Maliki 6:23-55

²³Kelaha, “Nitsokwing'a chochose chaubama, hata ka inusu ya undewa wangu!”

²⁴Kuya imwana ayo kaghenda kumghutsa mai wake, “Nilombe choni?” Naye kamwidika, “Lomba litwi lya Yohane Mbatitsa.”

²⁵Imwana ayo katsuma mbaka kwa imndewa kamlomba, “Nobama ungaye litwi lya Yohane Mbatitsa mne lungo!”

²⁶Imndewa kona usungu ng'ani, lekeni ng'adahile bae kulema, kwaapfila tsakelaha hambele he iwahenza wake.

²⁷Bahala imndewa kamlaghitsa asikali, kamlongela aghale litwi lya Yohane. Asikali kaghenda mne chifungo, kamghana litwi Yohane.

²⁸Kuya kaghala litwi alyo mne lungo, kamwing'a imwana ayo. Naye kamwing'a mai wake.

²⁹Iwanang'ina wa Yohane hawahulike apfi, waghenda kulusola lukuli lwake, walutsika.

³⁰Iwatumighwa woya na wetingana kwa Yesu, wamlongela aghala ghose ghawatendile na kulangulitsa.

³¹Yesu kawalongela, “Leka tughende tuliyeka hanu halihela imunu tukabwihile.” Kalonga apfo kwaapfila tsakukala ne iwanu wengi iwang'ali wakutsa na ukuka, mbaka Yesu ne iwanang'ina wake ng'awadahile bae kupata nafasi ya ukuja ichijo.

³²Apfo woka waliyeka mne mnumbwi, waghenda hanu halihela imunu.

³³Lekeni iwanu iwawonile hawang'ali wakuka, tsawamanya. Apfo watsuma kwa mghulu kulawa mne imiji yose, kuya walongola kupfika.

³⁴Yesu hayalawile mne mnumbwi, kona mtingano mkulu ghwe iwanu, kawonela libatsi kwaapfila tsawoneka ka iwang'olo iwalihela mdimi. Apfo kandusa kuwalangulitsa ipfinu pfingi.

³⁵Mihe haipfikile, iwanang'ina wake wamghendela wamlongela, “Hanu hano hana nyika iliyeka, na litsua liswa.

³⁶Waleke woke kune imighunda ne ipfijiji, ili wakeghulile ichijo iwenyegho.”

³⁷Lekeni kawedika, “Mwemwe muweng'e ichijo waje.” Wamghutsa, “Apfi kwotubama tughende tukawaghulile pfighate pfa sendi miya mbili tuweng'e waje?”

³⁸Kawaghutsa, “Mna pfighate pfingapi? Mghende mkalole.” Hawamanyile, wamlongela “Kuna pfighate pfitano ne iwasomba weli.”

³⁹Kuya Yesu kawalongela iwanang'ina wake, wawalongele iwanu wose weghole mne makingili, wakale hasi mne mitsani imibisi.

⁴⁰Apfo wakala mne makingili ghe iwanu, hano miya, hano hamsini.

⁴¹Kuya Yesu kasola pfighate pfila pfitano ne iwasomba weli, kalola kulanga, kapfibaliki kuya kapfibena pfighate pfila. Kaweng'a iwanang'ina wake waweng'e iwanu. Pfipfila kawagholela iwanu wose iwasomba wala weli.

⁴²Iwanu wose waja weghuta,

⁴³ne iwanang'ina wake wadondola pfighate ne iwasomba yawakalile wamemetsa pfiseghe kumi na pfili.

⁴⁴Iwamale iwajile wakala 5000.

⁴⁵Bahala Yesu kawalongela iwanang'ina wake wengile mne mnumbwi wamlongolele kughenda Betisaida. Yeye tsayang'ali kowaagha iwanu woke.

⁴⁶Hayamalitse kuwaagha iwanu, kaghenda mlughongo kulomba.

⁴⁷Mihe haipfikile, mnumbwi ghukala mghati mwe tsimbu naye kakala aliyeka kunze kwe tsimbu.

⁴⁸Tsakawona iwanang'ina wake woghaya mne mnumbwi, kwaapfila libeho ling'ali lyowatowa kwa ingupfu. Habehi na kucha, kawaghendela, yang'ali yoghenda mchanya mwe ghamatsi. Kabama awalute,

⁴⁹nawo hawamwonile koghenda mchanya mwe ghamatsi, tsawepfikitsa tsakakala mtsimu. Walila kwa litsi likulu,

⁵⁰kwaapfila wose tsawamwona na wang'ali wopfuka. Bahala Yesu kawalongela, “Nene! Mleke kupfuka.”

⁵¹Kuya kengila mne mnumbwi hamwe nawo, na libeho linyamala, iwanang'ina wake wakangawala ghendo.

⁵²Kwaapfila ng'awamanyile bae mbuli tsa pfighate, imimoyo yawo tsaikala mikomu.

⁵³Waloka tsimbu, wapfika mne isi ya Genesareti, baho wemitsa imnumbwi ghwawo.

⁵⁴Hawalawile mne mnumbwi, bahala iwanu wamtanga Yesu.

⁵⁵Apfo watsuma mne isi yose, wandusa kuwasola iwatamu mne ghamasatsi na kuwaghala hanu hohose kuwahulike Yesu kabaho.