1Gↄrↄ kũ̀nↄ gũn dↄ gbɛ̃nↄ kàkarai dasi. Ò pↄ́ble vĩ ò blero, akũ Yesu a ìbanↄ sìsiai à pìńnɛ:
2Gbɛ̃ dínↄ kɛ̀mɛnɛ wɛ̃nda, zaakũ ò gĩnakɛ ò kú kũmao gↄrↄ aakↄ̃, akũ ò pↄ́ke vĩ kũ ò blero.
3Tó ma ń gbárɛ ò tá bɛ kũ nàao, gu ni liḿma zɛ́ gũn, zaakũ ń gbɛ̃kenↄ boki zã̀.
4Akũ a ìbanↄ a là ò pì: Mákpan óni pↄ́ble len sɛ̃̀ntɛpↄrↄtu la kũ ani gbɛ̃ pìnↄ kãa?
5Akũ Yesu ń lá à pì: Burodi mɛ̀n ũgban á vĩi? Ò pì: Mɛ̀n supplamɛ.
6Akũ à pì pari vutɛ zĩtɛ. Akũ à burodi mɛ̀n suppla pìnↄ sɛ̀ à sáabu kɛ̀, ben à ɛ̀'ɛ à kpà a ìbanↄa ò kpaatɛtɛ parinɛ, akũ ò kpàatɛtɛńnɛ.
7Ò kpↄ̀ fítinnanↄ vĩ fíti dↄ. Kũ à arubarikaa dàn, à pìńnɛ ò ɛra ò abirekũ kpaatɛtɛńnɛ dↄ.
8Akũ ò blè ò kã̀, akũ ò a kpara kũ ò gↄ̃̀nↄ sɛ̀tɛ tãnko mɛ̀n suppla.
9Gbɛ̃ pìnↄ kà kãni dúbu siikↄ̃. Kũ Yesu ń gbárɛ,
10akũ à gɛ̃̀ gó'itɛ gũn kũ a ìbanↄ, ò gɛ̀ɛ Dalamanuta bùsun.
11Akũ Farisinↄ sù òtɛn lɛ́kpakↄ̃a kpá kãao òtɛn lí kpátɛa, òtɛn wɛtɛ à sèeda ke kɛńnɛ kũ Luda gbãnao.
12Akũ à wesa bò à pì: Bↄ́yãi gbãragbɛ̃nↄ dì sèeda gbɛkamaa? Yãpuran matɛn oárɛ, mani sèeda ke kɛńnɛro.
13Akũ à ń tó gwe à ɛ̀ra à gɛ̃̀ gó'itɛ gũn à tà bara.
14A ìbanↄ sã̀n ò burodi zàna sɛ́. Burodi mɛ̀n do mɛ́ à gↄ̃̀ńnɛ gó gũn.
15Akũ Yesu lɛ́ dàḿma à pì: Àgↄ̃ á zĩda kũna dↄ̃. À laakari kɛ Farisinↄ kũ Hɛrↄdu gbɛ̃nↄ lùbɛnɛɛi.
16Akũ òtɛn pikↄ̃nɛ: Kũ ó burodi vĩro yã mɛ́ à tò à ò lɛ.
17Yesu dↄ̃̀ḿma, akũ à ń lá à pì: Bↄ́yãi átɛn pi kũ á burodi vĩro yãii? Ari tera á wɛ́ dí kɛ̃ à dↄ̃roo? Á laasun vĩroo?
18Á wɛ́ vĩ à gu eoroo? Á sã vĩ à yã maoroo? Yãke dì dↄáguroo?
19Kũ ma burodi mɛ̀n sↄↄro ɛ̀'ɛ ma kpà gbɛ̃nↄn dúbu sↄↄronↄa, a a kpara sɛ̀tɛ tãnko mɛ̀n ũgbamɛɛ? Ò wèa ò pì: Mɛ̀n kuri awɛɛplamɛ.
20Akũ à ɛ̀ra à ń lá à pì: Kũ ma burodi mɛ̀n suppla ɛ̀'ɛ ma kpà gbɛ̃nↄn dúbu siikↄ̃nↄa, a a kusu sɛ̀tɛ sù mɛ̀n ũgbaa? Ò wèa ò pì: Mɛ̀n suppla.
