Luuka 4:15-44

¹⁵Aari osomisa mmanyupa woosifwiwamo Nnyizinku, atthu ooshi khusala anttottopela.

¹⁶Khulawa mpakha sitati ya Nazareeti ohali aleliweewo. Siikhu ya saapatu khweetta nnyupa woosifwiwamo Nnyizinku nkhama etthiipo aazowereliyeezo. Khulankha yoori asome.

¹⁷Khwinkhiwa kithaapu ya napiyu Ezaaya. Khufunula khusala athola khusikana vahali yaatikhiweevo yoori:

¹⁸“Rooho ya Mbwana eri vamote na-miyo, akithawaza yoori kiwaatafusirele hapari zooshapweya asikhini na olaleya otaphuliwa wa anamahuzunikha, owoonisa apale oohooni, owaavumulisa apale oohukhumwiwa,

¹⁹na olaleya yoori wafiya mwaakha wa rehema ya Mbwana.”

²⁰Yinsa khufinikha kithaapu etile khumwinkha karumeya wa nnyupa woosifwiwamo Nnyizinku, Ye khwiikhala. Atthu ooshi apale aariimo khusala amweekesa.

²¹Ye khuwooza yoori: “Leelo zarettikhana epile zaatikhiweeyo, etthiipi mwinttaaye wiisharu osiila.”

²²Atthu ooshi khusala anttottopela, na khwiiya ootikinisiwa mwaasa wa mattakhuzi a rehema aari olankhaaye nkhanyo mwawe, khusala oozelana yoori: “Khahi mwaana wa Yuusufu otu?”

²³Yinsa khuwooza yoori: “Khweele khweele mweeyo mwinlawa mwakuuze kittaphi mmote enraaye toono: ‘Tothoro ojivonise omweenyewe! Orette mmuti mwawo mphu minjuza nisiiliyeeyo epile orettiyeezo Kafwaranawu.’”

²⁴Khulupa theenya yoori: “Wookhweele kiniwuuzani yoori khaavo napiyu mmote ankhupaliwaaye mmuti mwawe.

²⁵Na weekhwele wakathi wa napiyu Aliyaasi, Ezirayeele aariwo aakha oofweliwa pi amanna zaya wakathi yaafukiweevo pinku nyaakha mittatthu na nyeezi sitha, yaapuwiye jala miti zooshi.

²⁶Ila Nnyizinku khuhinrumi Aliyaasi Ezirayeele, okhule aari wiikhalaawo apale aya, khunruma Sarefathi tuniya ya Sitooni aariiwo muukha mmote woofweliwa ti mannawe.

²⁷Siikhu za napiyu Elizeewu, Ezirayeele aariwo anamakuttula a waatta, khuhiivo hatha mmote aavonisiweeyo ila Naamani wa nti wa Siiriya ti ye aavonisiweeyo otthwe.”

²⁸Atthu ooshi aari nnyupa woosifwiwamo Nnyizinku, n'oosiila mattakhuzi apale aari olupaaye Yinsa yo khwiiphiiriwa.

²⁹Khwiikariwamo nsitati mphule khulawaniwa vamwaako yaajekiweevo sitati yaya etile, yoori ansukhumele vathi.

³⁰Ila Yinsa khuvira vakatthi vaya khusala alawa.

³¹Paata ya toole Yinsa khwiishukhela sitati ya Kafwaranawu, nti wa Kalileya, khusala awaanozela siikhu ya saapatu.

³²Yo aari ooshankisiwa na onozela wawe, mwaasa yoori nttakhuzi lawe laarina ofwalume.

³³Nnyupa woosifwiwamo Nnyizinku aarimo ntthu mmote aariina sheethwani. Aphano sheethwani khunyakula na kuvu zawe zooshi araka:

³⁴“Eeee! Onnitakhela-ni weeyo Yinsa wa Nazareeti? Wateela onankameza? Miiyo kinuujuwa weeyo yoori o Ttakatthiifu wa Nnyizinku!”

³⁵Yinsa ansukisiye sheethwani araka: “Nyamala, mwaattuwe ntthu oto!” Attaaphale sheethwani khunkwisela vathi ntthu otule atthu eettaka omoona, khuhinvulalisi khumwaattuwa.

³⁶Atthu ooshi aari ooshankisiwa, khusala oozana atthaaporu: “Nttakhuzi-ni ntthi? Khwa ofwalume na owahi wawe otu onruma masheethwani khusaruwa!”

³⁷Aphano siifwa ya Yinsa yaamwazeyeliye miti zooshi za nkerekhere.

³⁸Yinsa khusaruwamo nnyupa woosifwiwamo Nnyizinku khweetta owawe Simawu. Nkhwewe Simawu aari nlwele hooma, yo khunvekelaza Yinsa yoori anvonise.

³⁹Ye khwiinama khwiikara hooma etile khunlikha, nasaapiru nunu otule khulankha khusala awaarumeyela.

⁴⁰Njuwa litupweelaka atthu ooshi apale aariina marati khusala atiiseliwa Yinsa, Ye n'oowaattheela makhono n'oowaavonisa.

⁴¹Theenya aarivo atthu a waatta aari owaasaruwaaye masheethwani anyakulaka araka: “Weeyo o mwaana wa Nnyizinku!” Yinsa khusala amaruwa alikhisaka masheethwani apale ottakhula, maana yo aari ojuwa yoori ye ti Al-Masiihu.

⁴²N'oocha Yinsa khulankha khusala alawa mmakuluttu. Atthu a waatta khusala amweekesa, n'onsikana khuhisala atakha onlikha olawa.

⁴³Ye khuwooza yoori: “Enhithajiya theenya miiyo olawa sitati kiina olaleya hapari zoofwalume wa Nnyizinku, kaperekheliwa etthiipo.”

⁴⁴Ye aari otafusiri mmanyupa woosifwiwamo Nnyizinku a Yudeya.