Luk 4:15-44

¹⁵Pe iro hinuwani hu ndramat nondriya hu yumwa totohun tahu, pe hu masih ara huro hari ngalan.

¹⁶Pe Yesu ara imui iya Nasaret, kol mepo imandra iro aliy. Pe iro mwonen lang Sapat, yiy iya nondriya yumwa totohun, tehe ngara kiro mbusiy. Pwen itine para kipohowe nongan.

¹⁷Pe huiki puk maiye ata poropet Yisayah iya kili yiy. Pwen ilombuliy, pe ikahi nongan sahin mepo Yisayah kinratuluwiy pwen ita, ara ipa toro:

¹⁸“Mwoiwa Yapan ara iripo ndrito, paratesah, kintakinimo pwen para kupohowe nongan hiyan kiya kili hu mepo hundroisiy. Yiy ipwandrisa yo usa, para kupwahara nongan kiya kili hu ndramat hu tora nondriya kou, para hu kasa ngawan, pe hu ndramat marahu iyoh ara hu kanimnim paiwe, pe hu hiyeh hutora nondriya nopwaran ara hu koro mwoimwoi.

¹⁹Pe para kupwahara nongan tehe hayou iye ara lenge Yapan para kipwaingani pahas tan kiya kili ndramiran hu.”

²⁰Pwen imaiyani puk ara, pe iykiy imui iya kili ndramat para ponokule hu puk, pe yiy impwan. Pe marahu ndramat masih huro nondriya yumwa totohun, ara itis tan.

²¹Pe Yesu ipwai iya kili hu, ipa, “Mahapo nongan haiyan iye ara kintayah mannan kinsa tahilong tawawu.”

²²Pwen hu masih husikiye yiy, pe huro lohonge soyon iya nongan para koisirai mepo iyau pohon. Pe huro sok, hupa; “Aripo noru Yosep, ndre?”

²³Pwen Yesu ipwai iya kili hu, ipa, “Matisan wawu pakatiyani paya nongan sahin iye kisa kili yo: ‘Ndrokta, asopwoyani wou mbukenam!’ Tesah mepo anmbusiy pwen iro Kapernawum, ara ambusiy tehen aliy opu kiro kolom imwonen iye.

²⁴Upwai ndrokonan isa kili wawu toro: poropet hamou kiro ndrohokolon imwonen, ara ndramiran hu andre kanhilingi nongnan pwi.

²⁵Yo upwai ndrokonan isa kili wawu, tehe hu pihinau soyon iya huro nondriya Yisrayel, iro mwonen lenge Eliyah. Pe iro tandrohongan ara, karam para kol paingan yang ara Yapan iwariy, pe mbulou ara kindrut hayou royoh pe sahin pwi, pe mundruwai namandran iya, ara isilihi kol masih.

²⁶Hapeko Ngindrai kinpwandrisa Eliyah kinna kili pihinau hamou para Yisrayel pwi; ipwandrisa yiy iya kili pihinau hamou iro kol ngawan Sarepat ita nondriya kol namandran hape Siton.

²⁷Pe tandrohonga Elisa ara iro poropet, hu ndramat soyon iya huro Yisrayel, ara mwamwa kawa ilopwa hu. Hapeko iho mwalinga hu masih ara, Naaman ndramira Siriya kopu, ara mwamwa kawa iro kili yiy ihiwin.”

²⁸Hu ndramat masih huro yumwa totohun ara, ara huhulingi nongnan aro, pe ndriyahu isin.

²⁹Pwen hutine pe hurasses yiy iya ngawan kol ara. Pe huwiri yiy iya mbusupahayi mepo kol ngawan iro aliy, para hu pakatinihi yiy kiya pwan.

³⁰Hapeko irasisinge yiy mwalingahu ko, pe iyau.

³¹Pwen Yesu iyau iya kol ngawan Kapernawum ita nondriya kol namandran hape Kaliliy. Pwen lang Sapat isarayah pe yiy iya pe iro hinuwani hu ndramat.

³²Pe yihu ara huro lohonge ndrit iya nongnan mepo iro hinuwani hu iya aliy, paratesah, nongnan ara nopwaran.

³³Pe ndramat hamou iro yumwa totohun ariya, ara payit mwomwan iro ndritan, pe iwayeh namandran iya ipa,

³⁴“Yah! Yesu para Nasaret! Wou nasahaye yowu? Wou asa para apwalngani yowu, ndre? Yo ara upahasani wou hiyeh—wou ara Ndramat Haiyan ata Ngindrai!”

³⁵Pe Yesu ipalngai ana payit, ipa, “Amun opu! Pe atali yiy asa ngawan!” Pwen payit ara ipiyani ndramat ara iro pwan mbulmara hu masih, pe isa ngawan kili yiy pe kinpotisi ndramat ara pwi.

³⁶Pwen hu ndramat masih huro lohonge ndrit, pe hamou iro pwai iya kili hamou, huro pa, “Aripo sehe nongan, eh? Ipwandrandrahani hu payit iyapolo nongan nopwaran pe pwokeyan, pwen husa mawen!”

³⁷Pwen pe nola Yesu ara ingau pe isilihi kol namandran hape ara.

³⁸Yesu itali yumwa totohun mepo iro aliy, pe isong iya nondriya seu ta Simon. Pe nossu Simon, ara iro nondriya ngandran pe mandran ingandrah iya. Pwen pe husike Yesu para kisopwat yiy.

³⁹Pwen Yesu iya pe iro tine ngilsen, pe ipomate mandran ngandrahan ara, pe itali yiy. Pwen pihin ara itine porosih o, pe ipo mbulyan.

⁴⁰Iro mwonen paramwandrai nakiya lai, pwen hu ndramat huwiri hu mepo mwamwa handra-handra iro kili hu, ara husa kili Yesu. Pe iyki niman iya ndrita hamou-hamou tahu, pe isopwoyani hu pe hungoh.

⁴¹Pe hu payit husa mawen kili hu ndramat soyon iya, pe hu payit huro wayeh, huro pa, “Wou ara Noru Ngindrai!” Hapeko ipomate hu, pe isiyi pohohu para hu mbuna kawong, paratesah, tanahu tehe yiy ara Kristus.

⁴²Pe lang imbungahiy o, Yesu yiy opu iyau iya pe iro kol hape imanun. Pe hu ndramat huro ten yiy, pe iro mwonen husa hape aleheh mepo iro aliy, pwen hu pakakaituwe yiy para mbuna kitali hu.

⁴³Hapeko ipwai iya kili hu, ipa, “Nongan hiyan para kolo King Ngindrai iye, ara andre kuya pohowei kiya hu kol ngawan hayah i, paratesah, Ngindrai ipwandrisa yo usa, ara para kumbulyani mbulen iye.”

⁴⁴Pe yiy iro pohowe nongan manau, iya nondriya hu yumwa totohun para kol namandran hape Yutiya.