Mateus 6:5-25

⁵“Te yu e begi, yu no mus de leki den hoigriman. Bika den lobi fu tnapu begi ini den kerki nanga tapu uku fu strati fu sma kan si den. Fu tru Mi e taigi un taki: Den kisi den pai kba.

⁶Ma te yu e begi, go na ini yu kamra èn tapu a doro. Dan yu e taki nanga yu P'pa di no wan sma e si. Ma yu P'pa di e si yu drape, sa pai yu.

⁷Te yu e begi yu no mus begi langabere begi leki den sma di no sabi Gado. Bika den e prakseri tak' te den begi langa, den o kisi san den e aksi.

⁸Yu no mus begi leki den, bika yu P'pa sabi san yu abi fanowdu fosi yu aksi En.

⁹Ma disi na a fasi fa yu mus begi: Wi P'pa di de na heimel, Yu nen mus de santa.

¹⁰Kon tiri wi, meki Yu wani psa na grontapu soleki fa a e psa na heimel.

¹¹Gi wi tide a nyanyan di wi abi fanowdu.

¹²Gi wi pardon fu wi sondu, soleki fa wi e gi trawan pardon di du wi wan sani.

¹³No meki tesi kon na wi pasi, ma kibri wi fu didibri. Bika na Yu na a Kownu, èn ala makti nanga ala glori na fu Yu, fu têgo. Amen.

¹⁴Bika efu yu e gi sma pardon di du yu wan sani, yu P'pa na heimel sa gi yu pardon tu.

¹⁵Ma efu yu no e gi sma pardon, yu P'pa no sa gi yu pardon tu.”

¹⁶Yesus taigi den moro fara taki: “Te yu e faste, yu no mus poti wan sari fesi leki den hoigriman. Bika den e masi den fesi soso fu sma kan si tak' den e faste. Fu tru Mi e taigi un taki: Den kisi den pai kba.

¹⁷Ma te yu e faste, yu mus wasi yu fesi èn yu mus kan yu wiwiri.

¹⁸Sma no abi fu sabi tak' yu e faste, ma soso yu P'pa di no wan sma e si. Dan yu P'pa di e si san yu e du na wan kibri fasi, sa pai yu.”

¹⁹“Yu no mus suku gudu dya na grontapu, pe kakalaka e nyan den, pe frustu e meki den pori gwe, èn pe fufuruman kan broko kon ini yu oso, fufuru den.

²⁰Ma meki yu gudu de na heimel, pe kakalaka no man nyan den, pe frustu no man meki den pori gwe, èn pe fufuruman no man broko kon ini yu oso, fufuru den.

²¹Bika pe yu gudu de, na drape yu ati o de tu.

²²Yu ai de leki wan lampu di e tyari leti gi yu skin. Efu yu ai krin, yu heri libi o krin.

²³Ma efu yu ai dungru, dan yu heri libi o dungru. Sobun, efu a sani di mus tyari leti kon gi yu, tyari dungru kon, a no spotu dungru yu libi sa dungru.

²⁴No wan sma kan wroko gi tu basi. Bika a sa hori a wan na ati, dan a lobi a trawan. Noso a sa lespeki a wan, ma a no teri a trawan. Yu no kan dini Gado makandra nanga den gudu fu grontapu.”

²⁵“Fu dat'ede Mi e taigi un taki: No broko yu ede nanga san yu o nyan noso dringi fu tan na libi, noso san yu o weri fu tapu a skin. A libi warti moro leki nyanyan, èn yu skin warti moro leki krosi.