21Akũ à pìńnɛ: Ari tera á dↄ̃roo?
22Kũ ò kà Bɛtɛsaida, akũ ò sùnɛ kũ vĩ̀naao ò wɛ́ kɛ̀a à ↄ naa.
23Akũ à vĩ̀naa pìi kũ̀ a ↄa à bò kãao wɛ̃tɛ kpɛ. À lɛ́'i kà a wɛ́a à ↄ nàa, akũ à a là à pì: Ntɛni gu e yá?
24Akũ gↄ̃gbɛ̃ pì a wɛ́ sɛ̀ musu à pì: Matɛn gbɛ̃nↄ e lán línↄ bà òtɛn táa o.
25Akũ Yesu ɛ̀ra à ↄ nà a wɛ́a dↄ. Kũ gↄ̃gbɛ̃ pì wɛ́ kɛ̀ biribiri, akũ a wɛ́ wɛ̃̀ àtɛn pↄ́ sĩnda pínki e sà swáswa.
26Akũ Yesu a gbàrɛ à tá bɛ à pì: Ǹsun bↄtɛ lakutu gũnlo.
27Kũ Yesu tɛn gɛ́ kũ a ìbanↄ Sizaria Filipi lakutunↄ gũn, akũ à a ìbanↄ là zɛ́ gũn à pì: Dín gbɛ̃nↄ dì pi má de a ũu?
28Ò wèa ò pì: Gbɛ̃kenↄ dì pi Yahaya Da'itɛkɛriimɛ, gbɛ̃kenↄ dì pi Iliasu, gbɛ̃kenↄ dì pi dↄ annabi yãnↄ dokemɛ n ũ.
29Akũ à ń lá à pì: Ákↄ̃nↄ sↄ̃, dín adì pi má de a ũu? Pita wèa à pì: Arumasihumɛ n ũ.
30Akũ Yesu ń sã fĩ̀ńnɛ de òsun yã pì o gbɛ̃ke maro.
31Akũ à nà yãdannɛnaaa à pì: Séde Bisãsiri Nɛ́ wɛ́tãmma le manamana, gbɛ̃ zↄ̃kↄ̃nↄ kũ sa'orikinↄ kũ ludayãdannɛrinↄ ni gíi, oni a dɛ, a gↄrↄ aakↄ̃de zĩ ani futɛ.
32À yã pìi òńnɛ swáswa, akũ Pita gɛ̀ɛ kãao kpado, àtɛn gínɛ.
33Kũ Yesu lìtɛ à a ìbanↄ gwà, akũ à pàta Pitaa à pì: Ǹ gomɛnɛ gwe Setan! N laasun bi Luda pↄ́nlo, bisãsiri pↄ́mɛ.
34Abire gbɛra Yesu pari sìsiai kũ a ìbanↄ à pìńnɛ: Tó gbɛ̃ ye à kɛ ma ìba ũ, séde à gí a zĩda wɛ̃̀ndiii à a lígbãndurukpana sɛ́ à tɛ́omai.
35Gbɛ̃ kũ à ye àgↄ̃ a wɛ̃̀ndi kũna ni kurai. Gbɛ̃ kũ à gì a wɛ̃̀ndiii ma yãi kũ ma baaru yão sↄ̃, ade nigↄ̃ wɛ̃̀ndi vĩ.
36Tó gbɛ̃ gↄ̃̀ andunia vĩ pínki, tó à kùra a wɛ̃̀ndiii, bↄ́ àreen à vĩi?
37Bↄ́n bisãsiri ni le à a wɛ̃̀ndi lilin kɛoo?
38Tó gbɛ̃ makũ kũ ma yãnↄ wé'i dɛ̀ gbãragbɛ̃ durunnade ludanaanikɛrisarinↄ tɛ́, Bisãsiri Nɛ́ ni ade wé'i dɛ gↄrↄ kũ ani su a De gakuri gũn kũ a malaikanↄ.
