Luqaasa 2:12-51

¹²Carqara xaaxeti ichchida gacino naa demmandeta hessika intes malata gido” gides.

¹³Izarakka hara daro salo kiitanchati beettida. Xoossa galatishe,

¹⁴“Bolla salon Xoossas bonchoy gido sarotethika biitta bollan izi dosiza asa ubbas gido” gida.

¹⁵Kiitanchati istafe shaaketidi salo simmin dorse heemizayti ba giddon issoy issa “Ane ha yiite Goday nuus qoncisidayssanne hanidayssa Beeteleme katama biidi beyoos” gida.

¹⁶Istika elelli biidi Maaramira, Yooseferanne miiza sinthan ichchida naaza demmida.

¹⁷Beydayssafe guyen Goda kiitanchay naaza gish istas yootidayssa wursi zaari yootida.

¹⁸Heemizayti yootidayssa siyida asay wuri keehi malalettides.

¹⁹Gido attin Maarama yo7oza wursa ba woznan wotha dentha qoppashe gam7adus.

²⁰Heemizaytikka handays wurikka kiitanchay istas yootida mala gididi beettida gish siydayssassinne beyidayssas ubbas Xoossa galatishenne bonchishe simmida.

²¹Naazi yeletin ospuntha gallassan qaxxarettiza wodey gakkin aayeya iza qanthatanappe kase kiitanchay gida mala Yesusa geetettidi summides.

²²Muse woga mala isti geeyiza wodey wurin Yoosefeynne Maarama guutha naa Yesusa Goda Xoossa sinthe shiishshanaas ekkidi Yerusalame kezida. Hessika Goda wogan koyro yeletiza attuma nay wuri Godas dumma gidana geetettidi xaafettidayssa polanassinne

²⁴qasseka Goda wogan nam7u haraphphe kafotanne woykko nam7u haraphphe kafo ciyeta geetettiddayssa mala yarsho shiishshanaassa.

²⁵He wode Yerusalame kataman xillonne Xoossa babbiza issi Simoona geetettiza asi dees; izikka Isra7eele nayta atotetha naagiza asanne Xillo Ayanay iza bolla shempida asa.

²⁶Qasseka Kirstoosa beyonta dishe hayqqonta mala Xillo Ayanay izas qoncides.

²⁷Izikka he wode Xillo Ayanay kaalethin Xoossa Keeththe lasha gaath gelides. Naaza aayeyiranne aawara Muse wogan bessizayssa polanas guutha naa Yesusa ekkidi gelida wode,

²⁸Simooni naaza ekki idimmidi Xoossa galatishe,

²⁹“Godo! Ne caaqida qaala mala ha7i tani ne aylley ne ashshizayssa ta ayfera beyida gish hi7a tana saron ekka; asa ubba sinthan ne giigissida atotetha ha7i tani ta ayfera beyadis.

³²Hayssika ubba deres geemmettidayssa qoncisiza poo7o, ne dere Isra7eelesikka boncho” gides.

³³Iza aawaynne aaya iza gish haasayettida yo7ozan malalettida.

³⁴Simoonikka ista anjides; Maaramokka “Daro asa wozna qofay qoncana mala hayssi Isra7eelen diza darotas dhayossinne atotethassa; Iza ixizaytas qasse malata gidana mala doorettides.

³⁵Qasseka darota wozna qofay qoncana mala naaza mishay qara mashsha mala ne wozna phalqana” gides.

³⁶Qasseka Aasseere baggafe Fanu7eele naa Haana geetettiza cimmida nabey dawus; izakka ba koyro azinara laapun layth kumeth de7adus.

³⁷Laythay izis osupun tammanne oyddu layth gidana gakkanaas qammanne gallas xoomashenne woossashe Xoossa Keeththafe shaaketonta am7etethan gam7adus.

³⁸He wodekka shiiqada Xoossa galatadus. Yerusalame wozeteth naagishe dizaytas ubbas guutha naaza gish yootadus.

³⁹Yooseferanne Maaramira Goda wogan azazettidayssa polidi Galila awurajjan diza baso Naazirete katama simmida.

⁴⁰Guutha naazikka diccidi minni minni bides; aadhdho eratethan kumides; Xoossa aadhdho kiyatethayka iza bolla dees.

⁴¹Iza aawaynne aaya laythan laythan Paaziga bonchanas Yerusalame beettes.

⁴²Naazas laythay tammanne nam7u layth kumida wode kase lose gididayssa mala Paaziga bonchana kezida.

⁴³Paaziga ba7aaleza bonchidi baso simmishin Yesusi Yerusalamen attides. Yelidaytikka izi attiddayssa eribeyttenna.

⁴⁴Banara issife biza oge asara dees gishe issi gallassa oge bida. Gido attin izi istara bayndayssa eridi ba dabbota achchaninne laggeta achchan dizaakkonne giidi koyda.

⁴⁵Koyi koydi beettonta ixin Yerusalame simmida.

⁴⁶Heedzdzu gallassafe guye Xoossa Keeththan tamarsizayta giddon uttidi siyishe, asata oychishenne ista oysha zaarishe Xoossa Keeththan dishin demmida.

⁴⁷Siyidayti wuri Yesusa akeekkaninne iza zaarozan daro malalettida.

⁴⁸Yoosefeynne Maarama iza beyida wode malalettida. Maaramakka “Ta naazo ays hayssa mala ooththadii? Ne aawaynne taninne nena koyishe keehi metottettidos” gadus.

⁴⁹Izikka zaaridi “Tana ays koyidetii? Tani ta aawa keeththan daanas bessizayssa eribeekketi” gides.

⁵⁰Gido attin istas izi yootidayssi gelibenna.

⁵¹Heeppe simmin istara issife Naazirete wodhdhidi istas azazettishe de7ides. Iza aaya Maaramakka he hanida miisha wursa ba woznan naagashe gam7adus.