Mateo 6:5-25

⁵Entonces che e Jesús: —Conda ixixin icꞌajti taca e Dios, ira iche cocha uchiobꞌ e ajmajresiajobꞌ, porque jaxirobꞌ achpa awawanobꞌ tama inteꞌ sinagoga tuaꞌ ucꞌajtiobꞌ taca e Dios taca inteꞌ nuxi nuc, pero uchiobꞌ cocha era tuaꞌ taca atajttzꞌobꞌ umen e gente. Y bꞌan uchiobꞌ tama inteꞌ calle tama e chinam ubꞌan. Pero cꞌani iwareox era que tamar taca era cꞌapix uchꞌamiobꞌ tunor utuanibꞌirobꞌ.

⁶Pero net conda abꞌijnu tuaꞌ acꞌajti taca e Dios ira ache cocha uchiobꞌ e inmojr era, sino que ochen macuir oꞌtot y amaqui e puerta y abꞌajner cꞌajtin taca e Dios xeꞌ turu tacaret iraj iraj. Y tamar era Cadiosir xeꞌ war uwira lo que war ache tzꞌustaca cꞌani uyajqꞌuet atuanibꞌir.

⁷Entonces conda war acꞌajti taca e Dios ira isutpa aware inteꞌ ojroner iraj iraj bꞌan cocha uchiobꞌ tin e machi unatobꞌ chi Cadiosir. Porque jaxirobꞌ uchebꞌiobꞌ que más tuaꞌ oꞌbꞌnobꞌ umen e Dios umen e sian ojroner xeꞌ war uchiobꞌ cocha era.

⁸Ira iche ibꞌa cocha jaxirobꞌ, porque Catata Dios warix unata tunor lo que icꞌani conda ne mato icꞌajti tacar.

⁹Y tamar era nox ucꞌani tuaꞌ icꞌajti taca e Dios cocha era y che: Catata Dios xeꞌ turet tichan, catattzꞌi acꞌabꞌa xeꞌ erach.

¹⁰Lar tuaꞌ icꞌotori tara tor e rum wacchetaca. Y chen lo que acꞌani tara tor e rum bꞌan cocha war ache tichan tut e qꞌuin.

¹¹Ajcꞌunon lo que ucꞌani tuaꞌ cacꞌuxi tama inteꞌ inteꞌ día.

¹²Cꞌumpen tacaron tamar camabꞌambꞌanir lo que cay cache toit net, bꞌan cocha war cacꞌumpa taca tin e cay uchiobꞌ e mabꞌambꞌanir capater ubꞌan.

¹³Ira awacton tuaꞌ capijchna sino que corpeson tama tunor ucꞌotorer e diablo. Porque net jax Careyet, y net ayan meyra acꞌotorer, y net ayan meyra atawarer xeꞌ machi tuaꞌ acꞌapa. Amén.

¹⁴’Porque jay nox war ixcꞌumpa taca tin e war uche e mabꞌambꞌanir ipater, entonces Catata Dios xeꞌ turu tichan axin acꞌumpa tacarox ubꞌan.

¹⁵Pero jay machi cꞌani ixcꞌumpa taca tin e war uchiobꞌ e mabꞌambꞌanir ipater, entonces Catata Dios machix tuaꞌ acꞌumpa tacarox tama e mabꞌambꞌanir lo que cay iche nox ubꞌan, che e Jesús.

¹⁶Entonces che e Jesús: —Y conda machi war ixweꞌ tuaꞌ icꞌajti taca e Dios ira iche iwirnar que tzajtaquix iut, porque bꞌan uchiobꞌ e ajmajresiajobꞌ. Pues jaxirobꞌ uchiobꞌ cocha era tuaꞌ anatanwa umen e gente que machi war awiobꞌ tuaꞌ atajttzꞌobꞌ umenerobꞌ. Pero nen cꞌani inwareox era que jaxirobꞌ cꞌapix uchꞌamiobꞌ tunor utuanibꞌirobꞌ umen que tajttzꞌobꞌix umen e gente.

¹⁷Pero net conda machi war iweꞌ tuaꞌ acꞌajti taca e Dios ucꞌani tuaꞌ uꞌstes ajor y ucꞌani tuaꞌ apoqui oit.

¹⁸Bꞌan tuaꞌ ache tuaꞌ machi aquetpa chequer tut e gente que machi war iweꞌ tuaꞌ acꞌajti taca e Dios. Jax taca Catata Dios xeꞌ turu tacaret xeꞌ tuaꞌ unata lo que war ache era, y tamar era jax jaxir xeꞌ tuaꞌ uyajqꞌuet atuanibꞌir, che e Jesús.

¹⁹Entonces che e Jesús: —Ira iturbꞌa ibꞌa tuaꞌ imorojse iturbꞌa meyra lo que ayan tara tor e rum xeꞌ atujri. Porque tunor era erer acꞌapa umen e max o erer axombꞌran ut o erer axujchna axin.

²⁰Sino que turbꞌanic ibꞌa tuaꞌ itꞌabꞌse iturbꞌa meyra lo que atujri tut e qꞌuin tichan tiaꞌ machi uyubꞌi oꞌchoy e max y nien machi axombꞌran ut y nien machi uyubꞌi tuaꞌ axujchna.

²¹Y bꞌan tuaꞌ iche porque tiaꞌ turu tunor lo que ayan tibꞌa, yajaꞌ ubꞌan tuaꞌ aquetpa iwalma, che e Jesús.

²²Entonces che e Jesús: —Unacꞌut inteꞌ aquetpa bꞌan cocha inteꞌ janchꞌaquenar tama ucuerpo, y jay imbꞌutz unacꞌut inteꞌ erer abꞌutcꞌa tunor ucuerpo taca e janchꞌaquenar. Y tamar era tin e axin uchꞌami niwojroner cꞌani aquetpa chequer tunor nicanseyaj tut ubꞌan.

²³Pero tin e ajmuac unacꞌut machi eꞌron, y bꞌan ubꞌan inteꞌ xeꞌ machi uchꞌami niwojroner porque cꞌani aquetpa mucur tunor nicanseyaj tut. Pues inteꞌ cocha era machi tuaꞌ uwira lo que erach sino que cꞌani aquetpa incsibꞌan tunor era tut, che e Jesús.

²⁴Entonces che e Jesús: —Inteꞌ man machi uyubꞌi apatna tut chateꞌ upatron, porque jay bꞌan uche entonces e man axin uxejbꞌe ut inteꞌ upatron y axin uyajta ut otronteꞌ. Mamajchi chi erer uturbꞌa ubꞌa tama e Dios y tama e tumin ubꞌan, che e Jesús.

²⁵Entonces che e Jesús: —Cꞌani inwareox era que ira iturbꞌa ibꞌa tuaꞌ ibꞌijnu y che: ¿Tucꞌa tuaꞌ incꞌuxi? y ¿tucꞌa tuaꞌ unchꞌi? Y nien machi tuaꞌ ibꞌijnu y che: ¿Tucꞌa tuaꞌ inlapi? Porque más atujri icuxtar que lo que war icꞌuxi, y más atujri icuerpo que lo que war ilapi.