Luqaasa 18:21-42

²¹Addezikka “Hayta gidikko guutha natetethafe doomada naagadis” gides.

²²Yesusikka hessa siydi “Histikko nees issi miishi paccees; nees dizazi wursa bayizada manqotas imma; salo mazgaban demmandasa; izappe guye yaada tana kaalla” gides.

²³Gido attin addezi hessa siyida wode daro haaroy izas diza gish keehi mishettides.

²⁴Yesusikka addeza xeelidi “Daro miishi diza asati Xoossa kawotethi gelanayssi ay mala meto!

²⁵Durey Xoossa kawoteth gelanayssafe Gaammelay narpe lukkora aadhdhanayssi matana” gides.

²⁶Hessa siyida asay “Histin ooni attana dandayizee?” gides.

²⁷Yesusikka asa achchan dandayetontay Xoossa achchan dandayettes gides.

²⁸Phexroosikka “Hekko nuni nuus dizaz ubba aggidi nena kaallidos” gides.

²⁹Yesusikka istas “Ta intes tumu gays; Xoossa Kawoteththa gish giidi ba keeththe, ba macho, ba ishanta woykko bana yelidayta woykko ba nayta aggidadey,

³⁰ha7i wode daro dakko kushe ekkontaynne yiza wode qasse merna de7o ekkontay oonikka deenna” gides.

³¹Yesusikka bana kaalliza tammanne nam7ata dumma efidi “Ha7i nuni Yerusalame kezana goos; nabeti asa naa gish xaafidayssi wuri polettana.

³²Dere asas aaththi immana; istika iza qidhi ka7ananne waayssana; iza bolla cuttana.

³³garafana; hessafekka zaaridi wodhana; Izikka heedzdzantho gallas hayqoppe dendana” gides.

³⁴Iza kaallizayti gidikko hessa ubbafe issinoka eribeyttenna. Iza gizayssikka istas gelibenna. Izi aaza gish haasayidakkonne eribeyttenna.

³⁵Yesusi Iyarko geetettizaso matida wode issi qooqe addey oge duunan uttidi woosses.

³⁶He qooqe addezikka daro asay ogera aadhdhizayssa siydi “Hessi aazee?” gi oychides.

³⁷Istika izas “Naazirete Yesusi hayssara aadhdhees” giidi yootida.

³⁸Izikka “Dawute naa Yesusa taas qadheta” gi waassides.

³⁹Yesusappe sintheti bizayti “Co7u ga!” giidi hanqettida. Gido attin izi “Dawute nawu! Taas qadheta” giidi darsi waassides.

⁴⁰Yesusikka eqqidi addeza izakko ehanna mala azazides; izikka izakko shiiqida wode

⁴¹“Ta nees ay ooththana mala koyay?” giidi oychides. Qooqezikka “Godo xeellanas koyays” gides.

⁴²Yesusikka “Nena ne ammanoy pathides xeella” gides.