MARCOS 8:12-33

¹²Orguin wonleedx Ne axtegue gyët, lex re Ne: ―¿Penak rnab ménree lo noo ne ylaa noo te gyelmilaguer? Nligue yna noo lo de yra de ne betre gyelmilaguer kwiidet men.

¹³Orguin wruu Ne lad yra mén guin, wdee ke Ne lenbark, za Ne stebkoo nis.

¹⁴Chene che za Jesus yra Ne xpén Ne lo nis, wyenen xpén Ne ne zaneeydet men ne gu men; nunegue te gyëtxtil zaneey men lenbark.

¹⁵Lex re Jesus lo men: ―Gugap kwent lo xlebadur men ne nak farisew no le lo xlebadur Herodes.

¹⁶Orguin wzelo yra xpén Ne rulsaa men diiz, re men: ―Por ne neeydet be gyëtxtil, neguin na Jesus zegwa lo be.

¹⁷Wyenen Jesus ne re men zenga, lex re Ne lo men: ―¿Penak re de ne neeydet de gyëtxtil? ¿Pe gardet ydee de kwent no pe gardet gyenen de? ¿Pe wdeelel lo beey nkeb xgyeryen de yra de?

¹⁸Zobse bzalo de no rwiidet de; zobse gyedyag de no rondet de diiz. ¿Pe zaleedxdet de?

¹⁹Chene wgyiiz noo gaay gyëtxtil lo gaaymil mén, ¿blazh tsegwed gyëtxtilbla ne wrukaa wtop de? Wke men re men: ―Chibtxupo.

²⁰―No chene wgyiiz noo guedx gyëtxtil lo tapmil mén, ¿blazh tsegwed gyëtxtilbla ne wrukaa wtop de? Wke men re men: ―Guedxo.

²¹Lex re Ne: ―¿Pezee gardet ydee de kwent cheguin?

²²Zhich guin wdxiin Jesus Betsaida yra Ne xpén Ne. Wano mén te menngwlëë lo Ne, lex wnab men lo Ne ne ytee nya Ne led menngwlëë guin.

²³Orguin wgoob Ne nya men, wruno Ne men lenlgyëz. Wgueeb Ne zhen bzalo men, lex wxob nya Ne led men; zhich guin wnabdiiz Ne lo men gan pe che rwii men.

²⁴Chene wlis lo men, re men: ―Rwii noo mén, legue nak men zegnak yag, per rzaa men.

²⁵Lex wtee nya Jesus bzalo men ste, lex wii wiindxee men; orguin wyenii bzalo men, ne le men wak wii wen wenendxee.

²⁶Lex wxaal Jesus men ruxyuu men, re Ne lo men: ―Tsateedet de lenlgyëz, ni rut lo guedet de neree.

²⁷Zhich guin wa Jesus yra Ne xpén Ne yra gyëz ne nak nes Cesarea Filipo. Ne za Ne nëz, wnabdiiz Ne lo yra xpén Ne, re Ne: ―¿Pe re mén txu nak noo?

²⁸Wke men re men: ―Nuu men re Xwa ne rtxobnis nak de, nuuzeg men re profet-Elías nak de, nuuzeg men re ka txu ste profet nak de.

²⁹Lex re Ne lo men: ―Laa de naa, ¿pe na de txu nak noo? Wke Bëd, re Bëd: ―Laa de nak Crist.

³⁰Per re Jesus lo men ne rut lo guedet meno.

³¹Zhich guin re Jesus lo men: ―Men ne wdxiid wak Mén, rap men degne kesentyent gak men sufrir, no ylaandet maxter ley men yra maxter ley fxuz ne rnebééy lo yra fxuz no le men ne rnebééy lo men-Israel. Yket men men, per chene gyon gbiz, yban ke men.

³²Axtegue nya wzëët Jesuso lo men yra men. Lex wboo Bëd Ne tebkoo, wakndux Bëd lo Ne ne re Ne zenga.

³³Per wcheree lo Ne, wii Ne lo yra xpén Ne, lex wakndux Ne lo Bëd, re Ne: ―¡Gubetxee lo noo Bzelo! Porke rlebleedxdet de zegne rlaan Dëdyuzh, sinke le de rlebleedx zegne rlebleedx noze mén.