SAN MARCOS 8:12-33

¹²Pɛ nu ra Jesús bin gą'ts'i, bi du rá mbʉi nguetho guexta'a hingui ɛ̨c'yɛi gue ja rá ts'ɛdi, nɛ bi 'yɛ̨mp'ʉ: ―Hanja ngue guexta'a guí äjʉ yʉ hmɛpya. Majuąni dí xi ahʉ hin te ma hmɛpya ga ut'ahʉ ya.

¹³Nɛ bi zopʉ ʉ bʉya, bi mba bi yʉrpʉ ja ra mbosa mahøn'a ʉ, bi mba bʉ 'danguadi.

¹⁴Pɛ nu yʉ́ xädi ra Jesús bi pumbɛ̨ni him bi hyąx ra hmɛ. Nɛ hønt'a zi n'dam hmɛ mi o bʉ ja ra mbosa.

¹⁵N'da ran t'uti bi xih yʉ́ xädi ra Jesús nɛ bi 'yɛ̨mbi: ―Dami jamansuhʉ nangue rá íxi yʉ fariseo nɛ rá íxi ra Herodes, bi 'yɛ̨mp'ʉ.

¹⁶Pɛ yʉ́ xädi bʉya sä bin 'yɛ̨mzɛhɛ n'da ngu n'da ʉ: ―Masque i xijʉ nguetho him bá hąhʉ ra hmɛ.

¹⁷Pɛ nu ra Jesús 'bex bi bądi ngue him mi pą ʉ ngue gue'ʉ yʉ́n t'øt'e yʉ fariseo nɛ'ʉ mi tɛn ra Herodes bi xifi, nɛ bi 'yɛmp'ʉ: ―Ha gue'a gnín 'yänhdʉ a, ngue nte bá hąhʉ ra hmɛ. Hin gadin 'yomfɛ̨nihʉ, xʉm mɛ tho ni mbʉihʉ.

¹⁸Ja ni dähʉ nɛ hin guím bɛ̨mhbʉ 'bɛ'a gá nuhʉ, ja ni zaguhʉ nɛ hin guím bɛ̨mhbʉ a gá 'yøhmbʉ.

¹⁹Nɛ nu'bʉ má xɛngä cʉt'a yʉ hmɛ dá japi bin xąndi janague bin niyą xʉn ho cʉt'a mahuąhi dá 'uįngä, ha'mi 'bøts'e yʉ xɛqui gá pɛthʉ thą. Nɛ bi 'yɛ̨n ʉ: ―'Dɛ'mayo 'bøts'e.

²⁰Nɛ nu'bʉ má xɛngä yoto yʉ hmɛ dá japi bin xąndi janangue a bin niyą xʉn ho goho mahuąhi dá 'uįngä, ha'mi 'bøts'e gá pɛthʉ yʉ xɛqui thą. Nɛ bi 'yɛ̨n'ʉ: ―Yoto 'bøts'e.

²¹―Ha guexta'a hin guí pąhmbʉ a dím mangä, bi 'yɛ̨n'a ra Jesús.

²²Nu'bʉ mi zøm bʉ ra hnini Betsaida ra Jesús nɛ yʉ́ xädi, 'bex bá ts'inba n'da ra xädä, nɛ bi t'äp ra mate da dädi.

²³Nu ra Jesús bʉya bi bɛnba rá 'yɛ ra xädä nɛ bi zix bʉ ma'ueni ts'ʉ ra hnini. Bi zorpa yʉ́ dä nɛ bi därpa yʉ́ xidä, nɛ nubʉya bi 'yän 'bʉ in nu ts'ʉ ran nɛqui.

²⁴Nɛ nu'bʉ min hanni ra xädä bi 'yɛ̨na: ―Dín nugä yʉ ją'i ya, ɛ̨na yʉ za, pɛ i 'yo, bi 'yɛ̨na.

²⁵Nɛ bi därpa yʉ́ dä mahøn'a nɛ bi japi bi nu xʉn ho ran nɛqui bʉya.

²⁶Nɛ nu ra Jesús bʉya bi mbɛnpʉ rá ngu bi 'yɛ̨mbi: ―Hin gui mba bʉ hnini nɛ njo'o to gui xifi nangue a dá øt'e'e, bi 'yɛ̨mp'a mí xädä.

²⁷Nɛ nu'bʉ mi bøm bʉ ra hnini Betsaida a ra Jesús nɛ yʉ́ xädi, bi mbähä bʉ ja yʉ hnini ra xɛqui Cesarea Filipo. Nu'bʉ mi mba bʉ 'yu bi 'yän'ndʉ yʉ́ xädi nɛ bi 'yɛ̨mp'ʉ: ―'Bɛ'a i man yʉ ją'i nanguecä, bi 'yɛ̨n'a ra Jesús.

²⁸Nɛ nu'ʉ bi dąti: ―Ɛ̨n ʉ 'da yʉ ją'i gue'e grá Xuua Nxixyą. Nɛ nu'ʉ mi'da i ɛ̨n ʉ gue'e grá Elías. Nɛ mi'da i ɛ̨n ʉ, gue'e 'da ʉ yʉ pøngahyą mi 'bʉh maya'bʉ, bi 'yɛ̨n ʉ yʉ́ xädi.

²⁹Nu ra Jesús bi 'yänzɛhɛ yʉ́ xädi mahøn'a: ―Xi ahʉ, 'bɛ'a guí mamhbʉ nanguecä. 'Bex bi dą a ra Pedro, bi 'yɛ̨mbi: ―Nu'i gue'e grá Cristo, rá Thahni i Oją, bi 'yɛ̨n'a.

³⁰Nɛ nu'a ra Jesús bi hɛcua yʉ́ xädi ngue hin da ma to'o a.

³¹Nu ra Jesús bi dʉ'mi bi xi ʉ yʉ́ xädi 'bɛ'a da t'ørpe ngue gue'a bin ją'i ua ja ra ximhäi a, nɛ bi xi'ʉ ngue hin da numanho ma ngʉrbihe yʉ dąc'yɛi, nɛ yʉ ngʉrba mbäją nɛ yʉ xänbate niją, nɛ bi xi ʉ jatho da nu xʉn ngu ran ʉnbi nɛ da tho, nɛ da dąmbɛ̨ni 'bʉ ná hyupa.

³²Nɛ bi xifi xʉn ho 'bɛ'a da t'ørpe, hin'yʉ 'bɛ'a bi gøn'dʉ. Pɛ nu ra Pedro bi zixmanhɛ̨ nɛ bi hɛcpi, bi 'yɛ̨mbi: ―Njon gui japi da bɛnt'i i, damin yąni, bi 'yɛ̨mbi.

³³Nu ra Jesús bi hyand bʉ mi 'bäh mi'da yʉ́ xädi 'bʉ mi 'yɛ̨mp'a ra Pedro: ―Dami 'uegue nangue ma hmigä grá zįthu Satanás. Nu'i hingui sä guim bɛ̨ni tengu im bɛ̨n Oją, hønt'a guím bɛ̨n a guín nu ua ja ra ximhäi, bi 'yɛ̨mbi.