Mark 9:19-41

¹⁹Me fulweg Jesus ngorad ni ga’ar, “Ri der mich Got u wun’med! Uw n’umngin nap’an nthingar gu par romed? Uw n’umngin nap’an ni nggu k’adan’ug romed? Mfeked fachi pagel i yib ngog!”

²⁰Miyad fek fachi pagel nike ying ba mo’onyan’ ngak i yan ngak Jesus. Ma nap’an ni guy fare mo’onyan’ Jesus, me gelnag fare mo’onyan’ e m’ar rok fare pagel nge margey ni be da’da’, me thig nga but’ ngi i leapleap u but’, ma be yib e wuth u l’ugun.

²¹Me fith Jesus e chitamngin fare tir ni ga’ar, “Uw n’umngin nap’an ni be yib e ren’ey ngak?” Me ga’ar, “Ka nap’an ni kab bitir.

²²Ma ke yo’or yay nike yin’ nga fithik’ e nifiy nge nga fithik’ e ran ni be guy rogon ni nge li’ ngem’. Machane fa’anra bay ban’en nrayag rom ni ngam rin’ ngak, me ere mu runguymow ngam ayuwegmow!”

²³Me ga’ar Jesus ngak, “Ke lungum, fa’an rayag rom! Urngin ban’en mrayag rok be’ ni fa’an ra bay e michan’ rok.”

²⁴Ma ka chingiyal’ nem me non e chitamngin fare pagel ni ba ga’ gaman ni be ga’ar, “Bay e michan’ rog, machane de gaman, ere mu ayuwegneg nge gel e michan’ rog!”

²⁵Me guy Jesus ni be yib e girdi’ ni pire’ ngorad, me non nib gel ngak fare mo’onyan’ ni ga’ar, “I gur e re mo’onyan’ nir ni ga ma ying ko girdi’ ngar bilinggad ma dabkiyag ni ngar nonod, gu be yog ngom ni ngam chuw u fithik’ e cha’nir ma dab kum sul ngak bayay!”

²⁶Me tolul fare mo’onyan’ me margeynag me da’da’nag facha’ nib gel, me chuw u fithik’ i dow. Me par fare pagel ni gowa ke yim’, ni gubin e girdi’ me lungurad, “Ke yim’!”

²⁷Machane me kol Jesus pa’ fachi pagel nge sak’iynag, me sak’iy.

²⁸Ma nap’an ni chuw Jesus nga naun ni go’ yad e pi’in gachalpen, miyad fith Jesus ni lungurad ngak, “Mangfan nde yag romad ni nggu tulufed fare mo’onyan’ nge chuw u fithik’ facha’?”

²⁹Me fulweg Jesus ngorad ni ga’ar, “Dakuriy ban’en ngabang nrayag ni nge tuluf e mit ney e mo’onyan’, ya kemus ni meybil e rayag riy.”

³⁰Mranod u rom ngranod u lan yu Galile, ndabun Jesus ni nge nang be’ e gin bay riy, ni bochan e be machibnag pi gachalpen ni be ga’ar ngorad,

³¹“En ni Fak e Girdi’ e bay ni pi’ nga pa’ e girdi’, ma bay ra li’ed ngem’; ma fa’an bay nli’ ngem’ ma dalip e rran nga tomuren min faseg ko yam’.”

³²Ma dar nanged fan e re bugithin nem ni yog ngorad, machane ra tamdaggad ni ngar fithed ngak.

³³Me ere rabad nga Kapernaum, ma nap’an nranod nga naun me fith Jesus fa pi’in gachalpen ni ga’ar, “Mang e um tugthin niged u kanawo’?”

³⁴Ma dar fulweged lungun, ya ur tugthingad u kanawo’ ko arorad ni ir e th’abi tolang u fithik’rad.

³⁵Me par Jesus nga but’, me pining fa ragag nge l’agruw i gachalpen ngarbad ngak me ga’ar ngorad, “Aromed ni ba’adag ni nge mang ir e m’on e thangri tay ir ni ir e ba tomur u fithik’med, me mang ir e tapigpig romed ni gimed gubin.”

³⁶Me fek Jesus bochi tir nge sak’iynag u p’eowcherad. Me longobiy pa’ ngak fachi tir me ga’ar ngorad,

³⁷“En nra ayuweg reb e pi bitir ney ni bochag e ke ayuwegneg; ma en nra ayuwegneg e gathi kemus ni gag e be ayuwegneg, ya ku be ayuweg e en ni ir e ke l’oegeg ku gub.”

³⁸Me ga’ar John ngak, “Tamchib, kug guyed be’ nib mo’on ni be maruwel nga fithingam ngi i tuluf e mo’onyan’ rok e girdi’, me ere ku gogned ngak ni nge dabki rin’, ya gathi ir be’ ko ba’ rodad e girdi’.”

³⁹Me ga’ar Jesus ngorad, “Dab mu guyed rogon ni ngam taleged, ya dariy be’ nra maruwel nga fithingag nge ngongliy e maang’ang me tomur riy me yogneg nga dalib.

⁴⁰Ya en nder togopluw ngodad e bagdad.

⁴¹Mu ted fanmediyan ko re bugithin ni ba’aray: En nra pi’ ba gaf i ran i unum bigimed ni bochan e gimed pi gachalpeg e rib muduwgil ni yira pi’ puluwon ngak.”