Luka 2:12-51

¹²Heiheinoina ede meta; Bebe abo au lobai lulu eai se suma, bulumakau edi abaaiai hatahatana eai se heota.”

¹³Ma esega galewa tataodi moutuadi aneru maedi se heoiesegaidi Eaubada se aihelahui, si ene,

¹⁴“Dimo ewa puripurina eai Eaubada se hedebasae eo tanoubu se loni, ena nuatu lolona tatao aridi eai.”

¹⁵Aneru wa se laugabaedi se uio galewa eai, mamoe tauitawataidi se ribariba si ene, “Ta torohai, ta lau Betelehema eai wau ginauri wa ie tubu wa hage ta ita, ia ede Guiau i heriba nonohaida wa.”

¹⁶Se lau heuheulama Maria eo Iosepa se lobaidi, bebe hinage bulumakau edi abaaiai hatahatana eai se heota.

¹⁷Se ita nonohai abo gama wa ribana aneru se heribadi wa abo se wasaduaiei.

¹⁸Isi wau riba tauataiena wa mamoe tauitawataidi edi riba se nooedi.

¹⁹Na Maria teina ginauri gamagaridi i abididinidi, eo nuaboeana eai i nuatuwataidi.

²⁰Mamoe tauitawataidi abo se uio, ginauri gamagaridi se ataiedi, eo se itadi doha se heribadi wa, aridi eai Eaubada se hedebasaei eo se aihelahui.

²¹Asubena haligigi‐haiona se ohi gama wa abo se heperitome, esana se tore ede IESU, doha aneru i tore nonohaiyao sora nige sinana i abiabi.

²²Ena asubena headi wa se ohi, doha Mose heaa laugagaeona i ribaei wa, ia abo se bahesae Ierusalema eai, bena se mosei Guiau arinai;

²³(Doha Guiau ena laugagaeo eai se uri, si ene, “Ealahou merumeru tatao gamagaridi Guiau arinai u hetabuedi;”)

²⁴Aitalasam se ginauri doha Guiau ena laugagaeo eai se ribaei, “Bunebune labui, e gabubu labui.”

²⁵Na, tau esau Ierusalema eai ie mia esana ede Simeona; ia ede tau wa ena laulau se dudurai eo Eaubada matausina i matausi, ia Isaraela abahenuabigadi i bagibagiei; Earua Tabuna ia potana eai ie ota.

²⁶Earua Tabuna tau wa i heribanonohaiyao, mate taba nige i ita, Guiau ena Keriso sora i ita bagunai.

²⁷Earua Tabuna ia i woeai numa uura alona eai: tamana, sinana, merumeru Iesu se leama bena laugagaeo laulauna se abiwatai.

²⁸I abilau nimana eai i labasi, Eaubada i aihelahui, i ene.

²⁹“Guiau e, em heaheari tauna abo i lautom ede ina, ma nualologu, doha hinage u ribaei:

³⁰paana em abaabihemauri matagu eai ea itayao.

³¹Ia ede u abinonohai tatao gamagamagaridi matadi eai;

³²marana eai arinai Etene abo se hemaradi, Isaraela tataodi edi abahedebasaedi.”

³³Iosepa eo ia sinana meta ginauri ia arinai se ribaedi se nooedi.

³⁴Simeona isi i aihelahuidi, i ribalau ia sinana Maria arinai, i ene, “Teina merumeru ta debana eai Isaraela eai gamagaridi abo se beu, eo gamagaridi hinage abo se toro; eo ia heiheinoina hinage abo se alaliuliuai;

³⁵(Mamohoi, elepa hinage nuam abo i gorilapai,) tatao gamagaridi edi nuatu abo se hemasarahadi.”

³⁶Peroveta sine esau esana ede Ana, Penuela natuna, sine wa Asera bogana eai: i sinesinebada ariri, ma hasarana eai wa monena arinai ie mia borimai haligigi‐labui;

³⁷borimai tataohasi‐se‐mate‐hasi ie wabu, numa uura nige i laugabaei na maiona to asubena i aiudi eo i lau‐uura, Eaubada i heaheaiei.

³⁸Ia i taulagema Eaubada i lautoiei, isi gamagaridi Ierusalema abihemaurina se bagibagiei, kaimou ribana i heribadi.

³⁹Guiau ena laugagaeo laulauna gamagaridi se abiheohidio, abo se uio Galilaia eai, edi eanua mamohoi Nasareta eai.

⁴⁰Gama wa ie tubu, i lau e i sibasibaohi ia abo i adidiri, eo i nuagilogilo, Eaubada ena nualolo ie ota ia arinai.

⁴¹Pasova mataasina huiana eai borimai gamagaridi tamana, sinana se saesae Ierusalema.

⁴²Ia ena borimai saudoudoi‐labui, mataasi abiabina wa se sae Ierusalema eai.

⁴³Asubenadi se ohi, abo se uiouio, gama wa Iesu Ierusalema eai ie bawa, Iosepa eo sinana nige se nuatui.

⁴⁴Si ene bena maedi se lau, asubena esega se uiouioi ehadiyao boeadi eai ia se eooasaeai.

⁴⁵Ia nige se lobai arinai se uio Ierusalema eai se eooi.

⁴⁶Asubena haiona se ohi, numa uura alona eai se lobai sonoga tataodi boeadi eai ie bawa, edi riba i ataiedi, eo i hesihesiolau aridi eai hinage.

⁴⁷Gamagaridi ia arinana se ataiei, ena sonoga, eo ena riba heuio, se nooedi.

⁴⁸Ia se ita se nooei, sinana i ribalau ia arinai, i ene, “Natugu e, edoha em abiabimai? Tamam eo eau ai eooeoonuanuadubuem.”

⁴⁹Ie ribalau aridi eai, i ene, “Aue saha au eooigu? Nige au nuatui tamagu ena hewau ta taba ea abi?”

⁵⁰Wau riba wa i ribalau aridi eai nige abina se ata.

⁵¹Maedi abo se lauesega, abo se lage Nasareta eai, i awaabiedi: ia sinana teina ginauri gamagaridi nuaboeana eai i toreyamuidi.