Mak 6:23-55

²³Ra i uliliman dekdek tari lena, “Asau mukut ra un saringi tang, an pitari tam. Ra un saring iau kai sur tu kukur tagun a kum utna ra a warkurai suri, an pitari ut tam.”

²⁴Ra i wan torom o nano ma i tingi lena, “Asau ra an saringi tano?” O nano i balu i lena, “Un saringi sur in lorin o Jon a Tene Baptaiso.”

²⁵Uniutra, a toraro ra i wan lakit torom a king, ra i watungi tano lena, “Uniutri, un tabor iau namin lorin o Jon a Tene Baptaiso un tu pelet.”

²⁶A king i tupunuk doko. Ikut ke nemi mo sur in ipul, uni i sa uliliman tari lena, asau mukut ra in saringi tano in tabori ut nami, ma a taro ra det kis tomo nami una inangon, det sa longoro tar anun a wasiso.

²⁷Uniutra, i tulu ru a tene inaim sur in los tar in lorin o Jon toromi. A tene inaim i ruk una rumu na karabus, ra i tau kutus pas in kabaran o Jon.

²⁸I ubek pas in lorino una pelet, ra i pitari torom a toraro, ra i bulung i pitari torom o nano.

²⁹A kum nat na ususer anun o Jon det longoro i, ra det wan ma det los pas a minatino, ma det uruk tari una kulam na minat.

³⁰A kum aposel det kis tomo nam o Iesu, ra det inanosi una kum utna rop ra det sa pam tari, ma det sa ususer tar a taro kai nami.

³¹Ra o Iesu i watungi tandet lena, “Dat in nan sur tu nubual kalako taro uni, sur mot in mana pas.” I watungi lenri, uni a susut na taro det wanpat liklik kut, ma katu du bung sur o Iesu tomo nam anun a kum aposel det in nangon uni.

³²Ra det kut, det kas una pot ra det wan sur a nubual kalako taro uni.

³³A susut na taro ra det tama det ra det soi, det tama lele pas o Iesu tomo nam anun a kum aposel. Det kalabor gusun a kum tamon ra det mugu pat una nubual ra o Iesu det in sot iai.

³⁴Ra det sot, o Iesu i tama a labino kunur na taro. I maris doko det, uni det elar mukut nama kum sipsip ra katu tene tamtamabat anundet. Ra i turpas a towo det nama susut na utna.

³⁵Ra i sa lirop, anun a kum nat na ususer det wan toromi, ra det inanosi lena, “A nubual ri i bakbak gusun a kum tamon, ma i sa lirop kai.

³⁶Un tulu ru a taro sur det in nan sur a kum natnat na tamon milau, ma a kum lamlabino tamon kai. Det in kul pas lako utna sur det in nani.”

³⁷O Iesu i balu det lena, “Mot ut mot in tabor det.” Det watungi tano lena, “Kalako ru mar na denaria sur dat in kul tabor det nami.”

³⁸Ra o Iesu i ting det, “Lako isin beret kura mot losi? Mot in nan ma mot in tamtama.” Ra det sa tama tari, det inanos o Iesu lena, “A limanin beret kut ma arin kiripo kai kuri met losi.”

³⁹Ra o Iesu i tulu anun a kum nat na ususer sur det in tibo susuaro a taro sur det in kis unin wuliso.

⁴⁰A ramano det kis arara mar, ma a ramano kai a limlimo na noino.

⁴¹Ra o Iesu i los pas a limanin beret, ma arin kiripo, i tamtama usapat una langit, i watung wakak pas torom o God uni, i tibik a limanin beret, ra i pitari tan anun a kum nat na ususer sur det in tibo a taro nami. I tibo det rop kai nam arin kiripo.

⁴²Det rop det wangon ma det masur.

⁴³Numur det song bukus pas a noino ma aru rat nama beret ma a kiripo ra det wangon kopos pas uni.

⁴⁴A kunur na taro ra det wangon, a niluluk ina kum musano sot kut i elar nama limo na arip.

⁴⁵Uniutra, o Iesu i tulu ru anun a kum nat na ususer, sur det in kas una pot, ma det in mugu utong o Betsaida una ara papor tasi. Ma i, i kis utmakai sur in tulu ru tar a taro.

⁴⁶Ra i wan gusun det, i wan tito usapat una tangai sur in wararing.

⁴⁷Ra i sa lirop matano mirum, a pot i sa wan potor una du tasi, ma o Iesu mukut i kis nago una usalin.

⁴⁸I tama det ra i sa tekes det a ulusu, uni a wuwu i waim tagisa numugu. Una lar, o Iesu i wan sapat netes una tasi torom det, ra i ling na wan sakit det.

⁴⁹Det tama pasi ra i wan sapat netes una tasi, det nuki lena a nion. Ra det woiwoi,

⁵⁰uni det rop det tama i, ra det ngara doko. Uniutra o Iesu i watungi tandet lena, “A kosom taru tamot, iau kut ri. Gong mot ngara.”

⁵¹Ra o Iesu i kas torom det una pot, ra a wuwu i mana mut. Det kisin doko,

⁵²uni ka det tasman wakak a utna na ukisin ra o Iesu i sa pam tari una beret ma a kiripo. Uni a balandet i dekdek doko.

⁵³Ra det sa wan kutus un ara papor tasi, det sot tiro una papor Genesaret, ra det ega tar a pot.

⁵⁴Det sirok gusun a pot, ra uniutra, a taro det tama lele pas o Iesu.

⁵⁵Det kalabor una kum tamon una papor ra, sur det in los a kum misait torom o Iesu. Det los det una kum lu utiro toromi, un asi na tamon ra det longoro i lena, kura i iai.