Luke 23:3-24

³Setero Pilate mi uso yei sisira, “Imo mo Jew embobo da gitijigari nembodiba ta?” Setiri Iesu mi mina sisira, “Imo imosuka sesa awara.”

⁴Setiri Pilate mi priest gitijijigegari de embo dombu dombu atisera ainda yei sisira, “Embo eiawa wasiri biae aera.”

⁵Awarate ungomi sekago sisera, “Judea busu berari da embo da yei umo mambutira awa uso atopatari mi iri embogo tuturo era. Umo Galilee busu da tuturo edo boroko einda bugira.”

⁶Pilate ge eiawa ingido nganega isira, “Embo emomo Galilee embo ta?”

⁷Setiri setero gosisira umo Iesu awa busu Herod mi gitijigido ira yei awa embo. Awasedo Pilate mi Iesu awa Herod da yei itiri mambusira umo awa Jerusalem nati da iji ainde awa atisira.

⁸Edo Herod Iesu gido iaviri isira ko umo Iesu da binga ingido edo boroko ae be umo gari dipapa evira. Umo Iesu mi wasiri ari gadi dipapa edo evira.

⁹Awasedo Herod Iesu da yei nganega jiwae be isira te Iesu uso ge mina sae.

¹⁰Edo Priest gitijijigegari de agodari da atopapotegari de mi erido Iesu goroba de bekuba isera.

¹¹Edo Herod de uso isoro embobo de mi Iesu gandubedo edo umo biae be isera. Edo bo ove ewagaewa de awa uso yei itero ombiri ungomi umo itero sekago Pilate da yei mambusira.

¹²Edo Herod de Pilate de awa mendo gambae edo isera te iji ainde awa otao isera.

¹³Pilate mi setiri Priest gitijijigegari de Jew embobo da gitijijigegari nenei de edo embo de dada isera.

¹⁴Edo ungo dada etero, Pilate mi ungoda yei sisira, “Ingo embo eiawa budo naso yei bugewa edo setewa umo embo da yei ge busise tembira. Awarate na ingo berari da dombu da umo nganega etena ingoda bekuba etewa awa edo buria da ro tambae etena.

¹⁵Edo Herod Iesu sekago ingodenaso yei itiri bugira ainda be awa umo nganega etira te buria da ro tambae edo wasiri biae da ro ari ingomi dawo betadira awa aera.

¹⁶Awasedo nanemi sena ungomi umo vejedo edo wujegadera.”

¹⁷Edo gaeko jaige jarusegari bondo da wasiri awa ambo ambo edo era. Pilate mi gajari oro da atima ira embo awa embo mi da rawa dipapa edo era awa wujegedo ira.

¹⁸Awasedo embo berari mi gogo dimbudo sisera, “Embo awa de betare. Barabbas awa wujegeio nangoda yei bugare.”

¹⁹Matu gitida ungoi Barabbas awagajari oro da ititisera ainda be awa unemi etiri embo mi gitijijigegari awa dorisera. Edo umo daedo embo da detiri betisira.

²⁰Edo Pilate Iesu wujegadi dipapa edo embo da yei sisira.

²¹Awarate ungoi gogo dimbudo mina sisera, “Orega da de. Orega da de.”

²²Setero Pilate mi ungoda yei sisira, “Awarate umo ro embo betarase dipapa evi? Wasiri biae ro etiri? Na wasiri biae ro tambae edo ingo mi umo dawo betarase evi? Nanemi sena ungomi umo vejedo edo wujegadira.”

²³Awarate ungomi mata gogo nembodiba dimbudo sisera Iesu awa benema mi orega da doro betarase sisera. Edo ungo mi gogo dimbuse atisera amimi Pilate da ge awa papotisera.

²⁴Awasedo Pilate awara sedo sisira ungo ro dipapa era awa dowo ore sisira.