Markuj 9:19-41

¹⁹A ap kotin japen irail majani: Di wet meid jopojon. Ia arain ai pan mimi re omail, ia arain ai pan kokoa komail? Wa don ia i!

²⁰Irail ap poto don i. Ni a kotin majani i, nen o ap madan kupururada i; a ap pupedi on nan pwel, wia pudopud taputapur jili.

²¹A ap kainoma ren jam a: Ia arain me kot et a lel? A ap potoan on: Jan ni a jeri.

²²Pan me toto a kin kajedi on i nan iai o nan pil, pwen kamela i. Ari, ma re kotin kak on, re kotin kupura kit ala jauaja kit!

²³Iejuj ap kotin majani on i: Ma koe me pojon; meakaroj me kak ren me pojon.

²⁴Madan jam en kijin jeri ap weriwer, janejan, potoan: Main, i pojon. Kom kotin katinaiada jan ai jopojon.

²⁵Ni en Iejuj a kotin majani ar tanetan pena, a ap anianiada nen jaut o kotin majani on nen loton o jalonepon: I indai on uk, koieido jan lole! Koe depa pure won i!

²⁶A ap weriwer, kapururada kaualap, ap koiei jan. I ari likamata a melar. Akai ap inda, a melar.

²⁷Iejuj ap kotin ale pa a kauada, i ari uda.

²⁸Ni a koti don ni im o, japwilim a tounpadak kan ap okiok peidok re a potoan on: Da me je jota kak kaujeki jan?

²⁹A ap kotin majani on irail: Jon wet jota kin koki jan meakot kapakap o kaijejol eta.

³⁰Re ap kotila jan waja o, weidala nan Kaliläa. A jota men, meamen en aja.

³¹Pwe a men kotin kawewe on japwilim a tounpadak kan ap majani on irail: Nain aramaj pan panalan ni pa en aramaj. Irail pan kamela i a murin a kamela a pan maureda murin ran kajilu.

³²A irail jota dedeki majan o; a re majak kalelapok re a.

³³A ap koti don Kapernaum; ni a kotikot nan im o a ap kotin kainoma re ’rail: Da me komail akakamaiki nani al o?

³⁴Irail ari nenenla, pwe re akamaiki nani al o, ij me pan laud re ’rail.

³⁵I ari kotidi, molipedo ekriamen oko, ap majani on irail: Meamen men moa, a en mi muri o papa on karoj.

³⁶I ari kotin ale kijin jeri amen, kotikidi on nan pun arail: A lau palodi i ap majani on irail.

³⁷Meamen me apwali amen jan ren kijin jeri pukat ni ad ai, a pil apwali ia. A me apwali ia, kaidik nai, me a apwali, a me kadar ia do.

³⁸Ioanej ap japen i, potoan on: Jaunpadak, je kilan amen, me kakauj tewil akan ni mar omui, a ap jota kin ian kit. Kit ari inapwiedi, pweki a kaidin kij at.

³⁹Iejuj ap kotin majani: Der inapwiedi! Pwe meamen me wia manaman ni ad ai, jota pan kak en lalaue ia.

⁴⁰Pwe meamen jota u on kitail, i kijan atail pali.

⁴¹Pwe meamen, me pan ki on komail dal en pil eu ni ad ai, pweki omail kijan Krijtuj, melel I indai on komail, katin i jota pan jalona jan.