Mateos 10:19-31

¹⁹Tehuu maneniko ara hela roo emi leoꞌ na, sona bosoꞌ biiꞌ mae, ‘Neuꞌ ko au dedea ae, leoꞌ bea?’ Do, ‘Neuꞌ ko au ataa ae, ubeaꞌ?’ Bosoꞌ dale mara dodaꞌ, huu fo losa ledo-fai na, te neuꞌ ko emi Amam nai nusatetu-ikutemaꞌ a riꞌ nafada emi muste dedea mae leoꞌ bea.

²⁰Hata fo emi dedean ta naoka-nasamu neme emi mai fa, huu fo Ria Dula-dale Malalao-malalafu Na riꞌ nanori-nafada, ela emi bisa dedea mae leoꞌ bea.

²¹Emi mete fa, nai uma esa daleꞌ, maneniko lahenda namahere Au, neuꞌ ko ria toranoo boki na riꞌ saka enoꞌ fo ela lahenda fekeꞌ naisa toranoon ria. Maneniko anaꞌ a namahere, neuꞌ ko papa na riꞌ naisa ni. Maneniko ina-ama ramahere, neuꞌ ko sira ana boki na riꞌ naisa si.

²²Meten fa, neuꞌ ko basa lahenda eteꞌ ao nara ro emi, nana huu emi tuka Au. Tehuu lahenda fo nanenete losaꞌ babasa na, neuꞌ ko Manetualain poꞌi-tata naan.

²³Maneniko lahenda ese-rumu emi nai kota esa, sona malai leo kota fekeꞌ meu. Tebe ria! Au ia, Ana Lahenda. Neuꞌ ko emi bei ta laꞌo rule-feo mabasa kota nai Israel, tehuu Au atafali mai so.

²⁴Lahenda ra biasa fee hada-horomata neuꞌ mesen esa, lena neme ria ana sakola nara. Ma lahenda fee hada-horomata neuꞌ malaka esa, lena neme ria ata nara.

²⁵Maneniko ana sakola a nanori de malela na sama no ria mesen na, sona ana nameda naan dai so. Ma kalu ata a nanori, de malela na sama no ria malaka na, sona ana nameda naan dai so boe. De, mafarereneꞌ. Maneniko lahenda naloo manuu umaꞌ a nae, ‘O ia, nana Balsebul, fo riꞌ nitu ra malaka na!’ Sona tantu ria uma isi nara boe hapu nade tadaluꞌ lena bali.”

²⁶“De, emi bosoꞌ bii lahenda fo soaꞌ emi. Te hata fo lahenda tao nafufuniꞌ, neuꞌ ko basa lahenda ra rita.

²⁷Hata fo Au anori-afadan noi neuꞌ emi, neuꞌ ko emi muste meu mafada basa lahenda ra. Ma hata fo Au afada oi abobotoꞌ a, neuꞌ ko emi muste meu mafada rule-feo nai basa mamanaꞌ.

²⁸Bosoꞌ bii lahenda, huu fo sira bisa raisa noi lahenda ao-ina na, tehuu ara ta bisa raisa lahenda sumane na. Huu ria na, emi muste biiꞌ Manetualain, te noi Ria riꞌ nanuu kuasa fo tuꞌu heni lahenda ao-ina na no sumane na leo tasi ai-pila mana mate taaꞌ a daleꞌ neu.

²⁹De matetea dale mara. Lahenda seꞌo manupui karutuꞌ nai pasar neniꞌ beliꞌ bai anaꞌ. Tehuu ta mate esa boeꞌ, kalu emi Papa ma nai nusatetu-ikutemaꞌ a ta nataa fa.

³⁰Emi Papa ma nai nusatetu-ikutemaꞌ a boe relu-natanae emi losa leo lulutu-raraeꞌ a. Emi lakadoo mara dedesi na boe, Ana reke naa si so.

³¹De, emi bosoꞌ biiꞌ! Huu fo Manetualain uku-sudi emi beli ma lena neme basa manupui karutuꞌ sira mai.”