Luku 12:15-55

¹⁵Dopa latala baame dokaita lamaiyoo, “Endakali mendenya oapi longo setenge dupame baa auu pyoo katena lao nisala naenge dokonya nyakamame oapi putiti kaenge dupanya mendeme koyasetana kandao wandyuu kalyepape,” lea-pyaa.

¹⁶Dopa latala baame kongali pii mende dokaita dapa lao lamaiya-pyaa: “Wamba oapi longo setenge akali mende kateamo dokonya ee dokonya nee longo andea-pyaa.

¹⁷Andeamopa baanya moname dapa lao masia-pyaa: ‘Nambanya nee dupa nyoo setapenge panda nasilyamo doko aipa pito laape?’ lao masowaka katea-pyaa.

¹⁸Dopa lao masetala, ‘Nambame dapa pitoo: indupa nambame nambanya nee setenge anda dupa lakyepala dee andake pyoo petapeta pitoo. Dopa petala nambanya wiisa dupa pitakapi oapi epe dupapi anda dutupanya nyoo setatona,’ lao masia-pyaa.

¹⁹Dopa lao masetala baame baa tange lamaiyoo, ‘Nambanya oapi epe longo dupa ee kana longo dupa-pipa kapa lao silyamo. Namba mee koto katapapu neepi endakipi dupa nao mona yaepao katatoana,’ lea-pyaa.

²⁰Oapi longo setenge akali dokome dopa leamoaka doko, Goteme baa lamaiyoo, ‘Emba akali mona napalenge lamo! Indupa kuka gii dakenya emba kapa pao kumalapeno. Dokopa oapi embanya nyoo limbateleno dupa pitaka apinya jetape?’ lea-pyaa.

²¹Dee nyakamame oapi longo nyoo tangenyaka limbao katao Gotenyana lao epe dupa setakamaiya nayataminopa, makande dopale dupa nyakama-kisa kapa pao ipatana,” Jisasame lea-pyaa.

²²Dokopa Jisasame baanya disaipele dutupa lamaiyoo, “Nyakamame nyakama tange auu pyoo katapenge dupanya lao masetala, ‘Naima nee aki nao katatama laa kanjemape?’ dee ‘Yonge yati akimi pitamape?’ lao nea kayala nayalapape!

²³Endakali auu pyoo katenge tenge doko neepi, endakipi, yonge yati pingipi dupa mambele daa!

²⁴Nyakamame yaka wayamu dupa masalapape. Dupame ee pokala naengema. Dupame nee mandyuu ipao nee setenge anda andakepi yakanepi mendenya mau pyala naengemaka doko, Goteme dupa nee maingina, nyakamame yaka dupa etete ita minao kalyamino.

²⁵Nyakamanya endakali mendeme baa gii longo lao katapu laka lao nea kayapala baa tangeme baanya katapenge gii dupanya ee kana mendapua waipa setape?

²⁶Nyakamame gii mendatupa apata kalyanya gii etete kukipi mende waipa sala nayapenge tamo kandao doko, aipuma opale waka dupa nea kaelyamipi?” lea-pyaa.

²⁷“Nyakamame mee tanu dupanya dii yati pipae dupa masalapape. Dupame elyoko ita pyao nuu yambalepi mende napingimaka doko, wamba akali Solomoneme baa tangenya yati tata dupa pitaka petala tanu dupanya dii yati pipae epe dopale mendeme yati pyoo nakateana lao nyakama langilyo.

²⁸Mee tanu dupa indupa iki katapelyamopa taita pokanya setapala itateme tata yangengemaka doko, Goteme tanu dopale dupa dii yati pipaeme yati pisingi! Dokaita joo baame nyakama yonge yati pingi dupa etete auu pyoo dingina, nyakama kuki iki masoo miningima lamo!

²⁹Dopana, nyakama nee aki natamape, endaki aki natamape lao masetala nea nea kayao makandala nayalapape.

³⁰Isa yuu dakenya kamalya katenge endakali dupame dopale dupa iki lao masetala nea kayao putiti kaelyamino. Dopaka doko, nyakama daa jilyamo dupa nyakamanya Takange dokome masoo kalyamo.

³¹Dopana, Goteme isina lao katapenge doko nyakamame kutao nyalapape! Dopa pitaminopa baame oapi dupa nyakama ditakana,” Jisasame lea-pyaa.

³²“Nyakama tata yakane dupa! Nyakamanya Takange dokome nyakamanya Kamongo Kiŋi katatona lao mona mendai palyetelyamona, paka nakayalapape.

³³Nyakamanya oapi dupame muni sambao nyepala, muni dupa endakali tipya dupa nisoo maiyepape. Nyakamanya muni setapenge pausa yapa lapyoo koyala naenge mende kutao nyalapape. Nyakamanya muni angi dupa alu napitana kaitinya setalapape. Kaitinya setapae dupa pake nenge endakali dupame pake nyala nayapenge. Dee kokalyapi opale mendeme nao koyasala naengeaka.

³⁴Nyakamanya oapi epe dupa setenge panda dokonyaka nyakamanya mona yukuoo setengema daape!” Jisasame lea-pyaa.

