Lucangundru 18:21-42

²¹Nau jatana wonti: “Jenia pratjana ngato ngamalkai kupandru.”

²²Jesujeli jenia ngarana, Nau nunkangu jatana wonti: “Windri kulno jundru wata ngamalkai: Pratjana mina jundru ngamalkai jinkau kalalaia, ja wangiwangini bakujeli jinkiau, ja jundru poto pirna pariwilpani ngamalkala nganai; ja tikau, ja ngakangu karipateriau!”

²³Nulu jenia ngarana, nau ngaurongaurorina wonti, ngangau nau poto pirna nganana wonti.

²⁴Jesujeli najina, nau ngaurongaurorinani, Nau jatana wonti: “Worderu mati tana kana poto pirna Godaia mililani wirila nganai!

²⁵Morla ngaua nganai, Camuli kulno kuri pikiri wilpani palkingananto kana poto pirnani, nau Godaia mililani wirinanto.”

²⁶Tanali jenia ngarana jatana wonti: “Warlengarla tepita manila nganai?”

²⁷Nau jatana wonti: “Mina kanani ngandandariai, ngarla Godata wata ngandandariai.”

²⁸Petrus jatana wonti: “Mai, ngaiani pratjana worananala ja jinkangu karipaterinala.”

²⁹Nau tanangu jatana wonti: “Morlalu ngani jurangu jatai: Wata kulno nganai, nulu matja worarana punga kara, ngaperi ja ngandri kara, neji ngatata kara, noa kara, kupa kara, Godaia mililandru,

³⁰Nulu wata pota marapu morla manila nganai nunkangupini miljarani, ja miljarani nau wokarala nganai tepi ngurali.”

³¹Ja Nulu mili marapratjana patana wonti ja tanangu jatana wonti: “Mai, ngaiana Jerusalemia tarala nganai, ja jenia pratjana morlalu pantjila nganai, mina Propheta worali dakana wonti Kanaia Ngatamurandru.

³²Ngangau tanali nina kana koni ngulkujeli jinkila nganai, ja tanali nina ngirkibala nganai ja nunkangu madlentji jatala nganai ja ngaltja worala nganai,

³³Ja tanali nina wirieli nandrala nganai ja nari ngankala nganai; ja ditjini parkulani Nau jiritjila nganai.”

³⁴Ja tanali jenia bulu ngujamana wonti, ja naupini jaura tanangu purru nganana wonti, ja tanali bulu patana wonti mina tanangu matja jatana.

³⁵Jendranguta Nau Jericho karakara wokarana wonti, ja kana butju paltuni ngamana wonti potuni ngatjila.

³⁶Nulu matja ngarana, kana wolara wiri nganani, nulu jakalkana wonti mina jenia nganai.

³⁷Tanali nunkangu kaukaubana wonti: “Jesus Nazaretala wiringala wapaia.”

³⁸Ja nau maritjina wonti ja jatana wonti: “Jesujai, Davidani ngatamurajai, ngakangu kalumiltjamiltjariau!”

³⁹Tana ngopera wiringana nina daudauana wonti nau ngapurinanto; ja nau morla parparali maritjina wonti: “Davidani ngatamurajai, ngakangu kalumiltjamiltjariau!”

⁴⁰Ja Jesus banbana wonti ja jirijiribana wonti nina nankangu padakananto. Nau nunkangu matja karakara, Nulu nina jakalkana wonti

⁴¹Ja jatana wonti: “Mina jidni ngantjai, ngato jinkangu ngankananto?” Nau jatana wonti: “Kaparajai, ngato najinanto.”

⁴²Ja Jesus nunkangu jatana wonti: “Najiamai! morlalu ngundranali jinkanali jidna kulkana warai.”