Marcos 8:12-33

¹²Tseno niyaptinnam, Jesus llaquicurir, queno nerqan: —¿Imanirraq que nunacuna tseno milagrutaraq munayan? Peru manam ricayanqatsu.

¹³Tseno nirirninnam, pecunata jaqirïcur lanchaman lloqarcur lamarpa wac tsimpanman disipuluncunawan eucuyarqan.

¹⁴Tse eucurninnam, disipuluncuna mircapa apeta qonqecuyarqan. Juc tantallam lanchacho quecarqan.

¹⁵Tseno euquicarnam, Jesus pecunata queno notificarqan: —Cuidacuyë fariseucunapa y rey Herodispa lebadurancunapita —nir.

¹⁶Disipuluncunanam mana cäyir, quiquincuna pura queno ninacuyarqan: —Tantata qonqecamushqa cashqam tseno nimantsic —nir.

¹⁷Tseno ninacuyanqanta cäyicurcurnam, Jesus queno nerqan: —¿Imanirtaq tantequicuna mana canqanta yarpacachäyanqui? ¿Imalaya chucru shonqutaq cayanqui? ¿Manacu cäyiyanqui imapaq parlecanqäta?

¹⁸¿Imanirtaq cullu rinri cayanqui! ¿Manacu riquecarpis cäyiyanquiraq! ¿Manacu yarpäyanqui

¹⁹pitsqa tantallapita pitsqa waranqa (5,000) nunacunata micuratsiptï eca canasta juntata sobracunata elluyanqequita! Pecunanam niyarqan: —Chunca ishquetam (12) —nir.

²⁰Jina qanchis tantallapita chuscu waranqa (4,000) nunacunata qarariptï, ¿eca canasta juntatataq sobrata elluriyarqequi? Pecunanam niyarqan: —Qanchistam —nir.

²¹Tsenam Jesus nerqan: —Tseno quecaptinpis, ¿manacu cäyicuyanquiraq!

²²Tsepitanam Betsaida marcaman chäriyarqan. Tsecho quecayaptinnam, Jesusman juc wiscuta apayämorqan, y rogacuyarqan Jesus cachaquecatsinanpaq.

²³Tsenam wiscuta jancharcur tse marcapa washaninman apacorqan. Tsechonam wiscupa nawinman toqecur, yatecur taporqan: —¿Imallatapis ricanquinacu? —nir.

²⁴Tse wiscunam ricachacurir nerqan: —Aumi, Teyta. Monticunatano nunacunata pureqtam riquecä.

²⁵Tsenam nawinta yape Jesus yatecuptin, paqwena cachacärerqan, y allinam llapantapis ricarqan.

²⁶Tsenam tse nunata Jesus queno nerqan: —Ama que marcaman yequïtsu ˻paqtam willaquicunquiman cachacätsenqaqta, antis wayiquiman ras cutiquï˼ —nir.

²⁷Tsepitanam disipuluncunawan Jesus ewarqan Cesarea Filipopa caseriuncunaman. Tseman ewarëcarnam, disipuluncunata queno taporqan: —¿Pi canqätataq nunacuna niyan noqapaq?

²⁸Pecunanam queno niyarqan: —Waquinmi niyan qamqa bautisacoq Juanshi canqui. Waquinnam niyan Diospa profetan Eliasshi qamqa canqui. Waquincunanam niyan “Diospa une profetanchi” nir, niyäshunqui.

²⁹Tsenam Jesus nerqan: —Qamcunaqa, ¿imataq niyanqui? ¿Pitaq cä? Tsenam Pedru queno nerqan: —Qamqa Dios Acrashqanmi canqui, Tëte —nir.

³⁰Tseno nïcuptinnam, Jesus nerqan: —Ama tsetaqa pitapis willacuyanquitsu —nir.

³¹Jesusnam disipuluncunata quiquinpaq willapäcur nerqan Diospita Shamushqa Nunata jipatsiyänanpaq caqta, y autoridacuna, saserdoticunapa mandacoqnincuna y ley yachatsicoqcuna chiquir wanutsiyänanpaq caqta, y quima junaqllata cawariramunanpaq caqta.

³²Tseno cananpaq cashqanta claru willaquicuptinnam, Jesusta Pedroqa juc laduman japallanta qayarir piñaparqan.

³³Peru Jesusnam tumecur disipuluncunata allipa ricarëcur, Pedruta queno nerqan: —¡Quepeq yarqï, diablu! Qamqa manam Teyta Dios munashqannotsu yarpanqui; sinoqa nunacuna munayashqannollam yarpanqui.