Maliku 6:23-55

²³Kandi kayilapa, “Dangugayili chochosi chiwudayila, hata nusu ya wutwa wangu!”

²⁴Bahala pala muhinja yula kayenda kumudasha mau waki, “Nuvi liki?” Na mweni kamyangula, “Luvi mutwi wa Yohani mbatisha.”

²⁵Bahala pala mhinja yula katuva kwa mutwa kumluva, “Ngudayila ugayili ponopa mutwi wa Yohani mbatisha muluselu!”

²⁶Mutwa kang'onguteka nendu, lakini kawesha ha kulema, kwanongwa ayilapili paulongolu ya vahenja vaki.

²⁷Bahala pala mutwa kamulayisha machonda akayeghi mutwi wa Yohani mbatisha. Machonda kayenda muchijaka kamdumula Yohani mutwi waki.

²⁸Pambeli kauyegha mutwi wula muluselu kamgayila muhinja, mweni kamgayila mau waki.

²⁹Vanachuli va Yohani mbatisha pavapikanishili afi, vayenda kuutola mvili waki na kuusika.

³⁰Vandundami vawuyili vatangana kwa Yesu, vamuwombela fyosi fila fyavagolili na kuwula.

³¹Yesu kavawombela, “Tuyendi weka yetu mahali pangajila vandu, mkapumulili padokwa.” Adetili ndambu ayi kwanongwa kwavelili na vandu vatangalili vavelili vakwisa na kuwuka, mbaka vapata ha fwasi ya kulya filivi.

³²Topi vawuka weka yawu muwatu, vayenda mahali pangajila mundu.

³³Lakini vandu vavawonili pavaveghi vakuwuka, vavamanyili. Topi, vatuva kwa mawulu kufuma mbwani shosi na vatalili kufika.

³⁴Yesu pafumili muwatu, aliwonili lipinga likomi lya vandu. Kavawonela lusungu kwanongwa vaveli kucha vameni vangajila mdima. Topi kakanda kuvawula findu fitangalili.

³⁵Lumihi palufikili, vanachuli va Yesu vamyendela na kumuwombela, “Mahali apa pangajila vandu na lijuva lihonga.

³⁶Uvaleki vandu vayendi kufitava na mufijiji fya pabehi vakayihemeleli filivi.”

³⁷Lakini Yesu kavayangula, “Yumwi muvapi filivi valyi.” Vamdasha, “Ponopa tuyendi tukahemeli mibumunda ya mbiya sha ijala ya myesi minani.”

³⁸Kavadasha, “Muva na mibumunda miningi? Muyendi mkaloli.” Pavalolili kala, vamuwombela, “Tuva na mibumunda muhanu na vasomba vavili hela.”

³⁹Pambeli Yesu kavawombela vanachuli vaki vavawombeli vandu vosi vayitapuli mufipinga-fipinga, vayikali pasi mulugobi.

⁴⁰Topi, vandu vayikala mufipinga fya vandu miya yimu fya vandu milongu muhanu.

⁴¹Pambeli Yesu kaitola mibumunda yila muhanu na vasomba vavili. Kalola kumbindi, kamlumba Chapanga na kuyimetula yila mibumunda. Pambeli kavapa vanachuli vaki vavapi vandu. Wuwula wula kavapa vandu vosi vala vasomba vavili.

⁴²Vandu vosi valya vayikuta.

⁴³Vanachuli va Yesu vasola mibumunda na vasomba vasighalili vamemesha fitandavala lilongu limu na fivili.

⁴⁴Vandu vosi valili valulumi vaveli alufu muhanu.

⁴⁵Bahala pala Yesu kavawombela vanachuli vaki vayingili muwatu, vamlonguleli kuyenda Betisayida. Mweni aveli akuvatawula vandu.

⁴⁶Pamalili kuvayitawula vandu, kayenda kuchidunda kumdadava Chapanga.

⁴⁷Lumihi palufikili, watu waveli pagati ya lihiva, mweni aveli weka hela kumwambu ya lihiva.

⁴⁸Kavawona vanachuli vaki vakukimbanika kuguba watu kwa ngafi, kwanongwa liyegha lyaveli likuvalimba. Payiveyi samba kulangala, Yesu kavayendela payendayenda kumbindi ya machi. Akadayileyi kuvapita,

⁴⁹kumbi veni pavamuwonili akuyendayenda kumbindi ya machi, vadeta aveli chishuka. Vawuta,

⁵⁰kwanongwa vosi pavamuwonili vatilili nendu. Bahala pala Yesu kavawombela, “Ndiva nenga! Mkotoo kutila, mugangamali.”

⁵¹Pambeli kayingila muwatu pamu nawu na uyegha unyamala. Vanachuli vaki vajinga nendu,

⁵²kwanongwa vaveli vakali hela kumanya mana ya kuvagayila mibumunda yila valyi, ndima shawu shaveli sidindala.

⁵³Vajabuka lihiva, vayisa mumlima wa Genesaleti, pala vapayika watu wawu.

⁵⁴Pavajabukili muwatu, bahala pala vandu vamumanya Yesu.

⁵⁵Topi, vatuva mumlima wosi na vavatola vatami muluhagha na kuvayegha mahali poposi pavapikanishili Yesu paghaveyi.