Luka 23:3-24

³Pilato ia i oimurini, i ene, “Oa Iudea edi Wasawasa?” Iesu ia arinana i heuio, i ene, “Oa u ene doha meta.”

⁴Pilato abo i ribalau kohena lailaidi, eo tatao aridi eai, i ene, “Teina tau ta ena baaea nige ea lobai.”

⁵Isi abo se ouialaiala ariri, si ene, “Eanua tataodi i heasiworeworedi. Galilaia i lauheata hetubu, eo eanua gamagamagari i laoma hinage ina eanua eai ta.”

⁶Galilaia esana se atai, Pilato i ataiei, abo i hesio aridi eai, i ene, “Tau ta Galilaia tauna?”

⁷Abo i nuatui Iesu Heroda ena tupo eai i laoma, arinai i hetamari Heroda arinai, Heroda wa nei huiana ne Ierusalema eai.

⁸Heroda Iesu ie ita nuana i lolo ariri: nabada wa ena gadosisi bena ia i ita, paana ia wasana gamagaridi i ataiedio; eo ena nuatu i ene bena ena laulau gigibori esau abo i ita.

⁹Riba gamagamagari aridi eai i hesiolau Iesu arinai: ia arinana nige i heuio.

¹⁰Kohena lailaidi eo tauuriuri tataodi se toro ia se hegihegirudaoi.

¹¹Heroda, ma ena iala tataodi ia se isugaraei, eo se talatalawasiei, eo lulu balebalelemna esau ia se helui, ia abo se hetamari uio Pilato arinai.

¹²Nei asubenana ne Pilato eo Heroda se awaheriam, nabada wa taudi labui se heiheisugara.

¹³Pilato, kohena lailaidi eo babadadi eo eanua tataodi i eogagogoidi,

¹⁴abo i ribalau aridi eai, i ene, “Ina tau ta au woeaiama arigu eai ta, au ene tatao i hegegewaridi: ia matamiu eai ana mata ea eoodadaasa eai, riba wa emi abahegiruna wa ina tau ta nige baaeana saha ea lobai:

¹⁵nige’e, hinage Heroda nige i lobai: paana ede ea hetamarimiu Heroda arinai; nige mate laulauna esau i laulauei.

¹⁶Ia abo ea lubilubini, eo ea eairigabaei.”

¹⁷(Mataasi huiadi eai ne kamanidi, tau esau se eairigabaei.)

¹⁸Ma esega se eogayogalau, si ene, “Ina tau ta au abiyawa, na Baraba au eairigabaeyama arimai eai.”

¹⁹(Tau ta eanua i heasibuibuidi, eo i aiaiunu, arinai ia se tore numa masigiri eai.)

²⁰Pilato, bena Iesu i eairigabaeuioi, arinai i riba uio aridi eai.

²¹Na isi abo se eogayoga, si ene, “Ia au hesatauroeawa, ia au hesatauroeawa!”

²²Ma haiona hinage i ribalau aridi eai, i ene, “Ie saha, baaea esana ie abi? Ena mate paana nige ea lobai: abo ea lubilubini, eo ea eairigabaei.”

²³Se samadudui ma arina lailaidi si ene ia bena se hesatauro. Isi arinadi eo kohena lailai arinadi abo se hebigawatai.

²⁴Pilato abo i heribadi isibom edi nuatu abo se abiyawa.