Luka 2:12-51

¹²Akava ka ovel tumenđe znako palo savo ka pendžaren le: ka arakhen e čhavore paćarde hem sar pašljola ano jasle.”

¹³Otojekhvar uzalo anđeo pojavinđa pe bari vojska e anđelendar koja hvalinđa e Devle vaćerindoj:

¹⁴“Slava ko učipe e Devlese a ki phuv mir e manušenđe kolencar o Devel zadovoljno!”

¹⁵I ked o anđelja irinde pe ko nebo, o pastirija phende jekh averese: “Hajde te dža đi o Vitlejem hem te dikha adava so ulo, so phenđa amenđe o Gospod.”

¹⁶I džele sigate, i arakhle e Marija, e Josife hem e čhavore sar pašljola ano jasle.

¹⁷A ked dikhle e čhavore, vaćerde averenđe sa so ine lenđe phendo e čhavorestar.

¹⁸I sare kola šunde e pastiren inele zadivime.

¹⁹A i Marija pamtinđa sa so vaćerde laće hem razmislinđa adalestar.

²⁰I o pastirija dželefse slavindoj hem hvalindoj e Devle za sa okova so šunde hem so dikhle ađahar sar so ine lenđe vaćerdo.

²¹Ked nakhine ofto dive, ked e čhavore valjande te obrezinen, dinde le anav Isus–sar so vičinđa le o anđeo angleder so i Marija ačhili khamni.

²²Ked alo o vreme zako adeti e dajakere kosljaribnasoro savo palo e Mojsijasoro zakoni valjanđa te ćerel pe palo adava so o čhavoro bijanđola, ande e Isuse ano hram ko Jerusalim te preden le e Gospodese

²³(sar so pisini ano zakoni e Gospodesoro: “Đijekh murš prvenco te ovel posvetime e Gospodese”)

²⁴hem te den žrtva (sar soi vaćerdo ano zakoni e Gospodesoro: “duj grlice ili duj terne golubija”).

²⁵I tegani ano Jerusalim inele manuš palo anav Simeon. Ov inele pravedno hem pobožno. Adžićeri ine te avel o Mesija te spasini e Izraelconen hem o Sveto Duho inele upro leste.

²⁶O Sveto Duho mothovđa lese da angleder so ka merel, ka dikhel e Mesija e Gospodesere.

²⁷I o Sveto Duho phenđa lese te džal ko Hram, i ov dželo. Tegani o Josif hem i Marija ande e čhavore e Isuse ano Hram sar te ćeren o adeti savoi palo e Mojsijasoro zakoni.

²⁸Ked o Simeon dikhlja e čhavore e Isuse, lelja le ki angali hem hvalinđa e Devle vaćerindoj:

²⁹“Gospode, akana šaj me, o sluga klo, te merav ano mir sar so phenđan maje.

³⁰Adalese so mle jaćha dikhle o spasenje savo avela tutar

³¹savo spreminđan anglo sa o nacije.

³²Akava spasenje ka ovel svetlo te mothoj tut avere nacijenđe hem anela slava te narodose, e Izraelconenđe.”

³³E Isusesoro dad hem i daj divinde pe adaleja so o Simeon vaćerđa olestar.

³⁴Tegani o Simeon blagoslovinđa len hem phenđa e Marijaće, e Isusesere dajaće: “Dikh, akavai čhavoro birime te ćerel buten ano Izrael te peren hem bute averen te ušten. Ovi odredime te ovel e Devlesoro znako, ali but džene ka odbacinen le.

³⁵Adava ka ovel sar te mothoven pe bute manušengere garavde mislija. A o mači ka posaj ti duša.”

³⁶A adari da inele i proročica i Ana, i čhaj e Fanuilesiri, oto pleme e Asiresoro. Oj inele ano purane berša. Efta berš živinđa ple romeja,

³⁷a palo adava živinđa sar udovica đi oftovardešuštarto berš. Stalno inele ano Hram, i dive i rat slavinđa e Devle ano postiba hem ano moliba.

³⁸I samo so o Simeon završinđa ple vaćeribnaja, i Ana nakhini đi o Josif hem i Marija zahvalindoj e Devlese zako čhavoro. I lelja te vaćeri e čhavorestar sarijenđe adari kola adžićerde upro Devel te oslobodini o Jerusalim.

³⁹Ked o Josif hem i Marija ćerde sa soi palo zakoni e Gospodesoro phendo te ćeren e čhavoresoro dad hem i daj, irinde pe ki pumari diz Nazaret ki Galileja.

⁴⁰A o čhavoro barjola ine hem zoraljola. Pherđola ine mudrost hem i milost e Devlesiri inele upro leste.

⁴¹E Isusesoro dad hem i daj đijekh berš džana ine ko Jerusalim zako prazniko Pasha.

⁴²Ked e Isuse ine dešuduj berš, palo adeti, hem ov dželo olencar te slavini o prazniko ko Jerusalim.

⁴³Ked nakhino o prazniko, o Josif hem i Marija lelje te džanfse, a na džande so lengoro čhavo o Isus ačhilo ano Jerusalim.

⁴⁴Sar mislinde dai o Isus maškaro manuša kola putujinde olencar, džele jekh dive phirindoj i lelje te roden le maškaro pumarende hem maškaro pendžarutne.

⁴⁵I ked našti ine te arakhen le, irinde pe ko Jerusalim te roden le.

⁴⁶I o trito dive arakhle le ano Hram sar bešela maškaro e verakere učitelja, sar šunela len hem pučela len.

⁴⁷I sare kola šunde e Isuse, divinde pe lesere džandipnase hem lesere iribnase ko pučiba.

⁴⁸I ked dikhlja le lesoro dad hem lesiri daj, inele iznenadime. Lesiri daj phenđa lese: “Vaćer sose adava ćerđan amenđe, mlo čhavo? To dad hem me but darandiljam hem rodinđam tut!”

⁴⁹A o Isus pučlja len: “Sose rodinđen man? Na džanđen li so valjani te ovav ano mle Dadesoro čher?”

⁵⁰A i Marija hem o Josif na xalile so o Isus manglja te phenel lenđe adaleja.

⁵¹I palo adava, o Isus irinđa pe olencar ko Nazaret hem ine lenđe poslušno. A lesiri daj ićerđa pese ano vilo sa adava so ulo.