Luka 4:15-44

¹⁵Inbe kanakana ngan ole ilo rumu kidi Yuda ke gaongo in lono, lo ipatomonai di tooltool. Ngan le di tooltool tina ngan le imot tiyitmaka ene.

¹⁶Motong Yesu ipa mulu a ila pang ye malala mai Nasaret, ye ni tani yo ya kase ngan iyepe le lo ya mai ye i. Le nga ye lal kidi Yuda ke sungunu in pombe, ngan ilo rumu kidi Yuda ke gaongo in lono, ben tina yo iyei kanakana nga. Ilo lo ikodo dama, inbe ikinkata betanga yo iken ye Rau ke Maro in pang di tooltool.

¹⁷Motong la tikaua rau ke Maro koonoo yo Esai in panga. Le nga be iperenaii ngan ipuske betanga yo iken ye rau tani in iwete nen,

¹⁸“Tool Mai Amunu si iyepe yau, yesoo ya taunu ipootau be akaua bingi dook mata pang di tooltool yo ballingadi tiap nga. Inbe iwangau be si awete pang di tooltool yo tiyepe rumu dook tiap kidi talnga dikidiki lono nga, ngan be tipas a tisi tana; inbe akarata di tooltool yo mata kis nga, a be nen ngan matadi rere mulu; inbe alon di tooltool yo diedi tiyei di dook tiap a tikaua urata moonoo dook tiap pang di nga, a be nen ngan tisolo urata moonoo dook tiap tani in mulu be.

¹⁹Inbe iwangau be si akaua bingi pang di tooltool nen, be nookoot nga i lal ke Tool Mai yo be si iyei urata dook mata pang di tooltool ye i.”

²⁰Motong la Yesu ilulu rau tani mulu, inbe ipamule pang tool yo matan kala rau i, inbe du iwur. Le nga di tooltool tina yo tiyepe rumu ke gaongo tani in lono nga, ngan matadi kenen ye.

²¹Motong la iwete pang di nen, “Betanga ke Maro yo iken ye rau ki a kalonga i, in nookoot katai nga kanono pombe moolmool.”

²²Di tooltool tina tilongo betanga dook mata yo iwete nga, le titakrai ye, inbe tiyitmaka ene. Bong ngan di tapdi tipartortor a tiyei ne, “Ai, tool i Yosep natunu, too? E nga yelei be le iwete betanga nen nga?”

²³Ngan nen le Yesu iwete pang di nen, “Ang nga lok galanga yang be ole kakatte betanga atu pau ye betanga kidi maimai kiang yo muku ngan tiweta i. Ole kayei ne, ‘Tool ke bar be nen ngan ong taum kukaratong ngan.’ Ngan ole kawete pau be ayei mos sa ye malala kiau tauk i a be kakamata, dawa ben mos yo kalongo ayei pang di tooltool ke Kapenam nga.”

²⁴Motong la Yesu iwete pang di mulu nen, “Awete pang moolmool nen, tool yo Maro koonoo i ke be di tooltool ke malala ki tilongo betanga ki tiap.

²⁵Kapalongo, muku ngan ye lal yo ke Ilia i, ngan di garup tap ke Isrel alunu kaiye la tiyepe nga. Ngan ye kene tani, in ke kan le ki imol tiap ye rai tol inbe taudu limi be atu, le pitolo mai pombe ye tana maimai nga le imot.

²⁶Bong Maro iwanga Ilia pang ye di garup tap yo tiyepe Isrel, ngan siap. Bong iwanga a ilo pang ye garup tap yo iyepe Serepat potai pang ye malala mai Saidon i.

²⁷Inbe kene san, ye lal ke Maro koonoo yo Ilisa in nga, ngan di tooltool alunu ke Isrel la botoboto medana in ikan di nga. Bong di tooltool tina yo ke Isrel ngan sa tinini dook mata mulu tiap. Bong Naiman ataleu ke tana mai san Siria in la tinini dook mata mulu i.”

²⁸Yesu iwete nen le di tooltool le imot yo tiyepe rumu ke gaongo tani a tilongo betanga ki nga, ngan katedi malmal dook tiap.