³⁵“Nyakamame nyakamanya yambale dupa lakao matapunya muu pyoo mandyuu lama kaiyepala titili petae pilyepape.

³⁶Nyakamame kendemane endakali dupanya kamongo dokome enda kelyatamo dokonya nee nao pituu ipapomona lao malisoo petengemali pyoo pilyepape. Baa ipupala kaita watawata pitamo dokopa kendemane dokaitame yapa kaita lumbamana lao malisoo petengema.

³⁷Kamongo doko ipupala kendemane depa latae pititamino dupa kandatamopa dokaitame mona yaepao pititami. Kiningi nambame nyakama langilyo. Kamongo dokome yambale lakao matapunya muu pyoo mandipala dokaita nee nao tokonya petena latala baa tangeme ipao nee setakamaita.

³⁸Baa kuka andatombe tamopi yuu yongalanya yaka pauli pii tee pyao latamopa tamopi mende ipupala kandatamopa kendemane dupa luu palya nayatamino kandao doko, mona yaepao pititamina,” lea-pyaa.

³⁹“Dee nyakamame dake masalapape: akali anda tange dokome pake nenge akali mende gii ongopa ipapomo lao wambao masetali kandao doko, baame pake nenge akali dokome anda kalupala andaka kolandena lao kayala nayatali.

⁴⁰Dopaka pyoo Endakalinya Ikiningi doko naipapomo lao masetami gii mendenyaka ipatana, nyakama depa latae kalyepape!” lea-pyaa.

⁴¹Dokopa Pitame baa lamaiyoo, “Kamongo, embame kongali pii doko naima iki kandao leepe, pande endakali pitaka kandao leepe?” lea-pyaa.

⁴²Dopa leamopa Kamongo dokome lao pituu, “Lelyamoli pyoo kalai pyakamaingi mona palenge kendemane doko apipi? Baa kamongo dokome baanya kendemane waka dupa isoo nee napenge gii dii lao mokosoo maiyoo katena lenge kendemane doko daape.

⁴³Baame kalai auu pyoaka pyoo katatamopa baanya kamongo doko andaka pilyoo ipatamopa, baa mona yaepata.

⁴⁴Nambame nyakama kiningi langilyo, kamongo dokome baanya oapi dupa pitaka baanya kendemane dokome isoo katena lata.

⁴⁵Dopaka doko, kendemane dokome nambanya kamongo doko yapa naipapomona lao masetala, awapa kalai pingi kendemane enda akalipi dupa pyapapu neepi waenepi dupa longo nao kyakao katatamo kandao doko, baanya kamongo doko naipapomo lao masoo ambe lao katatamo gii dokopaka ipata. Ipupala baame kendemane doko etete pyao indyepala pii tanga lenge endakali dupa-pipa kalya pena latana,” Jisasame lea-pyaa.

⁴⁷“Kendemane mendeme baanya kamongo dokome mende pipyali lao masetamo doko kandatala, watao naminao baa tangepi kalaipi dupa depa laa nayatamopa kamongo dokome baa longo lao konjame pyata.

⁴⁸Dopaka doko, kendemane mendeme baanya kamongo dokome mende pipyalina lao masetamo doko nakandao mana koo minatala kenda pipae nyepenge jetamoaka doko, isingi dokome baa konjame kuki pyata. Endakali mendeme oapi epepi mana epepi longo lao endakali mende-kisa nyepala tange longo lawaka yanu pyakamaingi. Dee endakali mendeme oapi mendapua endakali mende-kisa longo setapala mendapua apata konda pyoo yanu pyekena lengena,” Jisasame lea-pyaa.

⁴⁹“Nambame isa yuu dake tena lao ita lelya pyaanya palyala epeona yapa tapapya laka lao masilyo.

⁵⁰Nambanya kaimbu mende pyakapenge doko pyakatamino gii dokonya tuu lao mona kenda kayao kalyo.

⁵¹Nambame endakali dupa pitaka mona mendai paliuu katena lao epe yuu yongasala epeepe lao masilyamipi? Daa, nambame endakali dupa tale pisala epeona lao nyakama langilyo.

⁵²Indupapi tendapi anda mendenya endakali yuungi palitamino dupa wakale pyoloo petala tepomame lapoma dolapo kandao yandapipi jetami. Dee lapomame tepoma dutupa kandao yandapipi jetambiaka.

⁵³Ikiningi takangepa wakale pyoloo pitambi. Endangi wanengepa wakale pyoloo pitambi. Dee ayangepa wakale pyoloo pitambiakana,” Jisasame lea-pyaa.

⁵⁴Baame endakali dupa dapa lamaiyaka-pyaa: “Nyakamame niki landa pingisa-kaita kopa silyamo kanju petala gii dokopaka aiyuu ipame lamona lengema. Kini, dopaka pyoo aiyuu epenge.

⁵⁵Nyakamame poo pupu lapae mende mendakaita-kaita lao epelyamopa, kandatala indupa paina pyapome lamona lengema. Dokopa kiningi paina pingi daape!