Lucas 23:3-24

³Zee lee Pilat mnabdizh lo Jesús nu nzhé xaa: —¿Che lu nak Rey cheen re xaa Israel? Jesús nzhé: —Sbaa naka, kwentaxa nguné luya.

⁴Zee lee Pilat nzhé lo re ngwleyy non nu lo re xaa nzhi baa: —Nzak na nik tub jwalt namlet xaa ne.

⁵Zee mbare re xaa nzhé: —Wii, axta yizhyo Galilea mzelo xaa mzaa xaa kwent zee lee re myet zelo yasya lo re xaa Roma. Nu noka mzhin xaa re yezh cheen Judea nee nu sbaaka kale xaa.

⁶Gorna mbin Pilat kwaane, zee mnabdizh xaa: —¿Che xaa yizhyo Galilea nak xaa ne?

⁷Gorna ngune Pilat lee Jesús nak xaa yizhyo pa nabeyy Herod, zee mxaal xaa Jesús lo Herod. Mbizh ba Herod nzo Jerusalén.

⁸Nyakdoola Herod ngune lo Jesús, nel nzha doo mbizh nzhekla xaa ne xaa lo Jesús, nel zyen doo welt mbin Herod kwent cheen Jesús, nu nzhekla xaa ne xaa le Jesús tub kwaan gro doo.

⁹Zee mnabdizh Herod zyen doo kwaan lo Jesús, per lee Jesús nik tub kwaan namkebt lo Herod.

¹⁰Per lee re ngwleyy non, nu re maestr xaa nlu xtizh Dios nzhi baa nu zyen doo re kwaan mgaazh re xaa tich Jesús.

¹¹Zee lee Herod nu re soldad cheen Herod mzaaya yenn Jesús nu mxizhno re xaa Jesús. Nu mlo re xaa tub ler chul doo yenn Jesús zee mbe re xaa Jesús lo Pilat stub welt.

¹²Nu mer mbizh ba lee Pilat rop Herod mbare myenn stub welt, nel yilo mdil doo rop xaa.

¹³Pilat mrezh re ngwleyy non nu re xaa nabeyy yezh, zee ya re xaa lo Pilat.

¹⁴Zee nzhé Pilat lo re xaa: —Mbidlaa re gu xaabyi ne lo na, mgaazh gu kwaan tich xaa, lee xaa nle zee yasya re myet ne re xaa Roma. Delant lo re gu mnabdizh na re kwaane lo xaa, nzak na nik tub jwalt kwaan mgaazh gu tich xaa namlet xaa.

¹⁵Noka Herod nzak nik tub kwaan namlet xaa, zee mxaal xaa xaa lo na stuba. Nik tub kwaan namlet xaa zee nanzhaalt yet xaa.

¹⁶Nal za naya yenn xaa zee sela na xaa.

¹⁷Nu rese liin leezha nla yalni ne, Pilat nsela tub xaa nzho lozhyib.

¹⁸Per rese myet dublegan mbazhe, nu nzhé: —Nanzheklat nu sela lu xaabyi ba, Barrabás nzhekla nu sela lu.

¹⁹Barrabás nak tub xaa mbit myet nu leeka lee xaa nak xaa mchaldil xaa nabeyy yezh, kwaanzee mlo xaa Barrabás lozhyib.

²⁰Pilat nzhekla sela Jesús, zee mbare xaa ngunii xaa lo re myet stub welt.

²¹Per lee re myet mbare nzhé: —¡Kee xaa lo krus! ¡Kee xaa lo krus!

²²Myon welt mbare Pilat nzhé lo re xaa: —¿Chozhiin? ¿Cho kwaan nawent mle xaa ne? Nanguzhalt na nik tub kwaan nawent kwaan mle xaa zee gut na xaa, nebse teed na xaa bid zee sela na xaa zee nya xaa.

²³Per lee re xaa seetaka nye doo mbazhe, nu mbezh re xaa nzhaal kee xaa lo krus. Tant nkee doo re xaa bi, zee mle xaa gan le Pilat kwaan nzhekla re xaa.

²⁴Zee lee Pilat mnabeyy zee gaka mod nzhekla re xaa.