Luke 18:21-42

²¹Ye mina amiye yaku niyo, “Na keikari gutuna mina kana vegu ago tau vakoi moi gira ri baeda.”

²²Ma mina neidegasa niyo, “Vegu yokoi maka bi de reyo. Yi gugura tau mina sero resi ini fore irava vene masi yi gugura buni bi omari baku regiya; na usi bae.”

²³Idu mina neidesi ini uka yarena iniye reyo, adina ina bi gugura tau gade amiye.

²⁴Iesu ina vesi iriyeduka dudu niyo, “Gugura tau gade nufa vene yaku Sei di ourefeidena amena sanari dui rena bi gira iniye!

²⁵Kamelo yaku niduru nemokori dui rena bi aita, idu gugura tau gade nufa amiye yaku Sei di ourefeidena amena sanari dui rena bi gira iniye.”

²⁶Ye mina ago neideyadi vene yaku niyadi, “Kamini kaere moi vegu rigo?”

²⁷Ma niyo, “Amiye beika gokai anua regedi, Sei yaku mina rego bi aita iniye.”

²⁸Kamini Peter yaku niyo, “Ve kumo, uni beika baika feresi ya usi diyafa.”

²⁹Ma ina vene rofu niyo, “Rama ya nida, amiye yokoi yaku ini yava, o rema, o usika ourena, o nono baba, o mida, Sei di ourefeidena amena sana rofu fereyo bi,

³⁰mina veguri, bi tora gade iniye moigo. Ma gabi mina meda baegori, toga toga ameibobina vegu moigo.”

³¹Kamini ini amiye 12 moi gaima risi niyo, “Neidefa, una bi Jerusalem bogifa, Sei di ago niyadi vene yaku Amiye di mida rofu vata nigo vegu bura reyadi, mina rama aego.

³²Tutubena idana vene di vanari aegedi; ina rofu nikurusi ni no resi ayaka su resi

³³buburu vai resi umuyegedi. Idu gabi meda regodenuri, dudusa dadi rae rego.”

³⁴Idu ini usi dina vene bi mina sina niyori, bi ini adari ufatena de reyadi. Mina sina di rama bi ina vene di mokenari sui niyo, ma ini beika nigamo bi ina vene ka ina toto.

³⁵Kamini Iesu Jericho negau okiyori, bi ne taufa amiye yokoi ida atafu amegasa usa nigamo.

³⁶Amiye tau gade bae bogamadi mina neidegasa bi nikaitesi niyo, “Mina bi kaere?”

³⁷Kamini niyadi, “Iesu Nazareth amiye bi bae bodo.”

³⁸Ye raka nisi niyo, “Iesu, David di tutubena, na iriyeduka re!”

³⁹Ourei boyadi vene yaku emaradi babo niyaine, vo niyadi, idu besa raka niyo, “David di tutubena, na iriyeduka re!”

⁴⁰Ye Iesu are resi ago gira dudu ina rofu moi baeyaganedi, vo niyo. Atafu baegasa bi nikaiteyo,

⁴¹“Ya ura reisa bi beika ya rofu regida?” Nikabai resi niyo, “Varika amiye, na ura reida bi dudusa gagani vegida.”

⁴²Ma niyo, “Ve kumo! Yi mokena vari gira aena yaku ya moi buni riyo.”