Lucas 18:21-42

²¹Entunses inu tlöcatl oquejto: ―Noche inu sa onecchijtebitz desde netzitzequetzi hasta öxö.

²²Cuöc Jesús oquecajque ini nönca, oquelfejque: ―Sa sente cosa oc metzpoloa. Xecnamaca noche tli tecpea, hua xequenxiexelfe tli porubejte. Ejqueu tecpeas ricojyutl ompa elfecac. Entunses xehuöla, xeniechtoca.

²³Cache yaja omotequepacho lalebes cuöc oquecac ini nönca sösantle, ipampa oyeya rico lalebes.

²⁴Hua cuöc oquejtaque Jesús, nuyejque netequepachuluc. Oquejtojque: ―Bel lalebes tequeyo para calaquesque tlin ricojte cöne tlamandöruro Deus.

²⁵Cache isejco calaques sente camello por ixtelolo de sente öcuxa, que sente rico calaques cöne tlamandöruro Deus.

²⁶Hua tli oquecajque oquejtojque: ―¿Öquenu noso cuale momöquextis tlö ejqueu?

²⁷Hua yejuatzi oquemelfejque: ―Lo que tli abele para tlöca, cuale quechihuasque Deus.

²⁸Entunses Piero oquejto: ―Xomojtele tejua otejcöjque tlin tohuöxca, hua temetzmotoquelejteneme.

²⁹Hua yejuatzi oquejtojque: ―Melöhuac nemiechelfea, öque tli cualcöjtiehuas ichö, noso isohua, noso icnihua, noso itötajua, noso ipelhua, por queneques ma tlamandöro Deus,

³⁰ipa nönca tiempo yaja queselis cache meyac töntos. Hua ipa inu tiempo tli huölös quepeas nemelestle nochepa.

³¹Hua yejuatzi oquenbicaque inu majtlactle huan ume nencua. Oquemelfejque: ―Xequejtacö que teyabe ca ciudad de Jerusalén. Hua mochihuas noche sösantle tli oquejcuelojque inu tlayulepantejque acerca de naja que onochi netlöcatl.

³²Pues niechtiemöctisque inca tli amo de topuieblo. Yejua moburlörusque de naja, hua niechtratörusque san petzotec, hua niechchejchasque.

³³Hua sötiepa niechbitequesque, hua niechmectisque. Cache ipa yeye tunale neyulebes.

³⁴Pero yejua niontle amo casojcömateya de ini nönca sösantle. Pos ini nönca tlajtule amo cantendierojque, hua amo casojcömateya tli quejtuloöya.

³⁵Hua omochi que cuöc onepachulutöya itech ciudad de Jericó, sente ixcocoxque oyehuataya ipa ojtle motlajtlaijtlanejtaya.

³⁶Ini nönca cuöc oquecac quiene panuya tlöca, otlajtla tlininu oyeya inu nieca.

³⁷Hua oquelfejque que nele panoöya ca ompa Jesús de puieblo de Nazaret.

³⁸Yecuöquenu otzajtzec, oquejto: ―Jesús, iConie David, ma temetzmoyulcocolfe.

³⁹Hua tli tlayecönaya cajajuaya nele ma quetzacua icamac. Pero yaja cache lalebes tzajtzeya: ―IConie David, ma temetzmoyulcocolfe.

⁴⁰Yecuöquenu onequetzaluc Jesús, hua otlanahuatiluc ma quehualecacö. Cuöc yaja oaseto, oquetlajtlanejque:

⁴¹―Pos ¿tli tecneque ma temetzchibele? Hua yaja oquejto: ―Tlöcatzintle, ma netlachea.

⁴²Entunses Jesús oquelfejque: ―Xetlachea. Por tomoneltocac ye tepajtec.