Marcos 8:12-33

¹²Jesús mzilextoo nu nzhé: —¿Chozhiin naab re gu, xaa nzho mbizh nalzhe, nseyn ne? Wli na kwaan nii na lo gu, nik tub kwaan nalet na lo gu, zee nik tub kwaan nawiit gu lo.

¹³Zee mlaa Jesús re xaa, nu mzeeb Jesús leen kano, nu nzha xaa mded xaa stub ta roo nistoo.

¹⁴Myenlazh re xaa nge xaa kwaan gaw xaa, chaka pan nkano xaa leen kano.

¹⁵Leezha nzha re xaa leen kano, Jesús nzhé lo re xaa: —Lijer gok gu lo lebadur cheen re fariseo, nu lo lebadur cheen Herod.

¹⁶Re xaa mseed lo xaa mzelo nzhé xaa lo wechxinn xaa: —Sbaa né xaa lo be nel myenlazh be nge be pan.

¹⁷Nu mzeen Jesús kwaan nzhé re xaa lo re wechxinn xaa, zee mnabdizh Jesús lo re xaa: —¿Chozhiin nzhé gu nanzenot gu pan? ¿Che seetaka nanzeent gu, nu nixa nanlata yek gu? ¿Che tira mkaw yek gu?

¹⁸Nzob lo gu, per nanluta lo gu; nzob nzha gu, per namxalt nzha gu gon guya. ¿Che tira nanselazht gu?

¹⁹Leezha mlerol na pan ndaw tub gaay mil xaa, ¿lak chekwid pan mlake? —Chiibchopa —nzhé re xaa.

²⁰—Leezha mlerol na pan ndaw tub tap mil xaa, ¿lak chekwid pan mlake? —Gazha —nzhé re xaa.

²¹Zee nzhé Jesús: —¿Chozhiin seesa nanlata yek gu?

²²Gorna mzhin Jesús yezh Betsaida, lee lak xaa nzeno tub xaabyi syeg. Zee nzhé re xaa lo Jesús: —Le jabor, zhib yaa lu cho xaa ne, zee gakwen xaa.

²³Jesús mzen yaa xaa nu mbe Jesús xaa tub lad roo yezh. Nu mchuk xaa zaalo xaa, nu mzhib xaa yaa xaa cho syeg, nu nzhé xaa: —¿Che nyini lu lak?

²⁴Gorna mwii xaa zee nzhé xaa: —Nlu lak xaa nzhaze lo na, per kwenta yag nzhak xaa.

²⁵Mbare Jesús mgal zaalo xaa stuba, ¡nu lee syeg nguni lo, nu myun rese kwaan lo xaa!

²⁶Zee Jesús nzhé lo xaa: —Zyaa garli lu, per nadedt lu leen yezh.

²⁷Zeera lee Jesús nu re xaa mseed lo Jesús, ngwa re yezh yizhyo le Cesarea-Filipo. Leezha nzhaze re xaa, Jesús nzhé lo re xaa mseed lo xaa: —¿Cho né re myet nak na?

²⁸Lee re xaa nzhé: —Tub naz xaa mbezh lee lu nak Juan Xaa Nchubnis, stub naz xaa mbezh lee lu nak Li, nu stub naz xaa mbezh lee lu nak stub re xaa mzaa kwent kwaan nzhé Dios lo lee xaa yilo, mroban nal.

²⁹—Lee re guya, ¿cho nle re gu xgab nak na? —nzhé xaa lo re xaa. Nu lee Pér mkeb nzhé: —Lu nak Xaa Mxaal Dios Nabeyy.

³⁰Per lee Jesús mnabeyy re xaa nu nzhé xaa lo xaa: —Nik tub lo nayét guya.

³¹Jesús mzelo mseed re xaa mseed lo xaa, nu nzhé xaa: —Na nak Xaa Mzhin Ngok Myet. Nu nzhaal ded doo na bid, nu nakayaat re xaa gol na, nixa re ngwleyy xaa non, nixa re maestr xaa nlu xtizh Dios. Nu gut re xaa na, per lee mbizh yon lee na roban.

³²Klar ngunii xaa re wdizh ne, kwaanzee Pér mbe xaa tub lad, nu mgalno Pér xaa.

³³Per lee Jesús myek nu mwii lo re xaa mseed lo xaa, nu mgalno xaa Pér, nzhé xaa: —¡Bachii lo na Maxuu! Nanlet lu xgab kwaan nle Dios xgab; lu nle re xgab kwaan nle re myet xgab.