Uluka 2:12-51

¹²Ma saa me mazigenme sa adi nya shi, idi iri vana a impo me imma pori anata me hungu”.

¹³Sārki ucara uganiyan wa iri nigura nanuu nan Bibe bikadura ka Asere unu nonzo Asere innugusa.

¹⁴“Ninonzo na Asere unaza, nan ticukum tihuma acee anu nee nan de sa ma kunna urunta ume”.

¹⁵Abiki uganiya me sa Bibe bika dura ka Asere ba dusa anyimo a seseri, ani tam me wa gun nacece “Ca tihaa ubaitalami, tika iri imum igeme sa takunna sa Asere abukan duru”.

¹⁶Wa haa dibe-dibe waka kem Maryamu nan Isubu wan vana me anata uhungu.

¹⁷Sa wa ira me, wa buki anu imum me sa abuka we anicee ne vana me.

¹⁸Vat ande sa wa kunna icukuno Imum ugamara imum me sa anu hira itam me wa buka.

¹⁹Maryamu ma meki ubassa utimum me sa ma kunna, unu gamara me Iruba.

²⁰Anu hira itam me wa kuri. Ininonzo nan ununonzo Asere, barki imum me sa wa kunna, wa ira, ka si ubuka me sa wa kunna.

²¹Sa tiyee uwito-utari ta wuna sa adi gbari me, anya me niza Yeso, niza me sa Bibe bika dura ka Asere ba nyame ada Sārki uzika apuru amè.

²²Sa tiyee tusuro tawuna kasi u' inko utize ta Asere “Vat utuba uyoo uruma adi witi Asere me”.

²³Kasi unyertike U' inko utize ta Asere “Vat utuba uyoo uruma adi witi Asere me”.

²⁴Wa nya me unyanki kasi u' inko utize ta Asere “Mu hurbe muni muree nan matatabara marce”.

²⁵Ure unyu marani ujerusalem niza nume Siman, una biyan ba Asere mani ini ruba ilau. Mazin nunyara ubarka u Isaraila, Bibe ba Asere baazi nan me.

²⁶Bibe bilau ba Asere ba bezi me unu guna mada wono ba senke ma ira Asere Yeso.

²⁷Uru wui Bibe bilau ba Asere bihan Siman udenge Asere. An ka coo me wa ēn Yeso vana uneze, kasi utanda nan u'inko utize ta Asere.

²⁸Ma gbindirko me abigiri ma nonziko Asere ma gu.

²⁹“Aname ca urere uweme madusa inna puru arum Asere, kasi ubuka uweme.

³⁰Barki sa aje am a'era nibussi nuweme,

³¹Sa wa wuza amu hennu manun vat.

³²Ma saa mani mati roo uhana anuu uzati utarsa Asere nan ninonzo uhana anuu aweme Isarailawa”.

³³Acoo avana me nan ka inoo we wa kunna urunta imum me sa mubuka.

³⁴Siman ma nonziko we ma gun Maryamu a inoo me “Kunna memmerum Vana ugeme madi cukuno unaa urizo nan uhira wa nun gbardang anyimo Isaraila nan ubezi sa adi nyarime.

³⁵Uvira udi watti iruba iweme bati arusi muruba manu”.

³⁶Unun kurzuzo utize ta Asere ahiran me unani zaa Hanatu. Ucaa ufanuyila nilem ni Ashiru mamu wuna uwari kang. Wa wuu tiwee usunare inna nyaa nan uruma umeme.

³⁷Ma zi'inti wee a'ino-uwitotari intini tinazi (84 years). Daki maceki udenge Asere ba inka tuma unu canti anyoo nan biringara niyee nan nuwui.

³⁸Uganiya me ma nyene uhana ahira awe unu nonzo Asere, ma buki vat ande sa waazin nubee uburu Urshalima abanga a vana me.

³⁹Sa wa mara kondi nyani wa wuzi kasi u inko utize ta Asere, wa kuri Ugalili ani pin nuweme Unazarat.

⁴⁰Vaname ma uu mawu nikara, nan ukingizi urusa, nan ubenki Asere anicee nume.

⁴¹Anka coo me waka haa Ujerusalem ingi niwee na kette barki u'idin Faska.

⁴²Sa mawuna tiwe ukirau-tire, Wa kuri kurri uganiya u'idi utanda.

⁴³Sa tiyee tu idi ta mara, wa tubi kurso ati kura. Yeso ma dii adumo Ujerusalem Sārki urusan anka coo me.

⁴⁴Wa bassa nan mazi nanni goo nanume sa wa haka nan we, wa hiri tanu. Wa tubi u nyara ume anyimo anu turra uweme nan aronni.

⁴⁵Sa daki wa ira me ba, wa kuri Ujerusalem waka tunguno unyara ume abini me.

⁴⁶Wawu tiyee titaru unu nyara ume wa tinka me udenge Asere, ma ciki atii anu bezizi, unu kunna nan nu'igizo uwe.

⁴⁷Vat andee sa wa kunna me wa meki ugamara urusa nan ukabara umeme.

⁴⁸Sa wa ira me wa meki ugamara me kang. A'inome ma gun me “Vana, nyanini wa wuzan duru aname? Kunna, acoo uweme nan mi tizin nunyara uwe unu curnome Iruba”.

⁴⁹Ma gun we, “Barki nyani izin nunyan um? Ita shi izi gbass incukuno akura acou um ba?”

⁵⁰Daki wa rusa imum sa ma boo ba.

⁵¹Ma dusa akura nan we Unazarat ma tarsi tize tuweme. A'ino me ma inki Vat timum tigeme Iruba.