Mareko 8:12-33

¹²I nuadubu, i ene, “Isi ta, saha heiheinoina si eooi? Ea heribamiu ta mamohoi, heiheinoi taba nige se mosei teina isi ta aridi eai.”

¹³Ia i laugabaedi; ie geruuio waga eai, ie lau hari sana awasi eai.

¹⁴Ia ena heaheatayao aiai nige se abi, nuadi se hui; isi adi falawa esega mo waga eai ie ota.

¹⁵Iesu i ribahesanapuedi, i ene, “Nanabumiu au nanabu, Parisea tataodi adi yeast, eo Heroda hinage ana yeast au itakomakomani.”

¹⁶Isi se nuatudadaasa, si ene, “Paana nige adi aiai.”

¹⁷Iesu edi nuatu i nuatui, ie ribalau isi aridi eai, i ene, “Ede saha au nuatudadaasaeai ina nige ami aiai ta? Ma supusupumiu, ma hekaumiu miana mo wa? Ede nuamiu masigirina miana mo wa?

¹⁸Omi matamiu! nige au ita? omi beamiu! nige au ataiei? (Iere 5.21) omi nige au nuatui?

¹⁹Falawa haligigi ea ihidi, tatao tausani haligigi ea mosedi se ai, aiai mapulana bosa hisa au usahemonaudi?” Isi si ene, “Saudoudoi‐labui.”

²⁰“Eo falawa haligigi‐labui, tatao tausani hasi se mosedi, aiai mapulana bosa hisa au usahemonaudi?” Isi si ene, “Haligigi‐labui.”

²¹Ia ie ribalau isi aridi eai, i ene, “Omi aue saha nuamiu nige se masaraha?”

²²Ia Betesaida eai ie lage; tau matagibugibu esau se woeai ia arinai, se awanorilau bena ia i abiita.

²³Ia tau matagibugibuna nimana eai i abilau, ie woeai eanua murimurina eai: matana i garisoi, nimana i saosaei ia potana eai, i hesiolau ia ginauri ie ita?

²⁴Tau wa ie itaitasae ewa eai, i ene, “Tatao ea itadi adi ao doha hinage oeagi, se tautausi.”

²⁵Iesu nimana i toreuioi ia matana eai; ia abo i itaitasae ewa eai, matana abo se lala, tatao gamagaridi abo i itakomakomanidi.

²⁶Iesu ia abo i hetamari ie lau ena numa eai, i ene, “Tabu u lau eanua eai, riba ta eanua eai tabu tau esau u heriba.”

²⁷Iesu ena heaheatayao se lau eanua gougou gamagaridi Kaisaria Pilipi eai; isi eda eai se lau, ia i hesiolau isi aridi eai, i ene, “Tatao si ene, eau ede eai?”

²⁸Isi se heuio, si ene, “Headi si ene, Ioane Bapatiso: na headi si ene, Elia; headi si ene, Peroveta tauna esau.”

²⁹Ia ie ribalau isi aridi eai, i ene, “Na, omi au ene eau ede eai?” Petero ia i heuio, i ene, “Oa Keriso ede.”

³⁰Ia i guguiaidi ia ribana tabu tau esau si heriba.

³¹Ia abo i hetubu i heatadi Tau Natuna amamna gamagaridi taba i hearodi, babada, eo kohena babadadi, eo tauuriuri tataodi, isi ia abo se otaotaei, abo hinage se unuhemate, i lau e asubena haiona abo ie torouio.

³²Teina riba ta ie riba hemasaraha, Petero ia i woeahesuara, ia Iesu i ribasuuilaei.

³³Iesu i sinibuima ie italau ena heaheatayao aridi eai, ia Petero i ribasuuilaei, i ene, “Oa Satani, u lau udoi wa murigu eai; Eaubada ena ginauri nige u nuatuidi, tatao mo edi ginauri.”