Markus 8:12-33

¹²Nge Jesus a ngasalap o apasa, “Pwota ei pilon aramasen ikenai ra tüngor eu manaman? Enlet, üpwe ürenikemi pwe esap wor eu manaman epwe pwä ngeni ei pilon aramas.”

¹³Iwe, Jesus a likitiirela, a tötä won efoch wa o saila pekilan ewe noom me epek.

¹⁴Iwe, nöün Jesus kewe chon kaiö ra manlükala ar repwe anafa woser pilawa, pun a chök wor rer eföü pilawa won ewe wa.

¹⁵Iwe, Jesus a üreniir, “Oupwe tümwünüfichi o afälikemi ren ewe iis än ekewe Farisi me Herotes.”

¹⁶Iwe, ekewe chon kaiö ra popuetä kapasfengen lefiler, “A apasa ei ititin fos, pun esap wor rech pilawa.”

¹⁷Nge Jesus a silei mine ra kapasfengen lefiler, iei mine a aisiniir, “Pwota oua kapasfengen usun an esap wor remi pilawa? Ifa usun, ousap mwo silei are weweöch ren? Ifa usun, lelukemi a chüen üleförea?

¹⁸A wor mesemi, pwota ousap küna och? A wor selingemi, pwota ousap rongorong? Ousap chechemeni

¹⁹lupwen üa kinikisietiu ekewe limeföü pilawa fän iten ekewe limungeröü aramas? Fitu chüük oua amasoua ren ekewe lusun mongö?” Iwe, ra pölüeni, “Engol me ruu chüük.”

²⁰“Nge lupwen üa kinikisietiu ekewe füföü pilawa fän iten ekewe rüanüngeröü aramas, fitu chüük oua amasoua ren ekewe lusun mongö?” Ra pölüeni, “Fisu chüük.”

²¹Iwe, Jesus a aisiniir, “Ifa usun, oua chüen wewemang?”

²²Iwe, ra tori Petsaita. Ikenan ekoch aramas ra uwato ren Jesus eman mwän mi chun. Iwe, ra tüngormau ngeni pwe epwe atapa.

²³Iwe, Jesus a amwöchü pöün ewe mwän mi chun o emwenala lükün ewe sopw. A atufa mesen ewe mwän o iseis pöün won, mürin Jesus a aisini, “Ifa usun, ka tongeni künok?”

²⁴Iwe, ewe mwän a nenela o apasa, “Ewer, üa küna aramas, nge ra lapalapeni lapalapen irä mi fetalfeil.”

²⁵Mürin Jesus a iseissefäl pöün won mesen ewe mwän. Iwe, mesan kana ra newenewenela o öchsefäl, pwe a tongeni künaöchu mettoch meinisin.

²⁶Mürin Jesus a tinala ewe mwän lon lenian o üreni, “Kosap chüen liwinsefälilong lon ei sopw.”

²⁷Mürin Jesus me nöün kewe chon kaiö ra feila lon ekewe sopw arap ngeni Seserea Filipi. Iwe, lupwen ar fetal, Jesus a aisiniir, “Met aramas ra apasa usi?”

²⁸Iwe, ra üreni, “Ekoch aramas ra apasa, pwe en Johannes Soupapatais, ekoch ra apasa, pwe en Elias, nge pwal ekoch ra apasa, pwe en eman ekewe soufos.”

²⁹Mürin Jesus a aisiniir, “Nge ämi, met oua apasa usi?” Petrus a pölüeni, “En Kraist!”

³⁰Iwe, Jesus a allük ngeniir, “Ousap fokun üreni eman och usi!”

³¹Mürin Jesus a afalafala nöün kewe chon kaiö, “Nöün Aramas epwe fokun tolong lon riaföü watte, epwe küna koput me ren ekewe souakom, ren ekewe souasor mi lap me ekewe Sensen Allük. Repwe niela, nge mürin ülüngat rän epwe manausefälitä.”

³²Iwe, Jesus a fokun afata ngeniir usun ei. Iei mine Petrus a emwenala ekis o a popuetä le apwüngü.

³³Nge Jesus a kul ngeni nöün kewe chon kaiö o a apwüngü Petrus me mwer. Iwe, a üreni, “Kopwe sü seniei, Satan! Pun om ekiek esap pop seni Kot, nge a pop seni aramas.”