²⁹Inbe timadit tina le tinganga Yesu be ikoo ye malala mai tani a idu diki. Motong la tikauu a tilo ye arono matana yo tikarata malala mai ye i, a be nen ngan tikauu a tikatte du ke madini ye ni yo dook tiap i.

³⁰Bong Yesu ipa le ipalanai di tooltool budanga mai tina ngan a ila.

³¹Motong la Yesu idu iyepe ye malala mai Kapenam yo iken ye tana mai Galili i. Le nga lal kidi Yuda ke sungunu pombe, ngan Yesu ilo ye rumu kidi Yuda ke gaongo, inbe ipatomonai di tooltool.

³²Ngan le di Yuda tina titakrai ye patomonaingi ki, yesoo betanga ki ipa ye gurana ke Maro.

³³Inbe ye kene tani, in tool atu iyepe ye rumu ke gaongo tani, bong tool tani in so sadi iyepe ye. Le so sadi idiwidiwoo le nga koonoo le somai. Iyei ne,

³⁴“Atoo! Yesu ke Nasaret, ngan soo so be kuyeii pam i? Nga kuman be man kugarungam, too? Au i lok galanga yong oo, ong in Tool Tani Yo Maro Ipootoo Panga Ya Taunu I.”

³⁵Motong la Yesu ipasak pang so sadi tani a iwete katkat panga. Iyei ne, “Ai, kuwetewete dookoot! Kupas ye tool in a kusi tana!” Motong la so sadi ikatte tool tani du tana sila dama kidi tooltool tina, inbe ipas a ikoo, bong igarungu tiap.

³⁶Ngan nen le di tooltool tina tikamata le nga titakrai, inbe tiwete pang di diedi nen, “Ona tiap! I soo patomonaingi nen i na? Patomonaingi ki ipa ye gurana mai san, le ipas le iwete leu, inbe di so sadi tilongo betanga ki a tikoo!”

³⁷Le nga bingi ke so tina yo Yesu iyei nga, ngan ipa a ingaua tana mai i le imot.

³⁸Yesu imadit a iyege rumu kidi Yuda ke gaongo tani, inbe ipa a ilo pang ye rumu ke Simon. Ngan Simon roonoo garup in matamatenge ikauu le tinin yes mai san. Le nga titoro Yesu be iloni.

³⁹Motong Yesu la ikodo le iture pang ye, inbe ipasak pang matamatenge be ikoo ye garup tani, ngan le matamatenge tani in ikoo ye. Motong la palbe leu be garup tani imadit a ikarata kaningi pang di be tikan.

⁴⁰Tiyepe a pang rrai, ngan di tooltool yo matamatenge mai ikap di nga, ngan di sokadi tiyau di a tilo pang ye Yesu. Motong la Yesu ipaloko baene lo di tooltool tina ngan di atu atu podi, le matamatenge kidi imot inbe tinidi dook mata mulu.

⁴¹Inbe di so sadi tina yo inganga di ye di tooltool nga, ngan tipas a tikoo ye di, inbe koodi le mai nen, “Ong in Maro natunu!” Ngan tiwete nen, yesoo di ngan lodi galanga ye be ya in Kirisi. Bong ngan Yesu ipasak pang di, inbe ilele di be tiwetewete be.

⁴²Muntu bong mai koot, inbe Yesu imadit tina ngan le ipa pang ye ni yo taukan tooltool i. Motong la di tooltool timadit a nga tisere. Le nga tisere a tipuske, motong la tiwete panga be ipa be, bong be sila iye di tiyepe.

⁴³Bong ngan iwete pang di nen, “Au i, Maro iwangau be si apa be araia bingi dook mata ke dada yo Maro be matan kala di tooltool ki ye i, in pang di malala kapala lapau. Yesoo, ye punu naii la Maro iwangau a asi ye i.”

⁴⁴Ngan nen le ipa ye tana mai Yudia le imot, inbe ilo rumu kidi Yuda ke gaongo a lo iraia bingi dook mata pang di tooltool a tilonga.