Matyu 6:5-25

⁵Kem God rekene tuma namrete, kem tuma ok sirbo tame rem nenbokap kap nente. Rem God rekene namrebo, rem reri akek wuren teten ek namrebo. Yi yabo tatame rem remne labo, rem remri sig bukre webo. An kemne sekeneker webo. Rem op nenbo, et rem tokwo ab potkeipye, yuri rem sene be potte.

⁶Etopkap kem kap nente. Kem God rekene tuma namrete, kem ake purik wurten eru kite. Kem kemri lek be latene Apiy rekene namrete. Kemri Apiy God re kemri berasen wemetbo wos metbo, yuri re kemne tokwo sein newote tetane.

⁷Kem God rekene tuma namrete, kem tuma bop sou kap namrete. God rene be habobo tame rem op habobo. Nem tuma bukre sou sou namrete, God re nemri tuma mette.

⁸Kem remri nenbokap kap nente. Be wos kem merinbo, Apiy God re latene. Kemri yuri rene wemette wos God re mettene.

⁹Kem God rekene tuma namrete, kem op wete. Nemri Hevenke tetane Apiy, nem selbo, neri sig yenbowai tete.

¹⁰Nem selbo, ne kwom panen site. Neri kwom tame rem neri webo tuma etop nenbo. Opkap nem selbo, nem nowselri tatame nem kirkir etop nente.

¹¹Ne nemne gwotepteri awos newote.

¹²Tatame rem nemne yaper nenbo, nem remkene kelmenabo. Opkap neren mere, nemri yaper nenbokap ne serte. Ne sene kap habote.

¹³Ne nemne sou mane seilate. Satan re nemne kap keikerete. Neren kwom panen sibo. Neren kitimena bukrewai tetane. Neren hadebaswai. Et sekene. Kem Apiy God rekene tuma namrete, kem etop wete.

¹⁴Kem agerbo tatame rem kemne nenbo gwule kelmenate, keremri Hevenke tetane Ha eter mere, re kemri nenbo gwule serte.

¹⁵Kem agerbo tatame remri kemne nenbo gwule be kelmenate, kemri Hevenke tetane Ha eter mere, re keremri nenbo gwule be serte. Re som habobet.

¹⁶Kem God rekene tuma namren kem ok tuknate, kem bitmi kap girbuste. Agerbo tatame rem kap mette, kem awos pelebiteye. Yikokobo tame rem opkap bitmi tebo. Tatame rem remri bitmi labo, rem sanebo, rem awos pelebitebo. Opkap rem remri sig bukre webo. Opkap nenbo tame rem remri tokwo ab potkeipye. Yuri God re remne sene be newote.

¹⁷Kem awos pelebitete yabel kem kemri tare take wuran kem ok wiyen pi late. Et yenbo.

¹⁸Op nente, agerbo tatame rem be sanen op be wete. Kem awos pelebiteye. Nemri lek be latene Ha, eterwou re sanete. Nemri Apiy God re nemri berasen nenbo yenbo wos labo, yuri re nemne tokwo sein newote tetane.

¹⁹Nugwape nowselri wos kem gwor selke poten raste kap habote. Er wos et bukre wos bo. Kesewule rem wos regbo, sesegware nugwape wos kerebo, wosbas bisi a tame rem ake gwan bisi abo.

²⁰Kem God reri wule sete. Kem etop nente, et God reri kwomke wos rasbokap. Er wos et nowselri woskap bo. Kesewule rem er wos be regte, sesegware be kerete, bisi a tame rem ake be gwan bisi be ate.

²¹Neri wos rastene emi neri pap etek temente.

²²Le et wesomri tuwkap. Kem heyar tuwke sewurbokap, kem etop nente, kemri wesom yenbo tete.

²³Kemri le et yaper tete, kemri wesom et kerneirkap tete. Kem kerneirke bupo me sewurbokap, kemri wesom etopkap yaperwai tete.

²⁴Tame re temnas yi tame pes repne yaku kebese be nente. Wuri rene re pap yokte tetane, wuri rene re metekwaste. Wuri reri yaku re heyar nente, wuri reri yaku re yaper nente. Opkap, God reri yakukene kel yakukene kem pespes kebese be nente.

²⁵Eker an kemne webo. Kem awoskene kerap wole woskene mane op habo op habote. Awos et bukre wos bo. Kemri tetanekap et bukre wos. Kerap wole wos et bukre wos bo. Kemri wesom et bukre wos.