرِن نْمَ نّ شَقَرِدٍ، كْنْ عَلَ شَشِلِ رَ سْتْقٍ تَن مُ شَقَرِ مَ مِشِ بّ مُكُ.

³²مِشِ نَ عَدَ مَ شَ دِ رَ سْتْ، نَ يُنُبِ نْمَ نّ شَقَرِدٍ عَ كَنيِ بّ. كْنْ مِشِ نَ عَلَ شَشِلِ سّنِيّنشِ رَ سْتْ، نَ يُنُبِ مُ نْمَ شَقَرِدٍ نَ كَنيِ بّ دُنِحَ، عَ مُ نْمَ شَقَرِدٍ عَلِفِيَمَ.»

³³«شَ سَنسِ قِندِ عَ قَنيِ نَن نَ، عَ بٌفِ قَنيِ نَن نَمِنِمَ. شَ سَنسِ قِندِ عَ كٌبِ نَن نَ، عَ بٌفِ كٌبِ نَن نَمِنِمَ. سَنسِ كٌلٌنمَ عَ بٌفِ نَن مَ.

³⁴وٌ تَن بْشِمَسٍ بْنسْي، وٌ مُ نْمَ وْيّن قَنيِ قَلَدٍ، بَرِ مَ وٌ بْحّ كٌبِ. مِشِ بْحّ رَقٍشِ نَشَن نَ، نَ نَن مِنِمَ عَ دّ عِ.

³⁵قٍ قَنيِ تٌ رَفَتَشِ مِشِ قَنيِ بْحّ كُي، عَ قٍ قَنيِ نَن نَمِنِمَ. قٍ كٌبِ تٌ رَفَتَشِ مِشِ كٌبِ بْحّ كُي، عَ قٍ كٌبِ نَن نَمِنِمَ.

³⁶ﭑ شَ عَ قَلَ وٌ بّ، كِيتِسَ لْشْي، عَدَ مَدِيٍ دّنتّفّ سَمَ نّ وْيّن كٌبِ بِرِن مَ نَشٍيٍ مِنِ عٍ دّ عِ.

³⁷عِ وْيّنيِ نَشَن قَلَمَ دُنِحّءِفِرِ كُي، نَ نَن كِيتِ قَنمَ عِ رَ، نَ نَن كِيتِ كَنَمَ عِ رَ.»

³⁸نَ شَنبِ، سّرِيّ كَرَ مْشْيٍ نُن قَرِ سّنِيٍ نَشَ وْيّنيِ تٌنفٌ، عٍ عَ قَلَ عِسَ بّ، «كَرَ مْشْ، مُشُ وَ مَ عِ شَ كَابَنَكٌ ندٍ تٌقٍ، عَ شَ قِندِ تْنشُمَ رَ مُشُ بّ.»

³⁹عِسَ نَشَ عٍ يَابِ، «تٌ مِشِيٍ كٌبِ، عٍ بَرَ فبِلٍن عَلَ قْشْ رَ. عٍ وَ مَ تْنشُمَ مَكَابَشِ تٌقٍ، كْنْ تْنشُمَ يٌ مُ قِمَ عٍ مَ بَقٍ عَننَبِ يُنُسَ شَ تْنشُمَ رَ.

⁴⁰عَننَبِ يُنُسَ شِ سَشَن، كْي سَشَن نَدَنفِ يّشّ شُنفبٍ قُرِ كُي كِ نَشّ، عَدَ مَ شَ دِ قَن شِ سَشَن، كْي سَشَن نَدَنفِمَ نَ كِ نّ بْشِ بُن مَ.

⁴¹كِيتِ لْشْي، نِنٍوٍكَيٍ تِمَ نّ عٍ نُن تٌ مِشِيٍ، عٍ سٍيدٍحْشْيَ بَ وٌ شِلِ مَ، بَرِ مَ عٍ تَن تُوبِ نّ عَننَبِ يُنُسَ شَ كَوَندِ سَابُي رَ، عَ قَ لِ نَشَن نَ وٌ يِرٍ يِ كِ بٍ، عَ تِدٍ فبٌ عَننَبِ يُنُسَ بّ.

⁴²كِيتِ لْشْي، سٍيبَ مَنفّ فِنّ قَن تِمَ نّ عٍ نُن تٌ مِشِيٍ، عَ سٍيدٍحْشْيَ بَ وٌ شِلِ مَ، بَرِ مَ عَ تَن قَ نّ كٍلِقٍ يِرٍ مَكُيٍ سُلٍمَنِ شَ لْننِ رَ مّدٍ، عَ قَ لِ نَشَن نَ وٌ يِرٍ يِ كِ بٍ، عَ تِدٍ فبٌ سُلٍمَنِ بّ.»

⁴³«حِننّ نَ فبِلٍن مِشِ قْشْ رَ، عَ سِفَمَ يِرٍ مَشَرٍ نّ لِنفِرَ فبّتّ قٍندٍ، كْنْ عَ مُ عَ تٌمَ.

⁴⁴نَ تّمُي عَ عَ قَلَمَ عَ يّتّ بّ، ‹ﭑ شَ فبِلٍن ﭑ مَ بَنشِ كُي ﭑ كٍلِشِ دّننَشّ.› عَ نَ فبِلٍن مّننِ عَ عَ لِمَ نّ نَ بَنشِ مَكْشِ، عَ رَشُنمَشِ عَ قَنيِ رَ، حِننّ فبّتّ يٌ مُ نَ.